نامە عاشقانەکان
چیرۆک
ئێدواردۆ گاليانۆ
وەرگێڕ: ئارام ڕەشيد


ساڵان تێپەڕين، ساڵانێکی زۆر و نامەکان ماڵەکەيان پڕ کردبوو. سندوقێکی گەورە و قايمی بۆ هەڵگرتنی نامەکان کڕی؛ لەبەرئەوەی گەنجينەی گەورەی ژيانی بوون. بەمجۆرە پێموايە دە ساڵ، پانزە ساڵ تێپەڕين، بيرم نايەتەوە.
ئەوان بەڕێکەوت بە يەکتر ئاشنا بوون، کە فرەتر عەشقە گەورەکان لەم ڕێگەيەوە ئەدۆزرێنەوە، تاڕادەيەک هەميشە بەڕێکەوت، لە بەهەڵە لێدانی ژمارە تەلەفۆنێک، لە بەريەککەوتنێکی بەڕێکەوت. ئەوەی کە لەمان ڕوويدا بەمجۆرە بوو: پياوەکە لە کۆفێيەک وادەی ديداری لەگەڵ کەسێک هەبوو، کەسەکە نەهات. ئاشکرايە هەراسان لە چاوەڕوانی، ئەو ژنەی لە پشت مێزێکی ناو کۆفێکە بينی، گەش و بەدەماغ. پياوەکە يەک چرکە لێی نەوەستا و بەخۆی گوت: ئێستا مادام تا ئێرە هاتووم، ناتوانم ئەم هەلە لەدەست بدەم.
لە مێزەکە نزيکبووەوە و گوتی: يارمەتی هەيە؟
بە دڵنياييەوە.
شتێکی لەمجۆرە لەو چيرۆکانەی ئەوانی تر بۆت دەگێڕنەوە ڕوو ئەدا، نەوەک لە ژيانی واقعيدا. فرەتر وەختێ دەڵێی: يارمەتی هەيە؟ وەڵام ئەدەنەوە: بۆچی؟
ڕنگبێ ئەويش چاوەڕوانی کەسێکی کردبێت کە نەهاتبوو، کێ دەزانێ، من چوزانم، دەبێ چيرۆکێکی تر بنووسرێ کە تێيدا ژنەکە پێی دەڵێ: بۆچی؟ بەڵام لەمەياندا ژنەکە بانگهێشتی دانيشتنی کرد و ئەويش دانيشت. ئاشکرايە؛ شتێک نەبوو لەبارەيەوە قسە بکەن.
چی دەخوێنيتەوە؟
خراپيی بابەتەکە لەوەدابوو کە پياوەکە هيچ بەرهەمێکی ئەو نووسەرەی کە ژنەکە کتێبێکی دەخوێندەوە، نەخوێندبووەوە. خراپ دەست پێدەکەين، خراپ، فرە خراپ.
ڕۆژێکی خۆشە.
بەڵام دەسەجێ دەستيانکرد بە قووڵبوونەوە، لەبەرئەوەی ژنەکە گوتی: بەڵێ، بەڕاستی ڕۆژێکی خۆشە. سەرباری ئەوەی ڕۆژێکی خۆش نەبوو. بەڵام پياوەکە وردە وردە بەسەر شەرمێونييەکەيدا کە لە شەخسيەتيدا بوو، زاڵ بوو. سەری قسەيان دامەزراند. لە هەوەڵەوە پياوەکە بۆ سەرنجڕاکێشانی ئەو، يەک لەسەر يەک درۆی هۆنيەوە، کە نووسەرە، پاشان دانی پێدانا کە تا ئێستا هيچ بەرهەمێکی ئەميان بڵاو نەکردووەتەوە، بەڵام ئەم درۆيەيان تۆزێک درەنگتر هاتە نێوانەوە، کاتێک بوو کە زياتر يەکتريان ناسی، کاتێک کە لە خواردنەوەی قاوەوە گەيشتبوونە خواردنەوەی عارەق بە کۆکاکۆلاوە.
دواترێک، زانيان زياتر لەوەی پێشتر بيريان لێدەکردەوە، شتگەلێک پێکەوەيان دەبەستێتەوە، باسی فيلمی دڵخوازی خۆيان بۆ يەکتر کرد، لەم ڕووەوە پياوەکە پێی گوت: دەتەوێ بڕۆين بۆ سينەما، فيلمی ژيان جوانەت بينيوە؟
ئەويش: نا.
کۆتايی هەفتە بڕۆين باشە؟
باشە.
