ناونیشان: گۆڕان دەتوانێ لە پارتی فێربێ
نووسەر: #هێمن عەبدوڵڵا#
ڕۆژی دەرچوون: #02-09-2019#
لەم مانگەدا گۆڕان هەڵبژاردن بۆ سەرکردایەتییەکەی دەکات. ئەمە دووەمجارە لە پاش کۆچی دامەزرێنەر و یەکەمین ڕێکخەری گشتییەوە هەڵبژاردن بکات. کەچی لە هەمان ماوەدا و بۆ دەمێکی درێژتریشە یەکێتی ناتوانێ کۆنگرە ببەستێ و لە سەردەمی ڕاگوزەری پۆست غیابی تاڵەبانییەوە بپەڕێتەوە سەردەمی پۆست تاڵەبانی. لەگەڵ ئەوەشدا گۆڕان ئاڵنگاریی لەپێشن و مەترسیی جدیی لەسەرن.
پێشبینی دەکرێت و دڵنیاییش هەیە کە ڕێکخەری گشتیی گۆڕان هەڵببژێردرێتەوە. ئەمەش واتە درێژەدان بەو سیاسەتە نەرم و پشوودرێژانەیەی لە قۆناخی پۆست #نەوشیروان مستەفا#دا ئەو حیزبە لەسەری ڕۆیشت و ئەنجامەکەی بەشداریکردنی بوو لە حوکمڕانیدا.
ئەمەش درووست ئەو شتەیە کە بەشێکی دیاری جەماوەری ڕانەهێنراوی گۆڕانی بەو خیتابە کەمتر تووڕە و تووندە نیگەران کردووە. بەڵام ئەو هەڵبژاردنەوەیە بەو مانایەشە کە لە پشت عومەری سەید عەلییەوە دوو گەنجی خوێندەوار لەڕووی سیاسییەوە (واتە چیا و نما) لە ساڵانی داهاتوودا بڕیارسازانی گۆڕان دەمێنن، ئەوان وایانکرد لەدوای مەرگی باوکیانەوە بزووتنەوەکەیان بەدەردی یەکێتی نەچێت.
زۆرجار گوێم لە جەماوەری گۆڕان دەبێت کە دەڵێن ئەم جارە بزووتنەوەکەیان دەنگی جاری ڕابردووشی پێ نایەتەوە. ئەمەش زۆر هۆکاری هەیە کە تەنیا یەکێکیان دوورکەوتنەوەی گۆڕانە لە خیتابی ئەنتی پارتی و بارزانی. هۆیەکانی دیکەی ئەوەیە کە گۆڕانی پاش نەوشیروان مستەفا دوو پێکهێنەری گرنگی گۆڕانی سەردەمی نەوشیروان مستەفای تێدا لاواز بووە، ئەوانیش بریتین لە یەکەم: نەبوونی سەرکردەیەکی کاریزمی لە واجیهەی بزووتنەوەکەدا و دووەمیش کەمبوونەوەی دەرکەوتنی گەنج، هەم لەنێوەوەی گۆڕاندا و هەم وەک نوێنەری گۆڕانیش لە شانۆی سیاسیدا.
دەرکەوتنی نەوەی نوێ لەسەر حیسابی گۆڕان و بردنی دەنگەکانی، هەردوو پەیامەکەی بۆ ئەو حیزبە لەلایەن دەنگدەرانی جا#رانیە#وە تێدابوو. چونکە شاسوار عەبدولواحید هێندەی زمانە ڕادیکاڵەکەی ڕووی لە یەکێتی و حوکمڕانیی #سلێمانی#یە و باسی هەڵواسینی دەکردن، بە چارەکی ئەوە خیتابی دژایەتیی پارتی نەبووە. ئەوەش سەلماندی کە دەنگدەری زۆنی ڕەنگاوڕەنگ هەرچییەک دژەپارتی نەبێ بە چاکی نازانێ. هەروەها سەلماندیشی، ناکرێ نەوەی نوێ لەلایەن کەسانێکەوە نوێنەرایەتی بکرێت کە ناچنە نێو نەوەی نوێ و نازانن چییاندەوێ.
