نەوەکان:

ئاشکەران باخەکۍ هۆرامانی زەمینشا سەخت و ڕشتەن، ئینێ قەڎپاڵو کەشەکاوە یان دلۍ دۊڵەکانە، پەوکەی ئا زەمینۍ پېویسشا بە وەشکەردەیەن پەی ئانەی کریان بە باخ، کردارو (هۊرکەندەی و خاس کەردەی و تەخت کەردەی) ئا زەمینا هۆرامیەکۍ پەنەش ماچان(نەوەکان).
کارو نەوەکان کەردەی فرە قورس و گرانەن، لاشێوە ساغ و بەهېزش گەرەکەن، وەختو نەوەکان کەردەینە پېویسەن ئا زەمینە کریۊن بە باخ بە قووڵایی(1-1،5م) هۊرکەنیۊ، هەرچی تەوەنیش چەنەنۍ بەربەیاو بکریا بە کەڵەکە پەی وەشکەردەی تەڵانۍ، بەعزە جارێ ئا زەمینە خوڵەش کەمەنە، مەشۊم جە یاگێ تەر خوڵەش پەی باران، وەختو نەوەکان کەردەینە ئا تەوەنۍ کە زلېنۍ بە نۋېڵ بەرمەیانو بە پیک مەڕیان پەی کەلەکۍ، دماتەر پەیینش کەرانەو (کووزە، قەڵوەز، ئاژین)شا چەنە وەشکەران، نەمامېش چەنە منیا، زەمینو نەوەکان کریای خاستەرین زەمینەن پەی نیای چن شەتڵێ پېسە (تەماتە، بامیە، باینجانی، بیبەر، پیازی، سېفی، شەلەمی، سڵق، سۆزەوات)، ئا باخۍ کە تەمەنشان کۊنەن، فرەو جاری نەوەکان مەکریاوە، پەی تازە کەردەیۆشان.[1]