لاچەمێو پەی بەرنامەو شاڎیانەو زاڕۊڵەکاو هۆرامانی

دماو چن ساڵا دوورکەوتەی جە بەرنامە فەرهەنگیەکاو هۆرامانی، خوڵکنامۍو جە لاو دەسەو بەڕاوبەڕاو باخچەو گوراڵا یاوا دەسم ، هەرمانە پەی زاڕۆڵەکاو ئەوپەڕوو هەرمانێن ، کرژ و ئازا کەوتانی ڕا.
یاگێ گلێرەوبېیەی شاروو سنەی، پەشتەو پارکوو ئای تی، یانەو هۆمێڎوو یانە نشینا بۍ و وەختێو ئەرک و زەحمەتوو باخچەو گوراڵاو تایبەت خاتوو کەژاڵ بیگلەری و دەسەو بەڕاوبەڕاو ئەنجومەن و یانەو مامۊسا بېسارانیم چەم پنە کەوت، دڵم گەش بیەو و ئەرەجیێم گردو دنیایشا دان پنەم .
ئامای ئەڎا و تاتەکاو زاڕۆڵەکا کە جە گردو بەشەکاو هۆرامانی (تەخت، لهۆن، ژاوەرۆ) بێنێ ئینەش ئەرمانا: کە پەی زوان و فەرهەنگوو وېشا ئێژاییشا دان و پەی ژووژیای و ئەوەژیوای فرەتەروو زوانەکەیشا هەمیەتشا دان و زاڕۆڵەکێج بە ئامای ئەڎا و تاتەکاشا شاڎتەر و دڵوەشتەر بێنێ.
زەحمەت و تەقالاو باخچەو گوڕاڵا و یانەو مامۊسا بېسارانی سنەی تایبەت (دوکتر موکەڕەم غەفاری، موحەممەد وەلی کاکایی، دوکتر ڕەحیم غوڵاموەیسی ، خاتوو چنوور شەفیعی، حاجی حەسەن مورادی) و لالۊ عەبەیچ چنی خاتوو هەتاوێ بەرنامەکەشا ڕازنابێوە و ئامای تاقمەو قەڵەم بە دەسا، شاعێرا و نویسەرا وهونەرمەندەکاو هۆرامانی پېسەو کاکە (عەتامەحموودی، خاتووگیسیا هۆرامی، کاک هاشم حێسامی، دوکترنەسروڵڵا کەنعانی) ، مایەو دڵگەرمی بۍ ئەپا ئاواتە ئی گلێرەو بېیەیێ فرە و فەرەتەر بانێ.
بەرنامەکە جە وەش ئامای واتەی دوکتر غەفاری و خاتوو کەژاڵ بیگلەری، خاتوو دڵگیرەی بەهرامیێ و خاتووهەتاوە و لالۊعەبەی دەسش پنە کەرد وخاتوو دیانا ڕوستەمیێ قارەمانوو چۆرتکەو و موحاسێبات زێهنی دنیای جە دەگاو هوویەی هۆرامانوو ژاوەرۆی، پېشکەش کەردەی سیاوچەمانەو گۊرانیێ هۆرامیێ بە دەنگو هونەرمەند کاکە (وەسیم حسەینی) ، زەحمەتوو گېرتەی فیلم و وێنەکاو کاکە شەهرام غوڵامی و دماتەریچ هەرکام جە زاڕۆڵەکا جە شێعرەو شاعێرا پېسەو کاک فەتحوڵڵا ڕەزایی و جە کاراتەهەرمانەکا و بەرنامە فەرهەنگیەکاتەری بەشداریشا کەرد.
بەشوو دمایینوو بەرنامەی قەڎرگېرتەی و پېشکەش کەردەیەو کتېبەکاو نویسەرەکا و شاعێرەکاو هۆرامانی پېسەو وەشەویسا: کاکەئێبراهیم شەمس، هومایون موحەممەدنژاد، دلێر ئەداک ، نەشمیل مەحموودی، دڵگیر بەهرامی، دوکترنەسروڵڵا کەنعانی، پېسەو خەڵاتی پېشکەشو زاڕۆڵەکا کە جە بەرنامەکەنە بەشداریشا کەرده بێ.
دمایین نویستەم ئینەن:
وەشەویساو وېم جە باخچەو گوراڵا و ئەنجۆمەن و یانەو مامۊسا بېسارانی شاروو سنەی مانیاییتا ئەوەسەیایبۊ ئەپا ئاواتە گردیما پەی گەشەدای و پارێزنای زوان و فەرهەنگوو هۆرامانی قۆڵێ هۆرماڵمێوە و پەی هەرمانەو زوانەکەیما ، هەنگام و لاقورێ فرەتەر هۆرگېرمێ.
هومایون موحەممەدنژاد.[1]