ئەو کۆتايی هەفتەيە، من باش نازانم کە بۆ غافڵگيرکردنی ئەو بوو يان نا، بەڵام لەو ديمەنەی کە کوڕيژگەکە دەردەکەوت ئەو دەستی بە گريان دەکرد. ئەمە، ژنەکەی خستە ژێر کاريگەرييەوە. من حەزم لێيە وا بير بکەمەوە کە هەر بەڕاستی بەمجۆرە بوو.
دەرەنجامەکەی ئەمە بوو، کە لە خۆشيگەلێکی زياتردا پێکەوە جۆر بوون، بۆ نموونە لە مۆسيقادا. پێی گوت: ئەم کۆتايی هەفتەيە ئيسماعيل سيرانۆ مۆسيقا دەژەنێ.
ئيسماعيل چی؟
بەڵام تۆ حەزت لە مۆسيقارە گۆرانبێژەکانە، وانييە؟
هەر بەڕاستی حەزم لێيانە.
پياوەکە ڕازی کرد و ڕۆيشتن. وەختێ سيرانۆ دەستيکرد بە چڕينی ئەو ئاوازە مەستانە، پياوەکە بوێری پەيدا کرد و دەستی ژنەکەی گرت. وردە وردە بەجۆرێکی خۆلێلانەدراو عاشقی يەکتر بوون، بەڵام نەوەک بەهۆی ئاوازی ئيسماعيل سيرانۆوە، نەوەک بەهۆی مەستانەبوونيەوە، ڕەنگە بەهۆی گريان بەديار ژيان جوانەەوە بووبێ.
بەيانی ڕۆژێک پياوەکە بێدار بووەوە و لەگەڵ هەڵهێنانی چاوەکانيدا زانی هێجگار عاشقی ئەوە، پاشان لە هەمان ئەو کۆفێيەی بەڕێکەوت بە يەکتر ئاشنا بووبوون، وادەی ديداريان دانا. ساتەوەختە گرنگەکان تاڕادەيەک هەردەم لەگەڵ شوێنەکانياندا بەرامبەر دەبن، زۆر دڵنيا نيم لەوەی کە دەيڵێم، بەڵام ڕستەيەکی باشە. بەڵام لە هەمان کۆفێ بوو کە ژنەکە پێی گوت: دەزانی چی، پێموايە دەبێت لێرە بڕۆم.
من دەمويست پێچەوانەی ئەمەت پێ بڵێم، ئەوەی کە بە درێژايی تەمەن لەگەڵ من بمێنيتەوە.
ژنەکە گوتی: خەمت نەبێت، چونکە من چاوەڕوانی گەڕانەوەی ڕۆژێک دەکەم کە بتوانم دووبارە درێژە بەو ڕێگايە بدەم کە دەستمان پێکردووە. سەرباری ئەوەش، هەموو پانزە ڕۆژ جارێک نامەيەکت بۆ دەنێرم و تێيدا باسی هەموو ئەو شتانەت بۆ دەکەم کە دەيانکەم، هەموو ئەوەی کە هەستی پێدەکەم، گشت ئەو دڵتەنگيانەی کە بەرامبەر تۆ هەستيان پێدەکەم، هەموو ئەو شتە کەمانەی کە بۆ بينينی يەکتر نيمانە.
پياوەکە گوتی: ئێ، باشە. بەڵام ئەگەر نەڕۆيت باشترە.
بەڵام ئەو ڕۆيشت.
ئەوکاتە بوو کە پياوەکە زانی کاری تەواوە، کە خۆی بە عەشق دۆڕاندووە، کە هيچ ئەکسيرێک نييە بتوانێت ئەوی پێ لەبير بکات، کە هيچ دڵنياييەک نييە لەمپەر لە دوای لەمپەری سەر ڕێگای لابەرێ، کە ڕاستە عەشق لە نيگای يەکەمدا بوونی هەيە، ئێ، ڕەنگە عەشقەکانی تريش بوونيان هەبێت؟
ڕێک پاش پانزە ڕۆژ نامەيەکی پڕ لە خۆشەويستی و ماچ و پڕ لە (بيرت دەکەم) گەيشت. پياوەکە گريا و ئەمجارە گريانەکەی هەقيقی بوو. نامەکانی بە خۆشەويستييەوە لەسەر مێزێکی بچووک هەڵدەگرت.
پانزە ڕۆژ تێپەڕی و پانزە ڕۆژی تريش، پانزە ڕۆژی تر و پانزە ڕۆژی تريش، نامەکان کەڵەکە دەبوون. ژيانی بووبوو بە چاوەڕوانکردنی ڕۆژی پانزەهەم، کردنەوەی سندووقی پۆستەکە و بينينی نامەيەکی عاشقانە، کە تێيدا ژنەکە بەڵێنی گەڕانەوە بدات، ژيانی بووبوو بە چاوەڕوانی نامەيەک کە ئەو تێيدا بڵێت بەم زووانە دەگەڕێتەوە.
