نامۍ: فواد
نازنام: نۊدشەی
ژیۋاینامە
مامۊسا فواد نۆدشی ساڵەو (1360) کۆچی ڕۊجیاری، وەراوەر بە (1982 ز) جە هۆرمانو پانیشتی (عێراقینه) بە دنیا ئامەن.
نزیکەو (25) ساڵا جانېشتەو شاروو نۆدشەی بېیەن و جە حاڵی حازرەنە جە شاروو سەوڵاواینە چنی خانەوادەی موحتەرەمیش ژیوۆ. ئی بوڵبوڵە دەنگ وەشە ساڵەو (2000 ز)ی بە شێوەی فەرمی، دەسش کەردەن بە گۊرانی واتەی و شان بە شانوو هونەرمەنڎاو ئارۊو هۆرامانی خزمەتش کەردەن بە هونەرو ڕەسەنایەتی هۆرامانی. مامۊسا فواد نۆدشی فرەتەر ئاشقو شاخ و داخ و تەبێعەتوو هۆرامانیا و دەنگېوی تایبەت بە وېش هەن و پېسە فەرە جە هونەرمەنڎاو شاروو نۆدشەی ساحێب سەبکوو تایبەتوو نۆدشەیا، دەنگېوی تەڕ و پەڕ و دڵان لاون ئینا ناخشەنە و وەختو گۊرانی واتەی ئارام و سەنگین و ماقووڵ و با وەقارا. بە داخەوە ئی هونەرمەندە دەنگ وەشە پېسەو ماباقی هونەرمەنداو هۆرامانی بە خاتروو بۍ دەرەتانی ژیوایەو و نەبېیەی هەرمانە و باری تایبەتی، سەرقاڵەو هەرمانبەری وەختین، (فەسڵی) ، بە ڕەنجو شانەو بە ئارەقوو جەبینی ڕزقوو خانەوادەی دابین کەرۊ و نانوو زەحمەت و شەرافەتی وەرۆ و فرە وەختایچ بە ئەو پەڕوو زەحمەت و مانیایی هەرمانی کۊڵبەریچ کەرۊ و هیچ وەخت تەماڎارو یاوەردی دەسو هیچ کەسېو نەبېیەن و نەلان چېرو بارو منەتو هیچ کەسېوی.
فواد نۆدشی جە گەردوو ڕا و ڕەسم و شاڎیەکا هۆرامانی، شەریکوو شاڎی و وەشی خەڵکی بېیەن و حەر پاسە چەنی گروو گۊرانی واچەکاو هۆرامانی گۊرانیێش واتێنێ و بۍ منەت و وەرچەم گېرتەی مادی، خزمەتش کەردەن بە هونەر و فەرهەنگ و ڕەسم و یاساو هۆرامانی.
مامۊسا فواد نۆدشی ئاشقوو دەنگو سیاوچەمانه واچەکا
هۆرامانی بە تایبەت هونەرمەندو بۍ وێنەو هۆرامانی،
مامۊسا عوسمان هۆرامی و حەر پاسە مامۊسا حەمەحسەین کەیمنەیی و مامۊسا جەمیل و ماباقی هونەرمەندان.
مامۊسا فواد نۆدشی چنی فرێوی جە گۊرانی واچا پېسە هۊشېیارنۆدشی، حەمەی نام‌ئاوەر،
ئێسماعیل حەمیدی، سەرکۆ نۆدشی، عێزەت ڕەنجبەر، سەعدی ئەحمەدی، ڕەحمەت دەڵەمەرزی،
سالم عوسمانی، مەجیڎ دېوەزناوی، ڕۊحەڵڵا زۆمی،
جەلال هەرسینی، جەماڵ چەشمیڎەری، شەفێع کەیمنەیی
حەمەحسەین کەیمنەیی، تۆفیق زاوەری، سابیر شېیانی، سابیر
ساڵیانی، ئەشرەف زاوەری،
وەهبی سۆسەکانی، یاقوب سۆسەکانی، عەتا زەڵمی، خاتوو لیمۆ، فەرزاد شۆشمیێ،
ئیسماعیل هانەگەرمەڵەیی،
حەمەکەریم نۆدشی، ئسماعیل
خوسرەوی، مەولووڎ شۆشمێی
سەباح خارگېڵانی،......هتر
گۊرانیێش واتێنێ و دەنگو وەشوو وېش پېشکەش و ئاراستەو مەجالێس و مەحافێلوو وەڵاتوو هۆرامانی کەردەن. مامۊسا فواد نۆدشی جار و باریچ گۊرانیێ عارفانەی (شێخانە) ماچۊ و گەرمی و جەزبەی وزۆ دڵوو ئاشقاو تەکیەو خانەقای و بە دەنگە سۊزڎارەکەیش ئا مەحافلا ڕازنۆوە.[1]