باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و هەشتا و چوارەمە
سوراقە وەختێ گېڵاوە پەی مەککەی، ڕانە هەرکەسش دیێ واچۍ: نە محەمەدم دییەن نە ئەسحابە، من چن شەو و ڕۊوېن مەگېڵو، بەڵام کەسم نەڎیی، ئاڎییچۍ شۊنەو وېشارە گېڵېنێ. ئیتر سوراقە، بە دڵ ئیمانش ئاوەرد، دمای غەزاو (حونەین) ی، ڕای دوورەش تەی کەردە، تا یاوا بە حەزرەتی.
غەرەز وەراوەر وە هەرکەس یاوا
گېڵناش وە پەس بۍ جەنگ و داوا
واتش: من چن ڕوژ زەحمەتم وەردەن
محەمەد وەی ڕا، گوزەر نەکەردەن
نە محەمەد وېش نە ئەسحابی ئەو
نامان، نەوېیەردەن نە ڕوژ و نە شەو
ڕاوزان ڕاو یەکسەر نادیم کەرد
شین وە دماوە گرد چەنی وېش بەرد
بەڵۍ یە خودان ئەوەڵ هیدایەت
وەیتەور مەرقوومەن ئەسڵی ڕیوایەت
جە دمای غەزای (حونەین) ی مەشهوور
سوراقە تەی کەرد مەنزڵانی دوور
یاوا وە پابوس شای خەیرولبەشەر
ئەو ئامان نامەش دا وە پېغەممەر
دینی ئیسلامش ئەو ڕۊ کەرد قبووڵ
ئیمانش ئاوەرد بە خوڎا و بە ڕەسووڵ
جە کۊ بشنەوین شای بوراق سوار
چەنی ئەو یاران شەرتی وەفادار
جە هیچ مەکانێ نە گرتەن ئارام
جە شام تا سەحەر، سەحەر تا وە شام.[1]