ساڵەکان تێپەڕين، ساڵانێکی زۆر، نامەکان تاڕادەيەک لە ماڵەکەدا جێيان نەدەبووەوە، سندوقێکی گەورە و قايمی بۆ هەڵگرتنی نامەکان کڕی، لەبەرئەوەی گەنجينەی گەورەی ژيانی بوون، چونکە بۆ خوێندنەوەی ئەو نامانە دەژيا کە ئەو دەينووسين، لەبەرئەوەی ئەوی لە هەر کەسێکی تر زياتر خۆشدەويست، بەمجۆرە وابزانم دە ساڵ، پانزە ساڵ تێپەڕين، لە بيرم نييە.
ڕۆژێکيان ژنەکە بێ هيچ چۆن و بۆچييەک؛ لە نووسين وەستا، ڕۆژی پانزەهەم پياوەکە سندوقی پۆستەکەی بە بەتاڵيی بينی و ناخی دوولەت بوو.
ئێستا بەس دەيتوانی بە يادەوەری بژی، بە دووبارە خوێندنەوەی ئەو نامانەی کە ئەو بەوپەڕی خۆشەويستييەوە بۆی نووسيبوو. ئەو نامانە گەنجينەی گەورەی ژيانی بوون.
ڕۆژێک پياوەکە لە ماڵ چووە دەرەوە -چونکە دەبوو بڕواتە دەرەوە- چەند دز هاتنە ماڵەکە. بە بينينی سندووقە گەورەکە دووجار بيريان نەکردەوە، لەبەرئەوەی پێيانوابوو سندووقەکە گەنجينەيەکی گەورەی تێدا هەڵگيراوە؛ سامانێکی مەزن. بەڕاستی وانەبوو. سندووقە گەورە قايمەکەيان لەگەڵ خۆيان برد.
وێنای نائومێدی کەسايەتييە سەرەکييەکەمان بکە؛ وەختێ دەگەڕێتەوە ماڵەوە و دەزانێ ئەو شتەيان دزيوە کە ئەو لە هەموو شتێک زياتر خۆشی دەويست.
زۆرجار دزەکان کەسانی باشن، لەمەشياندا وابوون؛ کەسانی باش بوون. بەڵام وێنای سيمای دزەکان بکە لە کاتی کردنەوەی سندووقەکەدا کە کۆڵێک نامەی عاشقانە ئەدۆزنەوە، کۆمايەک ڕاگەيەندراوی مەحاڵ. سەرۆکی دزەکان تۆزێک تووڕە بوو. هەڵبەت سندووقەکە قوورس بوو و بردنی بۆ فەرمانگەی پۆليس، بەهايەکی کەمی نەبوو.
پياوەکەی ئێمەش، تاڕادەيەک بەدەم گياندانەوە؛ بەناو کوچە و کۆڵانەکانی شاردا سەرگەردان بوو، بە ئومێدی ئەوەی نامەيەک بدۆزێتەوە، بە ئومێدی ئەوەی کەسێک باس لە سندووقێکی گەورە و قايمی پڕ لە نامە بکات، بێئەوەی بزانێ دەبێ چی بکا.
ئەوەی سەرۆکی دزەکان گوتی ئەمە بوو، کە دەبێ نامەکان بسووتێنن ياخۆ بيانخەنە ناو ڕووبارەوە، بەجۆرێک کە دەسبەجێ بفەوتێن. بەڵام لاوترين دزيان لەوانی تر باشتر بوو، بيرۆکەيەکی گەورە هات بە مێشکيدا.
ڕۆژێکيان پياوەکەی ئێمە، پاش ئەوەی هەموو عەسر و ئێوارە گەڕابوو، گەڕايەوە ماڵەوە و بە کردنەوەی سندووقی پۆستەکە، هەڵيبێنە چی بينی؟ نامەيەک... دزەکان بڕيارياندا بوو نامەکانی بۆ بنێرن، بەڵام بەوجۆرەی کە ژنەکەی فەرمانی پێکردبوون، ڕێک پانزە ڕۆژ جارێک نامەيەک بنێرن.
ئێستا پياوەکە سەرلەنوێ ژيابووەوە، بە ئومێدی گەيشتنی ئەو ساتانەی نامەيەکی تێدا بخوێنێتەوە، کە ژنەکە بڵێت:
بەم زووانە دەگەڕێمەوە.[1]