سکرتێرە 54

هاواری کرد : ئەوە س ئەتوو لاق ئەمن ڕاکێش !؟ گۆتم : وەختی هەندێ نیە، هەستە پەرداخە ئاوەکم لۆبینە، وەڵلا ئەمن ئەوشۆ لە قورپی گەڕامەوە، گۆتی : ئەمن نازانی ئەو قسان، بڕۆ بنووست لە خوار قریۆلە..! گۆتم : بڕوات هەبی خەونەکم دیت، خەونەکم دیت، یاڕەببی دوژمنیش نەیبینی، یا ڕەببی خوایە زۆر شوکر ئەوە چبوو، دە هەستە ئاوەکەم لۆبینە ڕەحمەت لە بابت..! باشبوو هەستاوەو بە پرتەو بۆرە ڕۆیی ئاوم لۆ بینی، تەماشام کرد ئارەقەکی زۆرم کردیە، بناگێشم دەزوراوە، گۆتم : ئەوە ئی خەونەکەیە، دوایێ بەبیرم هاتەوە، جێی شە قا زللەکەی داکی ئەحمەدیە..!
داکی ئەحمەدی پەرداخە ئاوەکەی هیناو هاتەوە، لێم وەرگرت و بە قوومەکی هەمووم ئاواکرد، شهادەکی بەهەقم هیناو پارم داوە، داکی ئەحمەدی گۆتی : ئەو خەوە س ؟ گۆتم : وەڵلا زەلامەک بە تەورداسی تێم وەرهاتبوو، لەت و پەتی کردم و ڕیخەرۆکی لوول دەدام دەیخوارد، کۆمەرە پیرەژنەک پێم پێدەکەنین چار پێنج پشیلەش لە دەم و چاوم وەرئارابوون، بەران لە هیکڕا ئێکەک هات، دوو باری پێوەبوو، ویستی قورتارم کا ! گۆتی : ئەو کێ ؟ گۆتم : ڤڤ..، یەکسەر کێشامەوەو خوا ڕەحمی کرد نەمگۆ ڤارین، دەنا بەو نیوە شەوەی دەبووە جەنگی جیهانی سێیەم، گۆتی : فف کێ ؟ خراپم لێ قەوماو هەرچەند کردم ناوی پیاوکم لۆ نەهات بە ف دەست پێدەکا، دەفەرموو دەی، وەکی ئیشت بە چشتەکی دەبی، لێت بزر دەبی ! گۆتم : ففف، کچێ وەڵلا نازانم کێبوو، لە تاو ڕوحی خۆم زۆر دیقەتم نەدا کێیە ؟ بەران مەعلوم پیاوەکی ڕدێن درێژبوو، گۆتی : خۆت بە ڕدێنی من بگرە با قورتارت کەم !! گۆتی : باشە لۆ ئەو ڕدێن، ئەو نەبوو دەست ؟ گۆتم : برێم چ، ئیدی خەونە، خۆ خەون بە دەستە من و توو نیە..! گۆتی : ئەتوو تەئکید بیاو نە زن ؟ گۆتم : نا، ئا، ئا، ژن ڕدێنی لەکێ بوو، پیاو بوو پیاو، دەبنوو بنوو، درانگە..! باشبوو خوا ڕەحمی کرد لەسەر نەڕۆیی و پاریداوە بنووی، ئەمنیش پارم داوە، بەران نەدەوێرام بنووم، دەترسام دیسان خەونی ناخۆش ببینمەوە، هەرچەند خۆم هەرگێڕو وەرگێڕ کرد فایدەی نەبوو، هەرچی دوعا و ئایەت و سورەتی کورت هەبوو خیندم هەشت فووم لە خۆکرد، چاوم قووچاندو گۆتم : ئەڵلا بە ناوی توو دەنووم..! وەختەکی خەوم لێکەت..!
