کۆمەڵانی خەڵکی ئەمەکداری کوردستان
حکومەت و پارتە سیاسییە بەرێزەکانی کوردستان
رووداوەکەی دوێنێ ئێوارەی #قەڵادزێ#، زەنگێکی ترسناکە، بێگومان دەستور و یاسا، ڕێگا و دەرفەتی بۆ خۆپیشاندانێکی ئارام و هێمن فەراهەم کردووە، بەڵام بە مەرجێک شێوە و ئاراستەی توندوتیژی بەخۆیەوە نەبینێت، چونکە پەلاماری دەزگاکانی حکومەت و موڵکی گشتی و بارەگاکانی حزبە سیاسییەکان دیاردەیەکی ناشارستانیانەیە، لە هەمان کاتیشدا ئەرکی حکومەت و دەزگا پەیوەنددارەکانە ئاسایشی وڵات و ژیانی هاوڵاتیان، بە تایبەتیش لە شارەکاندا، بپارێزن.
لەکاتێکدا ئەمڕۆ لە کوردستان دوو قەیرانی بەرچاو هەیە، قەیرانێکی سیاسی یاسایی کە پەیوەستە بە سەرۆکایەتی هەرێم، هەروەک قەیرانێکی دیکەی ئابووری دژوار هەیە کە بەرۆکی حکومەت و خەڵکی گرتووەتەوە، لە هەمان کاتیشدا مەترسییەکانی #داعش# هەڕەشەیەکی ڕاستەخۆی لەسەر عیراق و هەرێمی کوردستان دروستکردووە، بۆیە لەم کاتە هەستیارە و بە ئامانجی پاراستنی زیاتری ئارامی هەرێمی کوردستان، دەبێ کۆششەکان بخرێنەگەڕ و هەموو هەوڵێک بدرێت بۆ چارەسەری هەردوو قەیرانەکە لە لایەک و ڕووبەڕووبوونەوەی داعش لە لایەکی ترەوە.
هەرێمی کوردستان کە لە سەدەی بیستەوە هەموو هەوڵ و خەباتی بۆ کراوە و قوربانی گەورەی بۆ دراوە، نابێت ئەمڕۆ ببێتە جێی ناکۆکی سیاسی و یەکلاکردنەوەی ململانێکان. هیوادارم، دڵنیاشم کە سەرکردایەتی سیاسی کوردستان لە ئاست بەرپرسیاریەتی مێژووی خۆیاندا دەبن. ئومێدەوارم ڕووداوە دڵتەزێنەکەی قەڵادزێ کاریگەری تەواوی خۆی لەسەر دانوستانی لایەنە سیاسییەکان بنوێنێ بۆ دەربازبوون لەم قەیرانانە.
لە کۆتاییدا داوا لە خوای گەورە دەکەین ئارامی و دانبەخۆداگرتن بە کوسوکاری قوربانیانی قەڵادزێ ببەخشێت و ئومێدی زوو چاکبوونەوەش بۆ برایندارەکان دەخوازم.
فوئاد مەعسوم
سەرۆک کۆماری عیراق
10-10-2015
Ev babet bi zimana (کوردیی ناوەڕاست) hatiye nvîsandin, klîk li aykona
![](https://www.kurdipedia.org/images/flags/ku.png)
bike ji bu vekirina vî babetî bi vî zimana ku pî hatiye nvîsandin!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Ev babet 9,057 car hatiye dîtin
Raya xwe li ser vî babetî binivîsin!