شەوق شاڎیی نۊ...
دیمەنو ئاهەنگی، شاڎیی و زەماۋەڼۍ، چەم بازی و نیگابازی یارا، عیشوە و نازو نازارا، شەرارەی ئاییر دەروون زامڎاران، چفە و گوفتەی دڵداران، ئاوازو شیرینەو خانم و لەیلۍ لەیلۍ، دەسگېرتەی ڕوومەت کاڵا، لفەی سەر دەسماڵ، خفەی لیمۊی کاڵ، ڕەقس و سەمای نازەنین نازان، هەر مەگەر میرزا ئۆلقاڎر دەرەقەتو ئا گرد دیمەنە نەخشیا بێ، مەر دلۍ خەیاڵ و ئەندێشەی قووڵ و واچەدانو واچەکاشەنە ڕەسمو ئا گرد دیمەنا نەخشیۊ.
شەوق شاڎیی نۊ شەوق شاڎیی نۊ
بەنای کار خەیر شەوق شادی نۊ
هەوای نۊ عروس شۊخ عەنبەر بۊ
هانا هەزارجار موبارەکت بۊ
پای ئەو نۊ نەمام شای ۋناساران
خەیرە مەقدەم بۊ جە ڕۊزگاران
عەجەب شاڎیی و زەوق تۊ وە پا کەردی
عەجەب ئەساسێ وە هەم ئاوەردی
بەهبەه جەی شۊڕش، ڕۊح‌ ئەفزای خاسە
وەه وەه جەی شاڎیی شیرین ئەساسە
فەڵەک نەشېونۊ، ئەی بەزم تازە
ئەی بازار عەشق، ناز وەی ئەندازە
یاران هام‌سەران هەی دەردەداران
هەی گرۊی مەینەت خېڵ خەم‌باران
هەرکەس ئیرادەش نەزەر بازیەن
مەیلش وە مەیدان تیر ئەندازیەن
بەیان بۋینان بزانان ڕاسەن
یا خۊ من جە سام هۊشم هەراسەن
یا غەوغای مەحشەر هجووم عامەن
یا زەلزەلەی ڕووی یەومەلقیامەن
بەزمەن بساتەن توربەن ئاهەنگەن
ڕەقس ڕەقاسەن چەقانەی جەنگەن
واڎەی ئەحیای مەوت، مەردەی سەڎساڵەن
نۊشانۊش جام بادە و پیاڵەن
شەهدەن شەربەتەن شوربی شەرابەن
کەمانچەی موکەش زەوق ڕوبابەن
تەپڵەن دەهۊڵەن تەموورەن تارەن
سازەن قەرەنەی هەم موسیقارەن
شاڎیەن شەوقەن عەشقەن عوشاقەن
مەیلەن مەحبوبەن خەندەی مەزاقەن
گازەن دڵوازەن سازەن ئاوازەن
ڕەزای دەم‌سازەن نازەن نیازەن
عەیشەن عەشرەتەن کەیلەن دەماخەن
زەوقەن زیڼەتەن پڕکەن پەرداخەن
سەڎای زەل‌زەلەی شەدە لارانەن
سەیر سەرتاپای خاتردارانەن
قەتارەی قەیتول نازک ئەندامان
سەما و ڕەمای خاس جەمین چوون جامان
سۊزەی خۊش‌خانان خۊش ئەلحان گەرمەن
ناڵەی موتریبان بۍ پەروا و شەرمەن
جە سەڎای جەیران عالەم حەیرانەن
دو ئەبرۊی جەیران شاخ جەیرانەن
عشوە و کرشمەی شەیدای نازەنین
بەتاڵ کەرد بازار سەد خاقان چین
زومرەی خەوانین بزورگان یەکسەر
ئاشوفتەی سەنەم حەیران دولبەر
شای سەنەم سوورەت غەمزە و نازفرۊش
هوون دڵداران ئاوەردەن وە جۊش