لەگەر مەلای بەیانی بە خەبەر هاتم، هەستام دەستنوێژم شووشت و نوێژی سبەینێم کرد، زۆرم دوعا کرد، خوای مەزن بە هانام بێ و لەو وەزعەی قورتارم کا، وەختەکی بە تووندی لە دەرکەی درا، گۆتم : یا ئەڵلا خێر، دیسان قەوما، قوڕگم هیشک بوو، وای لۆ چووم دیسان هاتبن بمبەن و بمگرنەوە، نەمزانی چبکەم، دەرکەی بکەمەوە یان نا !؟ گازی داکی ئەحمەدیم کرد، گۆتم : هەستە، هەستە ! بە مشەوەشی هەستا، گۆتی : دیسان هەر خەو ناخۆش ؟ گۆتم : ناوەڵلا، دەرکەیە و زۆر بە تووندی لێدەدەن، فەقیرەی ئەویش مشەوەش بوو، گۆتی : سبکەین ؟ گۆتم : بەخۆشم نازانم، پێت کووە بە سەربانی دا خۆم ئاواکەمە مارە جیرانان و هەرێم، گۆتی : وەڵلا ئەهوا ئەتوو دەکووژ، ئەمن دەچی دەکات دەرکە، ئوو ئەڵلا کەریم..! ئەو چوو دەرکەی بکاتەوە، ئەمنیش لەکن پەنجەرەی ڕاوەستام لە پەنا پەردەی تەماشا دەرێم دەکرد، دیتم دەرکەی کردەوە، هەرکە کەس بەتووندی پاری بەداکی ئەحمەدی وەنەناو فڕێی نەداو نەهاتە ژۆرێ، زانیم نەهاتینە بمگرنن، پشیەکم هاتەوە بەرێ، ئەوەی مابوو بزانم کێیە ؟ وەختەکی داکی ئەحمەدی هاتەوە، گۆتی : بڕۆ دەرکە، ئەو جەعۆ هاتی، ئوو ئیش بەتوو !! گۆتم : نەیگۆ لۆ هاتیە، خۆ چنەبووە ؟ گۆتی : وەڵلا ئەو هینا مندار، ئوو هەر دەگری، گۆتم : جەعۆ دەگریێ ؟ گۆتی : نانا مندار مندار..!
چوومە دەرێ دەبینم جەعۆ ڕاوەستایە و دەستی مندارەکی هەشت نۆ ساری گرتیە، بەخێراتنم کردو گۆتم : خێرە خۆ چنەبووە ؟ گۆتی : وەڵلا قسوورم عافوو کە بەو بەرە بەیانەی هاتیمە، گۆتم : خێرە ؟ گۆتی : وەڵلا ئەوە برازامە، هەر دەگریێ و خەوی لێناکەوی، هەر دەنووی، دەزیڕێنی و بەخەبەر دێ، دەرێ خەونی ناخۆش دەبینم، گۆتم : ئەوجە چ بەمن دەکرێ ؟ گۆتی : وەڵلا ئەتوو کوڕی پیاوەکی گەلە نازداری، دە دوعایەکی لەسەر بخینە، بەشکوو خەوی لێدەکەوی..! گۆتم : مەیموون بەخۆی چنەبوو، سۆریکەشی لە قوونی هاتبوو..!
