قاڎرو لېفە شڕەکەش
بەشۍ دوەمە
حەزرەتو ئاڎەمی بە قەولو حەوێ دڵش وەشبی، دڼە گەنمەکەش واردە، بۍ فەرمانی خوڎایشان کەرد، جە بەهەشت بەرکریێ ڕوەو زەمین، تاکو چن ساڵۍ دوور جە یۊترینی، مەگېڵێ هەرد و دەر، تاکو وەختێ ئاڎەم تۊبەشکەرد و خوڎای بەخشا، ئیتر جە کۊ عەرەفاتی یاوێ بە یۊترینی، چاگە جوبرەئیل ئاما پەی لایشان، ماچۊ دەسکەردۍ بە ئاوەڎانی، ئاڎەم یانەش پەی شیرینۍ (حەوێ) سازنا، بەڵام چوڵ و هۊل، پەوکەی ئاڎەم جە بەهەشتۆ بڕێ پەمبە (مەرەز) ش پەی حەوێ ئارد، چەنی ئامېڕێ ڕېسای، واتش: بڕېسەش، ئاڎییچە دەسشکەرد بە ڕېسای، کەردش بە گرۊڵییە، دمایی بە ئامېرو جوڵایی کەردش بە قوماش، لېفەش وەشکەرد پەی عەیشو نوشو ئاڎەمی.
ئاڎەمیچ وە قەوڵ حەوا دڵ وەش کەرد
چوون حەوا دانەی گەنم لەب چەش کەرد
ناگا خوڎٚاوەند ڕەنجیا لېشان
سزای قیامەت نمانا پېشان
هەردوو مەحرووم بین جە ڕەوزەی بەهەشت
غوباری عوسیان وە باڵاشان وەشت
وە حوکم فەرمان پادشای بۍ چوون
نائومېد کەوتەن وەڕووی دنیای دوون
حەوا حەواڵەی خاکی جەددە کەرد
ئاڎٚەم تەشریفش وە (سەراندیب) بەرد
دووسەد ساڵ تەمام شین و زاریشان
ویەرد جە گەردوون ئاهی کاریشان
تا ئاخر ئاڎٚەم وە دڵ توبە کەرد
توبەش قبووڵ کەرد زات تەنیای فەرد
جە کۊی عەرەفات بی زیاد و کەم
وە چەند شاڎی و زەوق تاکو یاوان وە هەم
ئەمجار دەس پەی کار عەمارەت بەردەن
مەنزڵی شیرین ئامادە کەردن
بەڵام چوون یاتاخ نادرەی نایاب
خاڵی بی جە فەرش جە باقی ئەسباب
حەوا چەنی خەم خەیاڵ پەڕ دەرد
کېشا نە دەروون هەناسان سەرد
ناگا جبرەئیل ئاما وە لاشان
قەرار دا ئەسباب ئەوزاع جاشان
جە بەهەشت بەعزی پەنبەش پەی ئاوەرد
چەنی یەک دووکی چوون چەرخی چەپ‌گەرد
واتش بڕېسەش سەوڵی سۊسەن بۊ
یە مایەی فەرشەن ئاوەردم پەی تۊ
حەوا دوک ئاوەرد نیاش وەلای پېڵ
چەرخش دا وە چەرخ چوون چەرخ چەپ‌گېڵ
وە ڕیشەی مەینەت دووکاویچی خەم
تای خاو تەناف دووباد کەرد وە هەم
وە پەنبەی پەڕجەور هیجران یاران
هۊرکەرد گرۊڵی تاقمەی پەژاران
ئه و ئۊسای سیم‌ساز وە شۊماڵ دەرد
وە نیشانەی خەم شۊماڵ کاری کەرد
کېشا نەڕووی دار مەوڵەقەی جەلیل
پا کەرد نەپاچاڵ پاتیتەی عەجیل
وە لوولەی فیراق مەکۆی مەهجووری
گەردش دا وە دەف دڎٚانەی دووری
تەمام بی بڕیش وە مەودای خەیاڵ
ڕەنگش کەرد وە دووی هەناسان کاڵ
کەردش وە لەحاف سازناش وە هەم
پەی عەیش حەزرەت جەناب ئادەم.[1]