=KTML_Bold=Kal û Gaxan: Pîrozbahiyeke Kevneşopî ya Kurdên Elewî=KTML_End=
Li Londonê Kal û Gaxan Hate Pîroz kirin
Kal û Gaxan çalakiyeke pîrozkirina sersalê ye û bi taybetî li doraliya bajarê Dêrsima Bakurê Kurdistanê ji aliyê Kurdên Elewî ve tê pîroz kirin.
Bername bi pêşengiya komeleyeke Elewiyên Kurd li Londonê, Dersim-Derê hat sazkirin. Kevneşopa pîrozbahiya sersalê Kal û Gaxan li dêra St Mary’s Churchê hate kirin.
Kal û Gaxan bi sedan salan e li dorûdora bajarên wek Dêrsim, Erzîncan, Sêwas, Elezîz, Meletî, Meraş, Bingol, Mûşê ji aliyê Kurdên Elewî ve tê pîrozkirin.
Kal û Gaxan di sîstema baweriya Raa Haqî de salvager e û tê wateya bidawîbûna salê û pêşwazîkirina sala nû ye.
Bernameya li dêra St Mary’sê bi xwendina gulbengê dest pê kir.
Di çarçoveya programa şevê de koma zarokan ku li navenda Çanda Elewiyan ya Enfieldê perwerde bibûn konserteke piçûk da.
Koma Bendîr a Jinan jî bi Erbaneyên xwe derketin ser dike, hem lê xistin hem jî kilam gotin.
Di şevê de stranbêj Suna Alan û Reşo Zelal jî bi stranên xwe tevli çoşa vê pîrozbahiya sersalê bûn.
Dayîk Yadigar Arslan ji bo The Hall Kurdiyê behsa çanda Kal û Gaxanê û xebatên wan ên li Brîtanyayê kir.
Ez li Saziya Baweriyê ya Brîtanyayê de dayik im. Ev 27 sal in li vî welatê me û di nava sazî û dezgehên Elewiyan de dixebitim.
Kal û Gaxan edeteke kevnar e. Kal, sala ku diqede ye, Gaxan jî sala bê temsîl dike.
Li gorî ku me ji mezinên xwe bihîstiye, dibêjin berê feqîrî hebû, tunebûn hebû. Zivistan dirêj bûn. Piştî meha îlonê berf dibariya. Di wê zivistana sar de ji gundekî 3 kes, jin û mêr û ciwanek di nav gund de digeriyan, arvan, rûn û şekir berhev dikirin û dibirin li mala yekî xizan loqme çêdikirin û li xelkê belav dikirin û dibirin datîniyan ziyaretên li gundan da ku çûk û ajalên derve jî jê bixwin. Ev cûreyeke alîkariyê ye. Û herwiha xatirxwestinek e ji sala ku diqede û pêşwazîkirina sala nû ye. Ev şev bi sohbetan dibore, roja din zû radibûn, ji kaniyan ava taze dianin. Jê vedixwarin û li ser heywanên xwe jî direşandin. Jixwe di çanda elewîtiyê de 3 cejn hene. Kal û Gaxan, Xizir û Newroz. Em Kal û Gaxanê ev 5-6 sal in li Brîtanyayê pîroz dikin. Em dixwazin vejînin vê çandê da ku zarokên me û nifşên nû jî hîn bibin. Çawa ku krîsmis û noela wan heye, ya me jî Kal û Gaxan heye.
[1]