نۆروزو وەهاری تازەتا مەبارەک.

نۆرز ئینا ڕاوەو ساڵێوەتەرەما ڕەڎە کەردە.
هەر چن نۆروز پەی ئېمە خەڵکو هۆرامانی ویرەوەریێ وەشێش نېیەنێ، شیمیا وارانو هەڵەبجەیو، ئەنفالو، کۆچ کەردەی ئیجباری خەڵکو دەگاکاو، ۋېران کەردەی یانەکاشاو مڵکو باغو باغاتشا، چی سی ساڵی وېیەردەنە، بېیەن بە دۆرانێوی سیاو، کە تاریخ مەتاوۊ چەنەش ویەرۆ و جە ئایەندەنە باسش نەکەرۊ.
هۆرسەنگنای ئی دۆرانیە چەنی وېیەردەی، مېیاونۆما پانەیە کە پەدیدەو (کۆچی) لائەقەل جە هۆرامان، هەم ناوەشیو کارەساتێش درۆسێ کەردێنێو هەمیچ ئەرەئاردەی تازەو، ژیوای جیاوازتەرێش جە وېیەردەی بە دەس ئاردێنێ.
نەسڵو تازەو هۆرامانی بە بۊنەو کۆچیۆ، تێکەڵو دنیاو تازەو سەردەمی بېیەن، فێر بېیەن کە وېش سەلەمنۆ چەنی ویری جیاوازی، فێر بېیەن کە چەنی وەر لوای عێلم و مارێفەتی، وېش بەرۆ وەرۆ و نەمەنۆجیا.
ئی نەسڵە یاوان پانەیە کە بۍ دەنگ نەبۊ جە وەراوەرو ناعەداڵەتیو زۆڵمو زۊرو دەسەڵات دارا کۊمەڵگایۆ.
پەی ئسباتو ئی مەسەلێ کریۆ بلمێنە دلێ دنیاو مەجازیو باوەڕ پانەیە بارمێ کە بە سەدان یا هەزاران کەسێ چی هۆرامانە گۆلانەنە، پێدێ بېیېنۍ، کە بە ئاسانی تەسلیمێ زۊرداریو ملهۆڕی مەباو جە وەراوەرو هەر جۊرە حەرەکەتێوی نائاساییۆ پەیلوای وېشا، بە بۍ ئەوەشاریای بەیان کەرا.
یۆ چا بەربەرەکاناو ئێعترازا، نویسەی بە زوانی ئەڎاییا کە چی سەردەمەنە بېیەن بە وەسیلەو مۆبارێزەی چەنی ناحەزا زوانی هۆرامی، کە پاسە بزانو کەمتەر هۆرامیوا، کە ئی مەسەلێ بە حەقو تەبێعی وېش نەزانۆ.
جە نەتیجەو ئی جموجۆڵیەنە، کە ئېمەی ئۆمێڎوار کەرۊ تاکو متمانێ خاستەرە کەرمۍ پی نەسڵە تازەیەو ئاواتو ئانەیە بوازمێ کە ڕۊ بە ڕۊ ڕوەو وەر بلۆ.
نۆروزتا مەبارەکو گرد ڕوێوتا وەهاربۊ.
ڕەزا بەهمەنی.[1]