باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و ویس و یەرەمە
تاتەو سەلمانی فارسی موددەتێ بۍ سەلمانی کوڕش نەڎیەبۍ، وەختێ شاڎۍ بیێ بە یۊترینی، تاتەش شاگەشکەبۍ، پەرساش جە کوڕەکەیش، چکۊ بېیەنی؟ سەلمانیچ ماچۊ: ڕام کۆتە کەنیسێ، چاگە قەشەکۍ ئینجیل وانېنۍ، دینەکەشا فرە تەمامو ڕاسەن، تاتەش وەختێ قسەکۍ سەلمانیش ئەژنیۍ، فرە ناڕەحەت بی، داخیېنه سەلمانش بە زنجیر پابەن کەرد.
خولاسە ئەو ڕۊ تاکە خۊرئاوا
دیسان وە حوزوور شاباشی یاوا
دیش خەیلێ پەشېو پەرگەندە حاڵەن
جە دووری فەرزەند شاڎییش بەتاڵەن
سەلمان دیی وە چەم دڵشان بی وە شاڎ
خەرمانی خەمان یەکسەر دا وە باڎ
وات: فەرزەند ئارۊ قسمەت کۊت بەردەن
بە خوڎا جە دووریت ئیمانم هەردەن
وات: بەڵۍ ڕام کەفت وە یەک کەنیشتێ
دیری عەجیبی خوڎا سرووشتێ
ڕەهبانانشان تاعەت مەکەردەن
ئینجیل مەوەندەن سوجدە مەبەردەن
واتش ئەی فەرزەند نەوتوولی سەرمەس
دینی بابۊی وېت وەرنەڎەی جە دەس
بشۊ بپەرسە جە ئەهل و ئەعیان
مەجووسی خاسەن یا باقی ئەدیان
سەلمان وات: حاشا بەو تەورە نېیەن
ئەو دینی میللەت ئارۊ من دییەن
چەنی مەجووسی تەفاوت داران
سا دین ئەگەر هەن دینی نەساران
بابۊش ئېد شنەفت غەیز ئاوەرد نە دڵ
جە دینی سەلمان یەئسش کەرد حاسڵ
دەردەم وە زنجیر قایېم بەندەوە
پای سەلمانش کەرد وە پا وەندەوە
واتش: تا مەردەن ساکین بەر پەی وېت
یەتیمی ئەحمەق نادانی سەرشېت.[1]