سەرۆکێ هەرێما کوردستانێ د یادا جینۆسایدناساندنا ئێزدییان دا ل #هەڤلێر#ێ گۆتارەک پێشکێش کر و راگەهاند، دڤێت خزمەتکرنا ئێزدییان کارێ مە یێ پێشیێ بیت.
ئەڤرۆ ل هەولێرێ زانکۆیا کوردستان و نڤیسینگەها رزگارکرنا رەڤاندییان رێورەسمەکێ تایبەت بۆ جینۆسایدناساندنا #شنگال#ێ رێکخست، نێچیرڤان بارزانى، سەرۆکێ هەرێما کوردستانێ د گۆتارەکێ دا بەحس ل رەوشا ئێزدییان کر و گۆت: یادا ئێک ژ درندەترین تاوانا دیرۆکێ و پشتى دەﮪ سالان هێشتا برینەکا ڤەکرى یە و یادا شنگالێ چوویە رێزا ئەنفال و کیمابارانکرن و وێرانکرنا ل دژى گەلێ کورد هاتینە کرن.
هەروەسا دیارکر، وێرانبوونا شنگال و رەخودۆرێن وێ و دەربەدەربوونا وان هەتا هەتیێ ناهێتە ژبیرکرن و جینۆسایدکرنا ئێزدییان ل سەردەمێ نوى مرۆڤایەتى ل جهیانێ هەژاند و دڤێت هەموو کۆمەلگەها نێڤدەولەتى بزاڤان بکەت ئەڤ روودانە دوبارە نەبن و دادپەروەرى بۆ قوربانییان بهێتە بجهئیان و قوربانى بهێنە قەربووکرن.
نێچیرڤان بارزانى ئاشکراکر، ژ نێزیک ڤە ئەز ئاگەهدارم ل سەر رەوشا ئێزدییان و هەست ب ژانێن وان و کەسوکارێن قوربانییان دکەم و خڕاگرییا ئێزدییان بۆ ژیانێ گەلەکە و کا چاوا ئێزدى ب دەهان فرمانێن بۆرى ژناڤ نەچوون ب ڤێ فرمانێ ژى ژناڤ نەچوون.
سەرۆکێ هەرێما کوردستانێ گۆتژى: چ بۆ ئێزدییان بهێتەکرن هێشتا کێمە و گەلەک مایە بۆ وان بهێتەکرن و جینۆسایدناساندنا ئێزدییان ئەرکێ ئیراق و هەرێم و جیهانێ یە و مە چ رێکێن دى نینین ژبلى باشترکرنا رەوشا ئێزدییان و ئێزدییان پشتراست دکەین تا ئێک ئێزدى ژى مابیت دێ ل سەر رزگارکرنێ بەردەوام بین و هزاران قوربانییان پێدڤى ب چارەکرنا دەروونى و چاڤدێریێ هەیە.
سەرۆک نێچیرڤان بارزانى هەر د گۆتارا خۆ دا گۆت: شنگال و رەخودۆرێن وێ پێدڤى ب ئاڤەدانکرنێ هەیە و پێدڤیە حکومەتا ئیراقێ ل گەل هەرێمێ بۆ بجهئنیانا رێککەفتنا شنگالێ هاریکار بیت و دڤێت خزمەتکرنا ئێزدییان کارێ مە یێ پێشیێ بیت و نابیت شنگال و ئێزدى ببنە قوربانیێن ناکۆکیێن حزبى و دڤێت شنگالى کاروبارێن خۆ ب رێڤەببەن و دیلێن هێزێن دەست کەسێ نەبن و دڤێت پەکەکە و هەر هێزەکا نەیاسایى شنگالێ بجﮪ بهێلن.
هەروەسا ئاشراکر، بجهئینانا دەستوورى گەرەنتییا پاراستنا پێکهاتێن ئیراقێ یە و ئێزدی حەز دکەن ب خۆشى و ئاشتى ل گەل رەخودۆرێن خۆ بژین و ئێزدى دلسیۆز و مرۆڤ پەروەرن و ئەرکێ مەیە یا پێدڤى بۆ ئێزدییان بکەین و دڤێت زانکۆیێن هەرێمێ لێکۆلینان ل سەر ئێزدییان دروست بکەن.[1]