عېوەزاو دڵسۊزی و پېوەرەژیوای هۆرامیەکا، فەرەنجی و کڵاش دزییەیشا بۍ
نویستەی: #جیهاد هەورامی#
بەڵۍ پەی ماڕای فکرەو فاشیزمی دژو کەلتور و زمان و فەرهەنگو هۆرامانی
ئېمەی هۆرامی هەر بنەڕەتەنە و وییەردەنە ئەرەنیشتەو یاگێ وېما بییێنمێ و نەبېیېنمۍ هۆکارو شێونای زمان و کەلتور و دیمۆگرافیای هیچ یاگێوە
هەر جە وییەردەیچەنە هۆرامان یاگێ مەنزڵ و پەناگاو گردو شۆڕشەکاو کوردی و تەنانەت کەسایەتی قارەمان و شۆڕشگېڕ و سیاسەتمەداری هۆرامی بەشدار بېیەن چا گردو شۆڕشا
هۆرامان تایبەتمەندی وېش هەر جە وییەردەنە بېیەن و پارێزنانش و بەردەوامیچا سەرو پارێزنایش هەر جە زمان و کەلتور و ڕۊشنویری و ژیوگە و جوگرافیای تایبەت بە وېش
جیا چی تایبەتمەندیا تاوانش پا کەلتور و ڕۊشنویری و تایبەتمەندیا وېش گەورەترین خزمەت بە چواردەوریش کەرۊ و تاوەکو ئی ساتەیچە بە بەردەوامی بە ئاشتی وازی و پێوەرەژیوای چەنی گرد قەوم و ئایین و نەتەوێ جیاواز ژیوان و مسقاڵە زەڕڕێوە گرفت و خراپەش نەبېیەن پەی کەسی
ئیسە پەرسمێ ئایا چی مەبۊ ئا کەلتور و فەرهەنگەشە بەشێوێ سەردەمیانە و یاگە گردینەکانە نیشانەو گەشتیار و سەرداکەرا ناوچەکاو هۆرامانی بذۆ؟
ئا وەختەی کە قەرار بۍ هۆرامان تەلەفزیۆنێ تایبەت بە وېش مەرزنۆرە بەنامی کەناڵو ژیوای، وەڵامو دەزگا هەرە باڵاکەو حکومەتو هەرۍمی ئانە بۍ کە ئی بابەتە مەترسیش پەی ئەمنو قەومی هەن و هۆرامییەکێ گەرەکشانە داواو سەربەوێ خاک و زمانیشا کەرا جە پانیشتو کوردستانی.
جە ئیسەیچەنە ئی بابەتەو فەرەنجی و کڵاشەیە هەمان زادوو فکرە و ویروڕایەنە کە ئەجۊشانە هۆرامییەکێ گەرەکشانە هەنگامە پەی سەربەوێ خاکەکەشېیا کەرا و وېشا جیا کەراوە جە پانیشتو کوردستانی
بە دزییەو ڕاگیری کەردەی جە نیارەو فەرەنجی و کڵاش هیچ جە ئەقڵیەتو هۆرامی مەفارۆ سەبارەت بە پارێزنای کەلتور و زمان و فەرهەنگەکەیش و بەعەکسۆ تەماشە کەردێ گرد تاکێ هۆرامی بە نیارەو ڕەسمو وېش بە جلی وېمانە و فەرەنجی پۊش بنەڕەت و ڕەچەڵەکو وېش پارێزنۆ
ئېمەی هۆرامی هەرگیز نە دژمنو کەسێنمێ و نە هجوم سەرو هیچ لایەنێ کەرمۍ بە بەهانەو هیچ بابەتێ نەخوازراوی، جا پاسە خاستەرا ئا فکرە فاشیزمە دەس بازۆ جە دژایەتی کەردەی کەلتور و فەرهەنگ و زوانی هۆرامی.[1]