ئەمڕۆ سێشەممە ڕێکەوتی #19-12-2023#، #مەسرور بارزانی#، سەرۆکی #حکومەتی هەرێمی کوردستان#، پێشوازیی لە زیاد خەلەف، سەرۆکی ئەنجوومەنی بەڕێوەبردنی بانکی (تەنمیە)ی ئێراقی کرد، لە کۆبوونەوەکەدا گفتوگۆ لەبارەی گەشەپێدانی ئابووری و چاکسازییەکانی حکوومەتی هەرێمی کوردستان لە کەرتی بانکی کرا، ئاماژە بەوەش درا کە لە هەرێمی کوردستان و ئێراق، زەمینەی وەبەرهێنان لە کەرتە جیاوازەکان لەبارە.
سەرۆکی ئەنجوومەنی بەڕێوەبردنی بانکی (تەنمیە)ی ئێراقی، خۆشحاڵیی خۆی بەرانبەر بە دیدگای سەرۆکی حکوومەت لەبارەی هەمەچەشنکردنی ئابووری و بنیاتنانی ژێرخان و پێشخستنی سیستەمی بانکی دەربڕی.
سەرۆکی حکوومەت لەپێناو پێشخستنی سیستەمی دارایی و ئابووری، پشتیووانیی خۆی بۆ بانکەکانی کەرتی تایبەت لە هەرێمی کوردستان و ئێراق دووپات کردەوە. [1]