دوارۆژ، ئارەزوو محەمەد
نزیکەی سێ مانگ بەسەر قۆناغی یەکەمی سزاکانی ئەمریکا دژ بە ئێران تێدەپەڕێت و تەنیا 10 ڕۆژ بۆ دەستپێکردنی قۆناغی دووەمی ئه و سزایانە ماوە، بەڵام هاووڵاتیانی ئێران لە ماوەی 80 ڕۆژدا گەیشتوونەتە خراپترین ئاستی ژیان، بە شێوەیەک تەنانەت کڕینی شمەکی سەرەکی ژیانیش بۆیان ئەستەمه و هاووڵاتیان گۆشتیش بە شێوەی قیست دەکڕن.
گەمارۆکانی ئەمریکا زۆرترین کاریگەری لەسەر ژیانی سێ لەسەر چواری دانیشتوانی ئه و وڵاتە هەبووە و سەدان کەس بە هۆی برسێتی و نەبوونی دەرمان گیانیان لەدەستداوە.
لەئێستادا تەنها ویستی ئێرانییەکان دابینکردنی بژێوی ژیان، زیندوو مانەوە و گەڕانەوەیە بۆ بارودۆخی باشی وڵاتەکەیان پێش گەمارۆکان.
لە کۆتا گۆڕانکارییە ئابورییەکانی ئێراندا نوسراوێک کە لە زۆربەی شوێنەکاندا دەبینرێت و جێی تێڕوانینی قووڵە ئەویش کرینی گۆشت بە قیستە هەڵوێستێکە کە سەندیکای گۆشتفرۆشان بۆ هاووڵاتیانی ئێرانیان ڕەوا بینیوە.
لەسەر ڕاست و دروستی ئه و نووسراوە دواڕۆژ لەگەڵ ژمارەیەک لە هاووڵاتیانی ئێران و ڕۆژهەڵاتی کوردستان دواوە.
مەسعود کەرامەتی، یەکێک لە ئەندامانی سەندیکای گۆشتفرۆشانی تاران دەڵێت: بڕیاری فرۆشتنی گوشتی ئاژەڵ و مریشک لە لایەن ئەندامانی سەندیکا و ژمارەیەک لە گۆشتفرۆشان بەو شێوەیە بۆ ئەوەیە کە گۆشت و پرۆتین بۆ هەموو چینەکانی کۆمەڵ بەردەست بێت.
وتیشی: لەم کاتە هەستیارەدا گۆشت بە ئاسانی دەستدەکەوێت، بەڵام بەهۆی بەرزبوونەوەی نرخەکەی کڕیار کەمە، ئێمە هیوادارین بەم کارە هاوکارییەکی هاووڵاتیانمان دابێت هەرچەند کەمیشە.
خانمێکی تارانی بە ناوی ستارە سادقی دەڵێت: ئێمە بنەماڵەیەکی چوار کەسی مامناوەندین، هەم خۆم و هەم هاوسەرەکەم کارمەندین، بەڵام لە ماوەی ئەم سێ مانگەدا تەنها لە سەرەتای مانگەکاندا گوشت و مریشکمان کڕیوە.
لەوانەیە ئەمە بۆ من و هاوسەرەکەم قورس نەبێت، بەڵام ئەمە بۆ منداڵەکانمان دژوارە و تەندروستیشیان دەخاتە مەترسییەوە.
سەعید مەحمودی، کرێکارێکی تارانییە و دەڵێت: لە ساڵی 1978 و پێش ڕووخانی ڕژێمی شا کرێکارێک بە کەمترین مووچە بە چاوپۆشی لە خەرجە زیاییەکان و دەست پێوەگرتن دەیتوانی پەیکان کە یەکێکە لە ئۆتۆمبێلە باشەکان، بە کوالیتییە جیهانییەکان بیکڕێت، بەڵام من لە ئێستادا بە مووچەی یەک ملیۆن و سێسەد هەزار تمەنەوە، ئەگەر هیچ خەرجییەکیش نەکەم و تەواوی موچەکەم دابنێم، ناتوانم لە ماوەی دوو ساڵیشدا پراید کە بێ کوالیتیترین ئۆتۆمبێلی جیهانە، بکڕم.
سەعید دەڵیت: لە وڵاتێکی وەکو ئێراندا دەبوایە ئێمە باشترین ژیانمان هەبوایە، من دوای 40 ساڵ کرێکاری لە جیاتی دابینکردنی ژیانێکی باش بۆ خانەوادەکەم، دەبێت ئێستا بە شەرمەزارییەوە کیلۆیەک گۆشتی قیستییان بۆ بەرمەوە و ئەوەش دەبێت بەشی چەندینجار لێنان بکات.
فەرامەرز ڕەحمانی، گۆشتفرۆشت لە شاری #سنە#وە دەڵێت: لە ئێستادا کەمی گۆشت نییە، بەڵام نرخی کیلۆیەکی زیاتر لە 60 هەزار تمەنە و تەنیا بە چینی دەوڵەمەند دەکڕدرێت و ئیمە لە پیشەکەماندا شتی وا دەبینین کە ئازارمان دەدات و ویژدانی هەموو مرۆڤێک دەهەژێنێت، لەم چەند ڕۆژەدا دایکێک هات بۆ دوکانەکەم و کاتێک کە کەس لە دوکانەکەدا نەما، پێیوتم، تەنها دوو پلم گۆشت بەرێ منداڵەکەم سێ مانگە گۆشتی نەخواردووە و حەزی لێیەتی، تەنانەت ئەگەر لە زبڵەکانیش بێت هەر باشە.
وتیشی: ئەمە تەنیا یەک دایک نییە سەدان هەزار بنەماڵە لەم شارە له و بارودۆخەدان، ئێمە دەتوانین فریای چەند کەس بکەوین؟
حەمیدە ئەمین پور، هاووڵاتی لە شاری #سەقز# دەڵێت: خەریکە وەکو ساڵانی کۆنمان لیدێتەوە کە خەڵک تەنیا لە جەژنەکاندا گۆشت و مریشک و برنجیان دەخوارد، هەڵبەت ئەوان گۆشتیان بە کەمی و بە قیست نەدەکڕی و هیچ نەبێت ئەگەر جەژن و جەژن یان میوان و میوان دەیانخوارد، بەڵام گۆشتێکی باشیان دەخوارد نەک وەکو ئێمە تەنیا تامی بکەین.
بابەتی فرۆشی گۆشت و مریشک بە قیست کاردانەوەیەکی زۆری لە ئێران لێکەوتووەتەوە و دانیشتووانی ئێران ئەوە بە بڕیارێکی کاتیی و باش دەزانن، بەڵام وەکو شکانی شکۆی کەسایەتی دەبینن و دەڵێن نازانین تا چەندی تر دەتوانین بەرگەی ئه و بارودۆخ و نەهامەتییانە بگرین؟
ئەم دۆخەی دژوارەی خەڵکی ئێران کە چاوەڕوان دەکرێت لە ڕۆژی 4ی مانگی داهاتووەوە بگاتە ئاستێکی خراپتریش دەرەنجامی قۆناغی یەکەمی سزا و گەمارۆکانی ئەمریکایە بەسەر تاران دا کە کاریگەریی ڕاستەوخۆی لەسەر هاوڵاتیان دروستکردووە.[1]
#25-10-2018#