سرووشتە جوانەکەو بېیارۍ، خولقنەرو هەستە ناسکەکاو گورانییەن.
عەبدوڵڵا بەگی گوران شاعېر و هەم ڕۊنامەوانی سەردەمێ دیاریکریا جە مېژوو ئەدەبو کوردی (سورانی) . گوران جیاواز جە شاعېرە وەڵینەکاو مەدرەسەو بەنام بابانی زیاتەر کەتوار ۋین و جوان ۋین و عاشق بە دنیاو سرووشتی و بەرکۆتەکاشەن.
وەڵ جە گورانی شاعېرەکۍ مەدرەسەو بابانی پەی نویستەی شېعرۍ پەناشان بەردەن پەی کېش و سەروای عەرووزی
کۊنی عەرەبی پېسە نالی و سالم وکوردی و مەحوی....هتد
مەزانمی کە وەڵ جە نالی و هامڕاکاش شېعرەی هۆرامیە خاوەن و کېش و سەروای تایبەت بە وېش بېیەن کە کېش و پەنجان (هیجا ) .
گورانی شاعېر سەرەڕاو ئانەی شېعرەی کۊردیەش (سورانی) گېڵناوە پەی دلۍ واقېعی (کەتوار) ، جە کېشی کۊنی عەرووزی عەرەبیچش ڕزگارە کەردەو گېڵناشۆ پەی سەروو شېوەو شېعرەی هۆرامیۍ، بەڵام بە زوان و وېش.
گوران (1905 --- 1962 ) جە شاروو هەڵەبجەی جە ئەڎێ بېیەن، بنەماڵەشان جە ناچەو مەریوان و ئېرانیۆ ئامێنۍ پەی هەڵەبجەی.
گوران زوانی هۆرامیش زانان و چېرۊ کاریگەری مەدرەسەو شېعرەو هۆرامینە بېیەن بە تایبەت مەولەوی.
گورانی شاعېر دلۍ ئازاراو مەینەتینە جوانیش وېناکەردەن، سەروو دڕەیاوە ۋلیش وینێنە، ئانەیچ بە کاریگەری سرووشتو جوان و زەریف و هۆرامانی.
جە تەرسەو ئینگلیزەکانە یانەو تاتەو گورانی (سلێمان بەگی کاتبی فارسی ) مەلانە پەی بېیارۍ (هۆرامان ) ، دلۍ باخەکا دەرەو بېیارېنە مەنزڵگا بینان . چا وەختەنە گوران جە دەمو سەرەتاو ژیوایشەنە بېیەن، یانی لاو بېیەن.
دڵ عاجزیێ گنۊ میان و گورانی و تاتەیش، ئاڎییچ قینیېنە مەگېڵۊوە پەی هەڵەبجەی، جە شاروچکەو بېیارېوە جمۊرەو دلۍ باخە پەڕ وەزوو هەنارو هەڵۊچەکارە ڕاویەری کەرۊن، دنیا تاریکەن و دلۍ باخەکاچ شەوەزەنگ، گۊرانی شاعېر وەخت و ڕەوتینە چن تۊپەڵە ڕۊشنایێ گنا وەروو چەماش، گوران فرە مەتەرسۊنەو پاسەمەزانۊ کە ئانە خېڵ و جنان دلۍ باخەکەینە هۊرشادان، پەی مەڕیای زاتیش نەمۊ تەوەنێو پەیشان شانۊن، ڕۊشناییەکۍ بەرزۍ مەباوەو ملان ئاسمانەرە، ئیتر دمایی گوران مەزان و ئانە دنیاو (ئایېرەقۊلانە ) و گېیاندارۍ گڵۊپدارېنۍ. گوران ئەچاگۆ دلۍ دڕەیانە ڕۊشنایی مەوینۊن و ئانەیچ مەبۊنە بە ئامیان و گرسای خەیاڵ و شېعراش.
گوران چەنی تاتەیش قورئانش وانان و جە مزگی پاشای جە هەڵەبجەنە بېیەن بە فەقی و ماوێچ بە (فەقی عەبدوڵڵا ) ئەشناسیان.
وېناکەردەی شاعېری جیاوازەن، ئا دیمەنۍ کە شاعېر وینۊشان کەسی ئاسایی نمەتاۊو وینۊشان. وەختێ کناچە نۊهاڵەکۍ بە گۊزۍ پەڕ جە ئاوی جە هانەنە مەگېڵاوە، گۊران ئەپېسە مەوینۊشان
وەختێ کە ئەکەی چەشنی نەسیم لەنجە بەرەو ماڵ
ئەگریجەی تەڕ پەخشە لەسەر کوڵم و خەت و خاڵ
شەڕیانە: شەماڵ، پەنجە لەسەر ڕەنگی ڕەش و ئاڵ
ئێوارەیە وا، هەڵگرە سا گۆزەیی تازە
چن جوان جەنگ و میان و شەماڵی و پەنجۍ گۊزە سەرشانەکۍ نماییش کەرۊن پەیمان: شەماڵ حەزش جە ڕەنگی سیاوەن و زوڵفېش پەخشانۍ مەکەرۊن ملوو ڕوومەتیشەرە، بەڵام پەنجېش حەزشان جە ڕەنگی ئاڵېن، پەوکەی زۊڵفەکاش لامڎۊ و کۊڵمە ئاڵەکاش بەرمەوزۊن.[1]