پردۆ مەڵڵای
نویستەی: فەیروز فەرەجی
پردە مەڵڵای ئانا بەینوو دەگاو ناوێ و ئەسپەرېزیەنە، ئی پردۍ هۆرامانو لهونی و ژاوەروی پېوەن مڎۊ یۊیەو.
وەش کەردەی ئی پردۍ حکیەتێوی وەشش هەن.
پاسە گېڵناوە جە دەگاو ئەسپەرېزیەنە مەڵڵایو بېیەن کە ژیوایش بە خوڎا ئەشناسی و عالی دان سەر.، ئی مەڵڵا ئۊجاخ کۊر بېیەن، دماو جوانیش هەکە ڕەنگۆ پیریش منیشۊ وەنە و هېز و هازش نمەمەنو، گنۊ دلێ خېیاڵا.
شەوېوە جە شەوەکاو زمسانی، چەنی مەڵڵا ژەنۍ پاڵو سوبەی دارینېیەنە منیشارەو کز کەرا و گنا دەردە دڵ کەردەی و ویروو وېیەردەی.
مەڵڵا ڕوە کەرۊ مەڵڵاژەنۍ و ماچۊ:
ژەنەکۍ ئانا پیرۍ بېیەیمۍ و دنیا تەمامیا و وەختۊ مەردەیچمانە. نە کوڕېوما بی کەڵکوو خەڵکی گېرۊ و نە کناچېوە کە یانەی هاڵیەنە ساچۊ.
بەڎ بەتەرینە ئانېنە خەیر و خەیراتێوما نەکەرد٘ەن، مادام پاسەنە بەهەشتیچما نەبەردەن.
مەڵڵا و مەڵڵا ژەنی خاس مزانا کە ئاما و لوای خەڵکو ژاوەرۊی پەی گەنم ئاوردەی و ڕزقی ڕوەو هۆرامانو لهونی جە سەرو ڕۊخانەینە چن سەخڵەتا. پی بۊنەو گنا ویروو وەش کەردەی پردێ.
مەڵڵا ماچۊ: ژەنەکۍ بە عەونوو خوڎای پردېوە وەشەکەروو کە تاکو دنیا دنیان نامېما مەنۊوە و تاریخ جە کوڕو کناچەی فرەتەر نامېما وەنۊوە !!
مەڵڵا پردی وەشە کەرۊ، فرەو وەرپەنگا لابەرۊ.
ئیسە ئی پردۍ مەشهوورەنە بە پردەو مەڵڵای.
بەڵام داخەکېم ئاوبەڼو داریانی پردۆ مەڵڵایش کېشاوە و نامۊ مەڵڵایش کوشناوە.
بەڵام دڵوەشی ئانا چاگە، هەکە پردێ نەمەنۊ، نامۍ عالە تاکو دنیا دنیان هەر مەنۊ.
شېخی سەعدی شاعېری وەش کەلام بە یاگێ فەرماوانش:
کەسېو وەش ناما، مەرد٘ەش مەواچا
مەرڎە ئانەن کە، خاسەش نەواچا.[1]