کڵاو لە ئیدیۆمی کوردەوارییدا
کڵاو، شتێکی خڕیلەی گردیلەیە، لە پەڕۆ و دەزوو و کڵافە و بەن‌ و لوا و خوری و حەسیر درووست دەکرێت، دەخرێتە سەر سەر و پێچەی لەسەر دەبەسترێت، بە گوێرەی کەلتووری گەلان بایەخی پێدراوە لە مەراسیم و بۆنە و یادەکاندا نمایش و لەسەر دەکرێت، لەکوردەوارییدا چەند ئیدیۆمێکی لەسەر هەیە وەکوو: ئەگەر کەسێک لەبارودۆخێکی نەخوازراودا خۆی بپارێزێت و نەیەوێت تێکەڵی کێشە و گیروگرفت بێت وتراوە: (کڵاوی خۆی گرتووە با نەیبات) چونکە لە کاتی هەڵکردنی با و زریان و ڕەشەبا و تۆفان و گەردەڵول و گێژەڵوولکە ئەگەر دەست بەکڵاوەوە نەگیرێت با دەیبات.
وتراویشە (بەدوای کڵاوی بابردوو مەکەوە) کاتێک کڵاو با بیبات زۆر دوور فڕێی دەدات و ڕەنگە بۆ جێگایەکی دوور دوور بیگوێزێتەوە و هەر نەش بینرێتەوە، ئەوە بووە بە ئیدیۆم و بۆ کارێکی لەدەست دەرچوو و تێپەڕ بوو دەوترێت: بەدوای کڵاوی بابردوو مەکەوە، بۆ گەوجاندن و هەڵخەتاندن و فریوودانی کەسێک دەوترێت: کڵاوی لەسەرنا، بۆ کەسێکی کلاوچی و فێڵباز و ساختەچی دەوترێت: کڵاو لەسەری خەڵکی دەنێت‌، لەلایەکیتریشەوە وتراوە: کڵاوی بۆ دوورییە، واتا خەواندویەتی بە فرت و فێڵ لەو نێوەندەشدا چ کارێکی ویستووە کردویەتی، ئەم کڵاو بۆ دوورینە بووە بە ئیدیۆمێکی گاڵتەپێکردن چونکە لە کوردەوارییدا ئەگەر کەسێک مێوانی ماڵێک بووایە، خاوەن ماڵ و خانەخوێ شە و لەگەڵ خێزانی خۆی جووت بوایە بۆ بەیانی دەوترا: کڵاوی بۆ مێوانەکە دوورییه، کڵاو لە ڕێنوێنی و ڕێنماییدا بە شێوەی ئیدیۆم بەکارهاتووە وەکوو:‌ خودا کڵاوی بۆ بەڕووی کردووە، واتە: خودا ئاگای لە هەمووانە و بەندەکانی خۆی خۆش دەوێت و کارئاسانیان بۆ دەکات و دەیانپارێزێت، بۆ دڵدانەوە و هێورکردنەوەی خەم و خەفتی کەسێک وتراوە: خەمێ مەخۆ تا سبەینێ هەزار سەر بێ کڵاو دەمێنێتەوە، واتە: هەندێک کەس لە ملیان دەدرێت یان دەکوژرێن یان دەمرن، ئەو ئیدیۆمەش گوزارشتە بۆ گۆڕانکاری خێرای ڕۆژگار و زەمانە.[1]