دواڕۆژ، کۆچەر عەلی
لەماوەی 15 ڕۆژی ڕابردوودا لە هەرێمی کوردستان نرخی گۆشتی مریشک لە هەزار و 800 دینارەوە بەرزبووەتەوە بۆ سێ هەزارو 600 دینار، بەرپرسێکی وەزارەتی کشتوکاڵێش دەڵێت: نرخی گۆشتی مریشک تا سەرەتایی مانگی داهاتوو دانا‌بەزێت.
د. جەمال ئاکرەیی، بەڕێوەبەری گشتی ڤێتەرنەری هەرێمی کوردستان بەدواڕۆژی ڕاگەیاند: لەماوەی 15 ڕۆژی ڕابردوودا نرخی مریشک بە شێوەیەکی خێرا بەرزبووەتەوە، بە جۆرێک لە هەزارو 800 دینارەوە، بووەتە سێ هەزارو 600 دینار.
لەبارەی هۆکاری بەرزبوونەوەی نرخەکەشیەوە، بەڕێوەبەری گشتی ڤێتەرنەری وتی: له هەرێمی کوردستان کێڵگەی بەخێوکردنی پەلەوەر کەمه و بەشی ئەوە ناکات پێداویستی ناوخۆ پڕبکاتەوە، هەر بۆیە بەردەوام گۆشتی مریشکی بەستوو لە دەرەوەی هەرێم هاوردە دەکرێت.
روونیشیکردەوە: لەچەند مانگی ڕابردوودا مریشکێکی زۆر هێنراوەتە بازاڕەوه و بە نرخێکی هەرزان فرۆشراون، ئەمەش وایکرد مریشک لە بازاڕەکانی هەرێم کەمببێتەوه و ئەوەی ئێستاش لە هەندێ کێڵگە هەیە پێداویستی ناوخۆ پڕناکاتەوه، بۆیە نرخ بەرزدەبێتەوە.
ئاکرەیی ئاماژەی بەوەشدا: لە ئێستادا لە شارەکانی ناوەڕاستی عێڕاق نرخی مریشک بەرزبووەتەوە، هەرکاتێکیش لەوێ نرخ بەرزبێتەوە لەهەرێمی کوردستانیش بەرزدەبێتەوە.
ناوبراو دڵنیاییشیدا لەوەی ماوەی بەرزبوونەوەی نرخی مریشک لەم مانگە زیاتر تێناپەریت و لە مانگی داهاتوو دابەزین بەخۆیەوە دەبینێت.
ساڵانە هەرێمی کوردستان پێویستی بە 250 هەزار تەن گۆشتی مریشک هەیە، له و ڕێژەیەش نزیکەی 80 هەزار تەن لە دەرەوە هاوردە دەکرێت.[1]
#14-10-2018#