نانی هەرزن، دۆی بزن، لە پێش مەزن
هەرزن: ڕووەکێکە گەڵاپانە و تۆوەکەی وردیلەیە و زۆر هەرزانترە لە گەنم و جۆ و زیاتر دەکرێتە ئالیکی پلەوەر و مامر و باڵندە، هەرزنە تاڵەشی پێ دەوترێت: هەژارەکانیش وەکوو دانەوێڵەی جۆ دەیکەن بە نان وەکوو گەورە شاعیر #موفتی پێنجوێنی# ئاماژەی پێداوە: گەورەیەک وەک خۆی نەڕوانێتە من، خۆی پڵاو خۆر بێ من نانی هەرزن....، دۆی بزن: لە هەردوو جۆری دۆی ماستی مەڕ و مانگا ترشتر و بەبایەخترە، بەڵام ئاژەڵی بزن هەرزانترە لە مەڕ و مانگا، بۆیە هەژارەکان دەتوانن لە یەک کاتدا نانی هەرزن و دۆی بزنیان هەبێت‌، ئەگەر هەژارێکیش نانی هەرزن و دۆی بزنی هەبێت مەزنە و شا بە ‌سەپان نازانێت بۆیە وتراوە: نانی هەرزن، دۆی بزن، لەپێش مەزن. [1]