نامۍ: سەید موحەمەد
نازنام: مارف
نامۊ تاتەی: سەید موستەفا
ساڵۊ پېڎابېیەی: 1774ز
ساڵۊ مەرڎەی: 1838ز
یاگۊ پېڎابېیەی: #نۆدێ_ سلێمانی#
یاگۊ مەرڎەی: #سلێمانی#

$ژیۋاینامە$
شېخ مارفی نۆدێ، نامېش سەید موحەمەد کوڕو سەید موستەفا کوڕو سەید ئەحمەڎی، بە سېڼزە پەشتۍ ملۊوە سەرو سەید عیسای بەرزنجی کوڕو بابا عەلی هەمەڎانی. زانێوە ئایینی و خوڎائەشناس بېیەن، چەنی ئانەیچە شاعېرێ گۆرەو کوردییەن. شېخ مارف تاتەو کاک ئەحمەدی شېخیەن جە سلێمانی و باباو شېخ سەعیدی و بابا گۆرەو شېخ مەحمووڎو حەفیدین. بە مەڵامەتو زیرەکی و زوان زانی و ڕەوانواچیشۆ نازنامو (مەعروف)یش پەنە بەخشېیان، بەڵام بە هۊکارو فۆنەتیکو زوانی کوردی نامەکۍ بیېنە بە (مارف) و پا نامۍ ئەشناسیان. شېخ مارف دەگاو (نۆدێ) سەر بە ناوچەو شارباژێری نزیک بە شارو سلێمانی ئامان دنیاوە.
شېخ مارف دمای وېش میراتێ ئایینی و زانستیش جیائاستەن کە بېیەن بە سەرچەمێ پەی خەڵکی. شېخ مارف زیاتەر جە پەنجا کتېبۍ ئایینیۍ و ئەدەبیېش نویستېنۍ، چا بەرهەماشە کە دیارېنۍ (فەرهەنگی ئەحمەدی)ن، کە پەی ئەحمەدی کوڕیش نیانشەرە کە شېعرۍ عەرەبیېنۍ و ماناکېشان بە کوردی. ئی بەرهەمە دمای شېخ مارفی بېیەن بە سەرچەمێ پەی دلۍ حوجرەو فەقیەکا پەی فېربېیەی واچە عەرەبېیا. شېخ مارف پاڕەویش جە تەریقەتو قادری کەردەن، چڼیین زانێ و مەڵڵێ ئایینیۍ سەرو دەسو شېخ مارفینە یاوێنۍ پەنەو ئیجازەی شەرعی و زانستیشان وەرگېرتەن.
شېخ مارف وەڵۍ ئانەی شارو سلێمانی بنیاڎ نریۊ، جە قەڵاچوالان دەرسی شەرعیش واتەنۆ، چەنی درووسبېیەی سلێمانی، ئاڎییچ کۊچش کەردەن پەی ئاگەی. وەختێ ئیبراهیم پاشاو بابانی مزگی گۆرەش بنیاڎ نېیا شېخ مارف بی بە مامۊساو ئا مزگیەیە.
شېخ ماف دمای خزمەتێ فرەی بە ئایینی و شەریعەتی و تەریقەتی، ساڵەو (1838ز) کۊچی دمایینش کەردەن، جە گردو سەیوانی ئەسپەردەکریان.
ئەسعەد ڕەشید.[1]