عەشقو وەڵاتی
نویستەی: #فەرزین هەورامی#
دەردەو ئەرەبڕیای جە وەڵاتی، دەردېوەی گرانەنە کە ئانە بەتەنیا ئێحساسو ئینسانەکان کە متاوۆ بوانۊشۆ.چېوێ کە ئاشکران ، بەیان و ئیحساس هەرگیز نمەتاوی سەرو یەک هێڵیەرە هۆرسەنگنایشا پەی کەری.
ئینسانی غەریب، تاکێوی مانیاو تەژنەن، کە حەز کەرۊ تاکو ئا ڕوە مازاشەرە قەبرە، گردجارێو تەژناییکەیش پاڵو ئا هانەینە کوشنۆوە، کە ڕوێو جە ڕوا جە وەڵاتەکەو وېشەنە ئاویش چەنە واردەنۆ.
دیارا ئیتر پەی من تەماشەو گردو ولە زەریفەکاو، پارکەکاو، بەحرەکاو ئۆروپای ڕەنگا ئنڎە زیارەتو دوبارەو ئا کوچەڵەبەسیەو قەڎو وەنەکێو لانسارېوو هۆرامانی تامش نەبۊ! چی؟ۋەرو ئانەیە ئا کوچەڵەو ئا وەنۍ زیندۆکەرۍو، هۆرگیرێو چڼەها داستانێو، ویرەوەریێ وېیەردەیمەنۍ.
بەڵام داخەکێم مادەکەو ئێگەی چېوی چامنەش نېیا چەنە، تاکو بتاوۆ هامڕازو ڕۊحیمبۊ.
بەهەمان شێوە ڕەنگا زاوڵەکەو منیچ کە چېگە گۆرەبۊ، جە دما ڕۊنە سوڕێوەو چەرخ و فەلەکەکەو پارکەکەو لیسەبەری صەد ئنڎەو کوچەڵەبەسەو هۆرامانیو، کەشوکۆوەکەیش لاشۆ وەشتەربۊ. ئینە تەبێعەتو ئینسانیاو، پەروەردەو گۆرەبېیەی دۆرانو زاڕوڵەیی، نەوجەوانی، جەوانیش چکۆ بیەبۆ، ئا پەروەرڎە تاکو ئا ڕوە کە هەن تۆشەبەرېوەنە ئینا کۊڵێشۆ، چەنی گردو کایەکاو ژیوایش ئیناش چەنیو، هازیش پەنە بەخشۆ.
سەرو ئی ئەساسیە، منی ئەرەبڕیا جە ئاو و خاکیم، ڕۊو، ساڵەو، سەعاتە نېیەنە سوەو وەڵاتی نەڎۆ سەرەمەرەو، ئارەزو دیداری دوەبارەیش نەکەروۆ.
ئیساڵ تۆزێو جیاوازتەر جە ساڵا، دەسو ژەنو زاوڵەیم گېرت و بە ئۆتۆمبێل لوایمۍ، لوایمێ تاکو بە کەشتی جە سۆئێدۆ پڕایمێوە ئۆڎەس ئۆ پۆڵۆنیا (لهستان) . چاگۆ بەرشېیەیمۍ ڕوەو سلۆواکی، دماتەر، هەنگاریاو (مجارستان) ٫سێربېیا (صربستان) ، بولگاریا (بلغارستان) و تورکیاما بڕی تاکو ئاخرجار یاوایمۍ هەرېموکوردستانیو، هەڵەبجەو، هۆرامان.
دڵ و دەرونمان هەمدیسان ڕۊشن بیۆ، بە دیدارو ئازیزاو، بە کەش و کۆو کەمەرو، هاناوەکاو کوردستانیو، هۆرامانی. سەفەرەکە پەڕبێ جە ویرەوەریێو، تەجرۆبێ تازێ پەی وېمو پەی ژەن و زاروڵەی. کەلتورێ جۊراوجۊرێو، وەڵاتۍ جۊراوجۊرێو، ژیوگۍ جیاوازێما دیۍ. هەروەڵاتێو پەی پەێش پەیامېوی جیاوازو، سیگناڵێوە جیاوازەما پەنە بەخشۍ. هەمیشە واتەنمو دوەبارەیچش کەروە کە ماسمێدیاو ئۆروپای هۆڵ مڎۆ بەدایېم وێنایێوی سېیاو و، پەڕکېشمەکېشو، وېران و ئاڵۆز جە وەڵاتەکاو بەرو ئۆروپای نیشانە بدۆ، تاکو بەڵکوم پاجۊرە هاموەڵاتیەکېش قەناعەتش پەنە کەرا، تاکو مرکیارەو، قانعۍ باو، هەرچی سەرەرە پەنەشا تەڵقینە کریۆ ئیمانش پەنە بارا.بەڵام جە ڕاسیەنە کە ملیەنە دلۍ وەڵاتە غەیری ئۆروپیەکا بڕېو دیمێتەری زەریفۍ جە ژیوای، جە پێوەرەبېیەی، جە ئنسانیەتیو، جە ڕەهابېیەی جە قاڵبدریای سیستەمی سەرمایەداری وینی، کە چېگەنە جە ئۆروپانە ئەسڵەن وجوودش نیا. ئەڵبەتە دیمۍ ئاڵۆزێچ هەنێ، بەڵام نەک پاشێوە کە میدیاو ئۆروپای بەرچەسپێ ناڕەوێ لکنو وەڵاتارە.
بەنسبەت هەرېمو کوردستانیچۆ دیسان هەمان بەزما، بەڵکوم چانەی خرابتەر میدیای بێسەروبەرو، فرە صاحیب و بۍ خەت و نیشان و هەرېمیا، کە دایێم وێنایێوی سېیاو و، تاریک و ئاورای مەردە جە هەرېمی نیشانە مڎۆ، جە حاڵێوەنە کە واقێع پاسە نیا. من پاساوێ پەی دەسڵاتدارا نماروۆ، بەڵام جە هەرېمەنە ئاوەڎانیم دی، ڕەفاهیاتم دی، وەشگوزەرانیم دی، بەڵام مخابن خەڵکی سپاسگوزارو قانعم کەم دی.جیاوازی زیاڎجەدی ئابوری پاسەش کەردەن، ئانەیج کە ئیمکاناتێوش هەن و یانەو، مەنزڵ و ئۆتۆمبێل و باغ و مەزرەعەو، وەختی ئازادش هەن هەمدیسان وېش بە مەقدورو زۆڵم وەنە شیە مزانۆ، جە حاڵێوەنە کریۆ پاسە فکر نەکەرۊوە.
چی سەفەرەنە یەک دۆنیا، مۆحێبەت و گۆرەییو، میمانداریما جە قۆم و دۆست و ئاشنایو، غەیری ئاشنای هۆرگېرت. بڕێێو گلەیچما ئامئ پا کە نەتاواما گردو قۆماو و عەشرەتی دیدار کەرمۍ. مشۊم بە گۆرەیی وېشا بەخشاما.
ئۆمێد کەرمۍ وەڵاتما ساڵ بەساڵ ئاوەڎانتەربۊ.
سپاس پەی گرد ئا ئازیزا کە چەنی ئەزیەتەکاما بیۍ.[1]