میرزا ئۆلقاڎر، شین پەی ڕەفېقێ کۊچکەردەیش کەرۊن، کە پاسە دیارەن خەیلێن جیاش ئاستەن. فەسڵو وەهاری ئامان و میرزا دڵش تەڕ بېیەنۆ، ۋیرۍ ڕەفېقەکاش کەرۊن. میرزا شېعرەکېنە بەیتێ مارۊن پەی پیشاندای جوانی فەسڵو وەهاری، کە هینەو مەولەوینە:
سەوزە ۋستەن فەرش ئەو چەمەن دەس دەس
گوڵان جام وە دەس بولبولان سەر مەس.
هەرچن میرزا ئۆلقاڎر فرەو یاگانە بەیتە شېعرەکا مەولەوی مارۊۋە حزوور، بەڵام نامېش بەرۊن (دەک ڕەحمەت وەنەش مەعدوومی واتەن) ، کەچی چېگەنە ئیشارەتش نەڎان پەنە!
میرزا درېژەو شېعرەکېنە دیمەنو وەزعەو کەسە نزیکەکا ڕەفېقە کۊچ کەردەکەیش بەیان کەرۊن کە چەنی گرڎ تازیەبارېنۍ پەیش.
میرزام خەیلێوەن
میرزام خەیلێوەن دیارت نیەن
تەشریفی خەیرت یە ئەو کۊ شیەن
قەدەم ڕەنجەکەر ساتێ وەلامان
مەر تۊ نەزانات نۊ وەهار ئامان
سەوزە ۋستەن فەرش ئه و سارا دەس‌دەس
گوڵان جام وە دەس بوڵبوڵان سەرمەس
واڎەی سەفا و سەیر سەر دیارانەن
وەخت مەلاقات خاتردارانەن
شاە جەهاندار تەڵەبکارتەن
ئاغەی خاتر تەڕ ئینتزارتەن
گرد جەلای خاڵۊت جەرگەشان جەمەن
یەقین جەو بەزمە هەر تۊشان کەمەن
عالەم ئینتزار ئاما و لواتەن
حەبیب‌الله خان چەمەڕای ڕاتەن
یەقین جە دیوان مەخشووشەن کارش
وە تاراج مەشۊ جېخ و دەوارش
بکەرە تەدبیر جە ئمووراتش
وە (حسام‌الملک) بدەر نەجاتش
خۊ شەرەف‌الملک هەر ها جە ماڵت
وە سۊز مەپەرسۊ حاڵ و ئەحواڵت
دەم دەم مەکېشۊ لولەی ئاهی سەرد
مەرگ تۊ دیوان عالەم بەتاڵ کەرد
سەر هۊردار وەلای گڵ‌کۊی تازەوە
نگا کەر وەلای خانم نازەوە
بڎیە چۊن زەعیف پەشېو و زەردەن
دېق بېواڎەی مەرگ تۊ کەردەن
سەروەناز بېناز عەباس بېهۊشەن
خۊ میرزا مەحموود هەر بابەڕۊشەن
نە قووت نە قنیات نە شەو خاوشەن
چوون چەم کل کەران گلاراوشەن
خۊ عەبدلعەزیز پەی مەرگ مامۊش
قامەت قەڵاخەن بەڎەن سیاپۊش
لیباس قەتران بەرگە پۊشانەن
هەر سوب تا ئېوار ئاغەڕۆشانەن
هیچ ئاگا نیەن کەس جە دەرد کەس
برزوو دەروونش بیەن وە قەقنەس
ماچۊ ئەی برا بەڎحاڵەن حاڵم
پشتی شکستە ویرانەن ماڵەم
دمای تۊ کۍ بۊ وە هام نشینم
کۍ بە وېنەی تۊ بڎۊ تەسکینم
کۍ کەرۊ تەدبیر زامان سەختم
کۍ بۊ هاونشین وەخت و بېوەختم
ئەر کەشەن ئەر کاو ئەر دەشتەن ئەر کۊن
یەکسەر جە دیڎەم نەقش شېوەی تۊن
ئەو هەر کۊ مەڎیۊ کاکە هەر تۊنی
بنمانە باڵات توخوڎا جە کۊنی
وەی وەی جە قرچەی زامانم کاکە
هەر زووخەن سەر تا دامانم کاکە
قاڵاو کەردەنش قەڵاخی کاکە
بوڵبوڵ تەرکش کەرد گوڵباخی کاکە
جە داخت دەردم دېویان کاکە
ئەساسەی شاڎییم شېویان کاکە
هەتا گیان جە تەن جیا بۊ کاکە
تەرک لەزایېز دنیا بۊ کاکە
کۊچ تەر کۊچیت فەرامۊش کەردەن
تەشریف خەیرت یە ئەو کۊ بەردەن
هامسایی یانەی حاجی زەروورەن
نزا وە مەنزڵ عەبدلغەفوورەن.[1]