قولۍ سیاو و چەرمۍ مێڎانەنە بەرمەگنا
قولۍ، دوۍ پېشۍ گولانۍ بەرکۆتېنۍ چیلاو چۆلاو قاچو هەر کەسېوە، وەختێ ڕانکۍ هۊرکریا ئاڎۍ مەگنا بەرۆ. ئی دیاردە پېسە ئیدیۆمێش پەنەئامانو پەی ڕاسی و درووسی ئازایی و تەرسەزاڵی کەسەکا بەکارمێ.
جاران هەر کەسېو دەسش دابیێ هەرمانێ، وەڵۍ گرڎچېوێنە دەس و قوڵ و قاچېش هۊرکەرۍ، ڕانکەکاش هۊرکېشۍ پەی ئانەیە وەختو هەرمانەکېنە گورج و گوڵ بۊن، هەم ڕانکەکېش پیسۍ نەبان، زیاتەریچ وەختو جۊماڵی و ئاودارای باخینە، یام وەختو هەرمانکاری و زەنگەن شاناینە.
بڕێ کەسۍ تەنیا دەمشان هەن، بە قسۍ هیچشان ناستەنۆ، باسو ئازایی وېشان مەکەران پەی خەڵکی، بەڵام فرەو خەڵکی بڕواشان پەنە نمەکەرۊن، پەنەشان ماچان: قولۍ سیاو و چەرمۍ مێڎانەنە بەرگنان، یانی جە وەختو جەنگینە، یام مێڎانو جەنگینە بەرمەگنۊ کۍ ئازا هەنو، کۍ تەرسەزاڵەن، کۍ قولۍ هۊرکەرۊو ملۊ پەی دلۍ جەنگەکەی و کۍ وېش دزۊوە.
هەمدیس پەی پیاوەتی ئینسانیچ بەکارمێ، کۍ وەختو تەنگانەینە مەی فریاو خەڵکیۆو کۍ نمەی، کۍ یارمەتی هامڕاکاش و قۆم و قیلەکەیش مڎۊن و کۍ تەواناو پیاوەتیش نېیەنە.[1]