ئەو کەسانەی کە بەرپرسیارییەتیی گۆڕانیان ھەڵگرت، لەدوای کۆچی دوایی ڕێکخەری گشتی و ئەو شکستەی لە ھەردوو ھەڵبژاردنی پەڕڵەمانی کوردستان و ئێراقدا تووشیان بوو، ڕایان وایە بەشێک لەو سەرکردانەی گۆڕان کاتێک نەوشیروان مستەفاش مابوو، ھۆکاری ناسەقامگیریی نێو گۆڕان بوون. دەشڵێن ئەو سەرکردانە مەرگی ئەویان بە فرسەت زانی بۆ شکاندنی بزووتنەوەکە و ئەو کولتوورەی نێو یەکێتییان ھێنایە نێو گۆڕانیش، بەوەی کە هەرکەسێک هەوڵبدات لەجیاتی ئیشکردن بۆ بەهێزکردنی بزووتنەوەکە، پلە و پۆستی ھەستیاری لەلابێت. ئەوان دەڵێن ئەو سەرکردانە (کە سەرکردەی پێشووی یەکێتیش بوون) تەکەتول و بێ ھیواکردنی گۆڕانخوازانیان لە ژووری بەرپرسەکانەوە گەیاندە نێو ماڵی ھەوادارانی گۆڕانیش. بۆیەش دەڵێن، سەرەڕای تەزویری ڕێکخراو، ئەو کەسانە ھۆکاری سەرەکیی شکستەکان بوون و ھەزاران گەنج ھەبووە ھەر گۆڕان بووە، بەڵام نەچووە بۆ دەنگدان. وەک یەکێک لەو سەرکردانە بۆی باسکردم، کاتێک لەکاتی هەڵبژاردنەکاندا هێرشکرایە سەر گردی زەرگەتە، بەدەیان کەس و بەتایبەتیش گەنجان هاتبوون داکۆکی لە گردەکە بکەن، بەڵام پەنجەیان مۆر نەبوو، دەنگیان بە گۆڕان نەدابوو.
بۆیە کاتێک سەرکردایەتیی گۆڕان هەڵدەبژێردرێ و ئەو کەسانەی تێدانامێنن کە بە هۆکاری لاوازبوونی بزووتنەوەکە دەزانران، دەنگدەرانی جاران و ئێستای بزووتنەوەکە چاوەڕوانییان گەورەتر دەبێ و بەتایبەتیش هەردوو کوڕەکەی نەوشیروان مستەفا (کە بەکردەوە بڕیاردەر و ڕێکخەری گۆڕانن) لە بەردەم تاقیکردنەوەی زۆر سەختدا دەبن و دەبێ بیسەلمێنن کە ئەوان گۆڕانیان لە شکستێکەوە نەبردووەتە نێو شکستێکی دیکە.
یەکێتی و حیزبە ئیسلامییەکانیش بەتەمان وەک گۆڕان، بەڵام بە بەستنی کۆنگرە هەڵبژاردن بۆ سەرکردایەتییان بکەن. لەنێو زۆربەشیاندا هەستدەکرێ پەیامەکەی دەنگدەر بۆ هەبوونی سەرکردەیەکی کاریزماتیک وەک واجیهە و بایەخدان بە گەنج و خەمی نەوەی نوێ گوێی لێناگیرێ یان هێشتا نەگەیشتووە. ئەنجامی ئەمەش لە هەڵبژاردنی داهاتوودا بە نەرێنی بەسەر ئەو حیزبانەدا دەشکێتەوە.
لەو نێوانەدا، پارتی بە هەموو کەموکووڕییە زانراو و نەزانراوەکانییەوە، لە هەموو حیزبەکانی دیکە مونەزەمتر و بەئاگاتر لەو پەیام و گۆڕانکارییانە دەردەکەوێ. چونکە دەنگدەرەکەی ڕێبەرێکی کاریزمیی هەیە و سەرۆکی هەرێمێکی کراوە و گەنجدۆستی هەڵبژاردووە و سەرۆکی حکومەتێکی خوێندەوار و ئاگاداریشی هەیە. لەو گۆڕانکارییانەی لەنێو حیزبەکەی و حوکمڕانیشدا دەیکات، بەردەوام گەنج و دەموچاوی نوێ دێنە پێش. پێم وایە لەوەدا یەکێتی ناتوانێ و تەبیعەتی ململانێکانی ناویشی وان کە نەتوانێ، بەڵام گۆڕان دەتوانێ زۆر لە پارتی فێربێ.
[1]