خەنجەرەی دەبانە وېش کېلانەنە مەگېرۊ
خەنجەرەی دەبانە تەنیا میللەتو کوردی بەکارئاردېنە، دلۍ کوردەسانینە وەشەکریێنە، تاریخەکەش پەی ساڵانو (1850ز.) مەگېڵۊوە.
بېجگە میللەتو کوردی هیچ میللەتێ تەر بەکارشنمارۊن، ماناو دەبانی مەگېڵۊوە پەی یەرۍ بنەما سەرەکیا:
１-ئا ئاسنە کە خەنجەرەکېش پەنە وەشکریێنە ئاسنی ساغەن.
２-دەسەو خەنجەرەکۍ شاخیۍ ئاژەڵی کۊیینۍو پۊسو کېلانەکېچ جە پۊسو ماری وەشکریێنە.
３-دەبان، پېسە ڕەمزو نەتەوەو کوردی منریۊرە، فرەو سەرخېڵ و سەردارەکا کوردی پېسە هېمێوە نەتەوەیی نیێنەشارەو کەردېنەشا قەڎشارە، نموونەیچ دلۍ پوولەکەو حکومەتو کوردەسانی پانیشتینە ساڵەو (1921ز.) شېخ مەحمووڎی بەرزنجی پېسەو هېمێوە سەرو پوولەکەیشۆ نیێنەشەرە.
مەبەسو ئیدیۆمەکۍ ئانەن؛ کەسی ڕەسەن و ئازا و خاس، هەرگیز نمەتاوۊ وېش بشارۊوە، دلۍ گردو قۊمیاکانەو دلۍ هەر مێڎانێنە ئازایانە مەی ڕووەو کاری و وېش مرمانۊ، تەرسەزاڵ نییەن بلۊ یاگێ وېش شارۊوە. ئا جۊرە کەسۍ مەردۍ و ئازێ و بە غیرەتېنۍ، وەختو تەنگانەینە مەیانە مێڎان.[1]