قاپی هەدایەت ڕای نەجات بەستەن
عالەم گشت تەمام سەنەم پەرستەن
ڕیشمە و کریشمەی (زیبای) نازەنین
بەتاڵ کەرد بازار سەنەم‌خانەی چین
باقی بېگلەران لاقەید جە تانە
گرد مەست مەدهۊش مەیل مەیخانە
(خصوص) ئارەزووی مەجنوون دەماخان
لېوەی لاڵ لېو لەیلۍ پەڕ داخان
عەتر گوڵ عەرەق شیرین جەماڵان
شین ۋست وە یانەی کۊکەن خەیاڵان
دابۊی سەرسامان لاچۊی نەمامان
شەوبۊی شەمامان زوڕەی کەم‌فامان
شەرارەی ئاییر بوتەی وەفا و مەیل
ئیشارەی ئەبرۊی یاری مەوبەت کەیل
بن‌دەسی فرسەت چفە و چەم‌ بازی
واڎە دان وە لەیل ڕازی و ناڕازیی
ناڵەی زگاران زەدەی کۊسەڵ‌کۊس
قاعیدەی قەڎیم هەی شاباش دۊس
کاڵای بازاران باڵای نازاران
لاڵای دڵداران ناڵای ئەوکاران
کەمانچەی دڵگیر دوکانچەی عەبیر
دەوانچەی زەمیر قەوانچەی نەچیر
پەنجەی بیئەندېش لەنجەی چۊپی کېش
قنجەی دڵەی ڕېش ڕەنجەی شېوی وېش
دیای ڕەوېڵان خەمیای سەرخېڵان
زیای کامېلان جیای جاهېڵان
لفەی سەردەسماڵ خفەی لېمۆی کاڵ
قفەی سۊسەن‌خاڵ چفەی بېرەماڵ
ساقی مەی هەی دەر، باقی دەی بابەی
تاقی دنیای دوون (لایس الاحی)
نگای دیڎەی دۊس دیڎەی نیهانی
دڵ‌وەشی مابەین یاران گیانی
نومانای قوماش فتنەی هەزار ڕەنگ
واڵا ئاڵای خاس باڵای شوخ شەنگ
بۊی عەتر گەردەن شووشەی تەڵای تەڕ
برقە برقە تاس فەرق کڵاوزەڕ
هاڕەی لاچەناخ لا ڕشتەی یاران
خاستەر جە زېڵەی زەنگ زەواران
حەڵقەی حەیتەران دەستەی زوڵفی شۊڕ
سەر نە سای گەردەن ئاهوان تۊڕ
گرمەگرمەی جۊش لیتەی ڕەش‌بەڵەک
لارە و قەتارە ئیشارەی کەڵەک
تاسیای تەواسا تەواسای تاسا
سەرگۊشی و خەڵوەت هزم و هەناسا
نە تۊی تای کەتان لونگ بەغڎایی
یار وە ئیشارەی پەنجە حەنایی
هاژەی کڵاوزەڕ ئاڵای سەر وە هەم
خشەی مېخەک‌ بەند لە سەر سینە و مەم
شەقەی پەنجەی کەوش گېڵای بازی باز
خڕەی خرخاڵان فڕەی سەروەناز
خەندەی بېخەیاڵ چریکەی وە سۊز
پریکەی دولبەر پەردەی دەروون دۊز
ڕەقس و سەمای خاس نازەنین‌نازان
فەسڵ وەسڵ مەیل ئاواتەوازان
قورتاسە مەفتول شوراوە گوڵەنگ
گېسۊی سەر ئاوېز پاوانەی پا جەنگ
ئاخ و داخ دڵ دەروون ساڕېش
هەر کەس شاڎ بیەن چەنی یار وېش
سا ئەجەڵ بۊرۍ قەست ئەرام کەر
مازە بمانوو ئېشە و تا سەحەر
(قاڎر) چوون بازار بەزمش کەساسەن
پیرەن زەعیفەن پەی مەردەی خاسەن.[1]