دیوارو عەدالەتی...
والی شارێ نامێوەش کیاستە پەی حاکمو وەڵاتی، دلۍ نامەکېنە نویستەبېش: دیوارو حەسارو چواردەورو شاری باعزێش ۋڕان، گەر فەرمان فەرماوی جە خەزېنەو وەڵاتینە مەبلەغێ دیاریکریۊ پەی نۊژەنکەردەیۆش، کە ئانەیچە کارێ زەرورەن پەی پارېزنای ژیوای خەڵکی و سەقامگیری ئارامیشا جە دەسو هەر دژمەنێ دەرەکی.
حاکمو شاری جوابش داوەو ماچۊ:
گەر بتاوی دیوارێ عەدالەتی چواردەورو شاریرە وەشکەری، ئا وەختە تەرسی هاموەڵاتیا جە دەسەڵاتدارا و جە نەبېیەی و جە ماف واردەی نمەمەنۊ، پەی پارېزنای ئا ژیوایشا و ئا دەسکۆتا، وېشا وەرگیری جە هەر پەلامارێ و دەسدرېژیێ بېگانەی کەران، پەنەۋازیشا بە هیچ دیوارێ نمەبۊ کە چواردۆرشارە وەش کریۊ.
وەختێ داڎوەری دلۍ خەلکینە مەرزیارە و تاکەکۍ کومەڵی هەسسشا بە بېیەی وېشان کەرد، وەختێ ئازادی کەسی و فەرهەنگی و سیاسی و یابووریشان پەی فەراهەم کریا، ئا وەختە وېشا بۍ هیچ فشارێ، پارېزگاری جە کیانو هەم وەڵاتو وېشان کەران.
هەر پاشێوە نەخشەو ستەمی کېشۊن، پایەو دیوارو بیناو دەسەڵاتیش لەق کەرۊن.[1]