مامۊسێوە شارو پاوەی وەنیارەکاش ئاشنێ کەرۊوە
بە وېیەردە و جوگرافیاو هۆرامانی
ماموسایێ یۊ جە وەنگاکاو پاوە شاری دلێ دڵو هۆرامانینە هەکە وانەو جوگرافیای ماچۊوە پەنەشا، جیاتی جوگرافیاو جەهانیشا فێرکەرۊ، خجڵا وەڵێ گردینە جوگرافیاو هۆرامانی و زادگاو وېشان پەنەشان مژناسۊن.
وانەکەو وېشەنە مامۊسا داواش کەردێنە ئەو هەریۆ جە وانیارەکاش، گېڵۊوە پەی دەگاکێ وېشا و گنۆ قسێ چەنی ژەن و پیا بەتەمەنەکاو بارەو ئەژناسنای هاناوا و کەش و کۊ و هەوارەکا و مەڕ و وەرمەغارەکا و باخا دەگێکېشاوە تۆمارېوە باراوەو هەفتەی دماتەرەنە هەریۆشا بەجیا واناشۆ پەی هام پۆلەکاشا.
پېسەو نمونێوە ئی زاڕۆڵێ دەگاو داریانی خجڵێنێ نامۍ یاگە سروشتیەکا دەگاکېشا هورمڎا.
ئا مامۊسا بەڕېزە ئێژا دکتۆر سەفەر وەلەدبەیگین، خەڵکو پاوە شارین و هەر هەفتێوە بە تەشکێوە جیاواز پۆلەکەیش و وانیارەکاش هۊرسەنگنو و وەنیارەکاش ئاشنێ کەرۊوە بە وېیەردە و جوگرافیاو هۆرامانی.
بنویسمێ بە زوانی هۆرامی، بوانمێوە بە زوانی هۆرامی کە ئاڵاو قەڵەمی نەبڕیەینە باڵاو هیچ مێللەتێویەرە.[1]