یاگە پیروزەکۍ لاو یارسانەکاوە:

چن یاگێ جە لاو یارسانەکاوە پیروزېنۍ و خاکسان موبارەکەن، چوونکم گۊڕەو پیرەکا یارسنایشا چەنەنە:
دەگاو (پەردیوەر) ی: چوونکم گۊڕەو (سان سەهاکی بەرزنجی) ش چەنەنە، ئڼە پیروزەنە بیېنە بەقیبلېشا و ڕووش مەکارانە.
شارە دەگاو (تەوېڵۍ) : مەزارو (باوا سەرهەنگی دەودانی) ش چەنەنە.
دەگاو (دزاوەر) ی: جە هۆرامانو لهونی، گۊڕەو (شېخ شەهابەدینو دزاوەر) یش چەنەنە، ئی زاتە ئا کەسەنە کە کناچۍ وېش دێنە بە (بابا مەردوخ_ پیر محەمەڎی هۆرامی) ، چا وەختەنە پیر محەمەد تەمەنش (98) ساڵۍ بېیەن، تاکو تەمەنو (110) ساڵی نەتاوانش هەرمانەی شەرعییە چەنی هامسەرەکېش کەرۊن، بە سودفە ڕوێ سەرەتاو هامنی پېوەرە لوێنۍ پەی دلۍ باخی، چاگە هەرمانەی شەرعییەش چەنی هامسەرېش کەردېنە، ئیتر کۊچی دمایینش کەردەن، هامسەرەکېچش دمای ماوێ دوەگېیانە بیېنەو کوڕېش بېیەن بە نامۍ (مەولا گوشایش) ی.
دەگاو (هاوار) ی: یاگی هانا پەی بەردەی یارسانەکا بېیەن، بە فەرمانو سان سەهاکی یۊ جە حەوتەن بە نامۍ (داودی ڕەهبەر) ی کېیانیان پەی ئاگەی، چی دوە شېعرەنە ئامان:
داود ئۆ هاوار داود ئۆ هاوار
داود حەواڵەن بلۊ ئۆ هاوار
ڕاگەی دەریای نیل میرە باش تجار
نە ڕای گڵېم کۊڵ بارۊ وە قەتار.

کەشو (شنروۍ) : خاتو جەلالێ ئەڎاو شاخوشێنی (موبارەک شای) جە شنروێ چەمش بە (کاکە ڕەیا) ی کۆتەن، کاکە ڕەیا کە جە پېشوازی جە ئەڎابېیەو (شاخوشێن) ی بېیەن، مژدەش پەنەدان گوایا بە ڕابەرێ ئایینی گۆرەیۆ دوەگېیانەنە، پېسە چی دوە دېڕە شېعرېنە ئامان:
جە ملەگاهێ سەرەم بەرد ئەو دیار
دیم گەورە کناچۍ مەنەن جە هەوار
چەمش یەکێوەن ئەسرینش هەزار
بارش خالقەن، گاو نە میر و بار.
دەگاو (شېخان) ی: نزیک دەگاو (دەودان) ی.
(جاور) : گۊڕەو کاکەو جاوریش چەنەنە.
(چادرگە) : ماوای هامنەو (سان سەهاکی بەرزنج) ی بېیەن، چی شېعرېنە ئامان:
عەزمم سەیوانا بە سەیر و سەوۍ
غوڵامان بیروۍ ڕاگە سەر هەوۍ
وەرگېردۍ چادر حەفتا و دوو دوۍ
پەی سەرکەل و شندروېم ڕەوۍ.
(سەرگەتە) : یاگۍ ژیوای (باواناوس، قازی نەبی سەرگەتی، دایە خەزانی سەرگەتی) بیېنە.
فرەو ڕابەرە دینیەکاشا جە هۆرامان ژیوێنۍ، پېسە
(بالوولی ماهی، باوا سەرهەنگی دەودانی، باوا ناوسی سەرگەتی، سان سەهاکی بەرزنجی) [1].