سوڵتان سەرئیڵ...

جواب نامۍ سەیید بەهای شەمسی پەی میرزا ئۆلقاڎرو پاوەی.
سەیید بەها جە جوابە نامە شېعریەکەشەنە پېسە عادەتی کەوتەن تاریفدای میرزا ئۆلقاڎری، بەڵام جیاواز جە نامە شېعریەکۍ میرزا ئۆلقاڎری، ئاڎ نەتاوانش بە تەرزێ ئەدەبی ناسک، شاکارێ پېسە شاکارەکەو میرزای خولقنۊ، دیارەن تەوانای شېعریەو بەهرەی شاعېرانەش هەر ئاڼە بېیەن.
سوڵتان سەر ئېڵ نازک خەیاڵان
مەتبوع مەجلیس گشت کەمەر لاڵان
وەحید زەمان تەنیا و شازەکە
شای شیرین‌کەلام شەکەر ڕازەکە
زەکا و دەرک و فام بۍ ئەندازەکە
دوربین تیژ ڕه و چالاک بازەکە
نە ڕوبع مەسکون بەرز ئاوازەکە
لوقمان بۍ ‌باک تیژ پەروازەکە
خەیاڵی خەیاڵ موریدش گەشتەن
مەزەی وەسف تۊش هەرگیز نەچەشتەن
عەقڵ مەر کەری عەقڵی کوڵ خەڵات
مەر ئاوەخت یاوۊ وە گەرد پاڵات
مەوقوف ئەسەر تەکلیفەن تەکلیف
قاسرەن زوان چېش کەرۊ تەعریف
قاڎر به و قاڎر هەرجا حازرەن
من وەبۍ قاڎر سەفام نادرەن
سپای فەراقت ئای وە فەرق تۊ
قەڵای هەستم کەرد وە خاک نەیکۊ
هەر ئەوسات نەوسات نەتۊی پاوەشار
مورغ دڵ وە دام تۊ بی گرفتار
تا وە حاڵ یادت هەر ها نە یادم
هەر به و ویرەوە ئیسەیچ هەر شادم
تا هەناو هەنی، هەنی ئیقرار بۊ
وەبۍ تۊ هەنی هەنی بېزار بۊ
زکر خەیر تۊم نە هەرجا کەردەن
بەرمەڵا و زایع ئیزهار بۍ پەردەن
خسووس جەی ‌دما جەی وەقت و زەمان
وانا بېم چەنی سەرکار و میرزان
میرزا میرزامەن شوکر پەی مەحموود
هەم پەی ئه و عەزیز حەبیب مەسعوود
بە‌هبەه جە ئاداب جە ڕەفتارشان
خاس خاس جە تەمکین جە گوفتارشان
شیرین عیبادەت وەش تەحریرشان
لەتیف لەتیفەی هەم تەقریرشان
وەش‌وەش چەنی خەت ڕېحان‌ بېزشان
هەی هەی جە ئەلفاز شەکەر ڕېزشان
ماشەڵڵا جە حەد خوردە ساڵشان
بەخ بەخ بە عەقڵ و هەم کەماڵشان
وە وە جە ڕەغبەت لای سەرکارشان
وەی وەی جە تەنزیم گیلای شارشان
ئۆف ئۆف جە ئامای لاشیخانشان
خەڵیفەی عومەر شای عوسمانشان
سەلیم و حەلیم شېخ ساحیب حاڵ
مەنبەعی فەیز و مەعدەنی کەماڵ
بەندە مەنزڵم شه و سوبح وشام
هەر ها نە خدمەت ئه و عالی مقام
برام جه و ساوە تەشریف میرزان
وە خەیرە مەقدەم وەی شارە ئامان
هەر شه و جە لاشان جەمڵەمان جەمەن
خەندە و مەزاقەن وەشی و هاودەمەن
خسووسەن یاوا تازە نامەکەت
کەلام لەتیف عەنبەر خامەکەت
وانیاوە میرزام پەرێ عەلی ‌وەیس
عەلی وەیس دڕی یەخەش وېنەی قەیس
ئاڵۆزی و توندی بۍ حەد فەراوان
کەردەنش میرزام هەرتا کە تاوان
نمەز چەنی تۊ مەجازش تڼدەن
یا خۊ هەر پاسە ئاڵەت نەقندەن
ئەڵبەت ئەی دەفعە کاغەز مەنویسی
هۊشت بۊ دەخیل پەی عەلی وەیسی
خزمەتیوتەرش لازمەن هەم بۊ
میرزایان واتەن تەقسیرت نەبۊ.[1]