بنەما بنەڕەتیەکۍ ڕاوڕەچەو یارسانی
بەشۊ هەشتەمۍ
سەرئەسپارای:
پېوەڼیی بەستەی مېیانو کەسێ جە یارسانەکا چەنی دوۍ پېشەوا ئایینیا یارسانی، پېوەڼیێ دوە لقەن، لقێش بە (پیر) و ئەویتەرشان بە (دەلیلەن) ، پەی نموونەی خودو (سان سەهاک) ی پیرەکەش (بنیامین- پیرخڎرو شاهوی) و دەلیلەکەش (داۋڎ) بییەن، ڕاوڕەسمو سەرئەسپاراینە ئی چېوۍ ئاماڎۍ کریان:
کەڵەشېرێ پا شەرتۍ تەمەنش جە شش مانگا کەمتەر نەبۊ، چەنی نیم مەڼ برنجی و چارەکێ ڕوۋەنو ئاژەڵی بە نییەتو (سان سەهاکی) ، تاکە ۋەزێ بە نیەتو (پیر بنیامینی) ، دوۍ جامڵۍ گۆرۍ ئاۋی بە نیەتو (ئاۋەو کەوسەری) ، چراۋێ بە نیەتو (داۋڎی) ، کاردێ بە نیەتو (مسەفا دەودانی) ، شیرینی بە نیەتو (شائیبراهیمی) ، سکۍ بە نیەتو (سەی محەمەڎو گۆرە سواری) .
کەڵەشېر و برنجەکە ئاماڎۍ کریان، جامخانەنە پیر و دەلیلیچ ئاماڎۍ بان و سەرئەسپارای بەجاماریۊ، ئیتر دمای سەرئەسپارای ژەن و ژەنۋازی مېیانو سەرئەسپارەکەی و پیر و دەلیلەکەینە نمەمەنۊ، چونکم پېسە کوڕو وېشان تەماشەش کەران، سروودەو ژمارە چوارو پاڕەوەکا باس جە سەرئەسپارایەن، ئینەیچ چن دېڕێش:
گاڤێ بۍ گاڤان بۍ گاڤان گاڤێ
تا سەر نەسپارین کەردە ڤەلاڤێ
هەر سەرێ نە لەوح ئەو حوچوری جەم
نە سوجدە ڤە دەست خەلیفە خادم
بۍ شک ئا سەرە ڤە تۊمار نېیەن
نە ڕوزی حیساب ڤە شومار نېیەن
تومار پیر موسی قەڵەم باقییەن
جەم چلانە بنیام ساقییەن
ڕەهبەر داڤدەن دەسی دامانگیر
تەگبیرچی باگن بنیامیینی پیر
جەم نە دلۍ جەوز، جەوز نە دلۍ جەم
نیازش زات بۍ، چهار کەس دەرهەم.[1]