جەعۆ گۆتی : وەختی هەندێ نیە، قولوەڵلایەکی لەسەر بخینەو پفەکی لەسەری بکە، بەشکوو خەوی لێدەکەوی، ئەوشۆ نەیهێشتیە کەس بنووی ! گۆتم : ئەتوو جارێ لەوەی گەڕێ، کەس بەو مەلا بانگدانەی لەدەرکەی کەسی دایە، ئەتوو بەخۆت دەزانی ئەمن قوونم بە دووکەرەو هەزارو یەک کێشەم هەیە، وەڵلا وەبیللا زەندەقی من و داکی ئەحمەدیت برد ! گۆتی : گدۆ چارم ناچار بوو، ئەو تووخمە سەیە ئەوشۆ دکری بە هەمووان کردیە، هەر چاوی دەچووە سەر یەکدی و دەیزیڕاند، گۆتم : باشە دەبی نەخۆش نەبی ؟ گۆتی : نەخۆشی چ ؟ گۆتم : مەسەلەن میزی گیرابی، جێیەکی بێشی ؟ جەعۆ گێی ڕاستی مندارەکەی گرت و ڕایکێشاو برندی کرد، گۆتی : چ جێت نایێشی کورە، مندارەکە چاوی سپی ببۆوە لەتاو ئازاری گێی، گۆتی : با با..! جەعۆ گۆتی : کێندەرت دێشی کورە ؟ بەستەزمانەی گۆتی : گێم دێشی گێ، وەختە لەبن و پۆتکی بێتە دەرێ..! باشبوو جەعۆ گێی بەردا، گۆتی : ئەدی میزت گووت نەگیرایە ؟ گۆتم : جەعۆ ڕجات لێدەکەم وازی لێبینە، وەلەو ئەوشۆ ئەمنیش بەخۆم هیچ نەنووستیمەو هەر تێیان هەردایمە، بەران بیهینە با دووعایەکی لەسەر بخینم ! جەعۆ گۆتی : ئەتوو لۆ نەنووستی ؟ گۆتم : هەر خەونی ناخۆشم دەبینی و لەخەوێ لێیان دەدام و تێیان هەردەدام، نازانم مەسەلە چیە ؟ گۆتی : دەتوو ئەو سوڕگوومەی بە ڕێکە، خوا کەریمە لۆ توو..!
دوو سێ سورەتی کورتم لەسەر مندارەکەی خیندو هەندە دوعام لۆ کردوو دووسێ پفم لەسەری کردو شەقەکم لە سینگ و پشتی داو گۆتم : چادەبی ئیشاڵلا، جەعۆ گۆتی : هەربژی گدۆ، ڕووی لە مندارەکەی کردو گۆتی : گێ بدەمن سەیە، ئەگەر چابووی، بە بابە سەرسەریەکەت برێ بەرخەکی خڕی قەرەو لۆ مام شێخی بینی..! گۆتم : دەی بزانە فێرە ئەو بەزمەشم ناکەی ! گۆتی : کورە دەلێگەڕێ گدۆ، بابینی بینی، بابی هەنکی حەفت جوولەکانی هەیە، گۆتم : بەخوای بشهینی دەینێرمەوە، ئەوجە چشتی ئەوها نەکەی ! گۆتی : دەمزانی ئەوەش دەکەیە بەزمی وەزارەتەکەی، ئەمن دەرێم با ئیشەکت لۆ بینمەوە، ئەتوو بەخۆت پێلەقەی لە بەختی خۆت دەدەی ! گۆتم : جەعۆ خێرت دەگاتێ وازم لێبینە، بابچم بڕەکی پاردەمەوە، بەشکوو خەوم لێدەکەوی ! گۆتی : ناوەڵلا لۆ نایێ چشتەکی بکەین ؟ گۆتم : چبکەین ؟ گۆتی : گازی عەوڵارۆکیش دەکەین و بابچینە تەعجیلی و لێدەین لە تەشریفەکی ! گۆتم : زۆر مەمنون، ئەوڕۆ لێگەڕێ چونکە هیچم پێناخورێ..! گۆتی : دەباشە مادەم وەیە دەڕۆم، دەستی مندارەکەی گرت و گۆتی : گێبدە من، سەی خۆڕی، ئەوە مام شێخ دوعای لەسە خیندی، ئەوجە لە خوام دەوێ نەتۆپی، وەڵلا بە پێلەقان گوونت دەتەقێنم ! منداری بەستەزمان زەندەقی چووبوو، لەترسان هەر دەیگۆ : باشە باش..! وەلحاسر جەعۆ ڕۆیشت و ئەمنیش چوومەوە ژۆرێ..!

داکی ئەحمەدی گۆتی : ئەوە جعفر سدەوێ ؟ گۆتم : وەڵلا برازایەکی هینابوو، دەیگۆ : خەوی لێناکەوی بەشکوو دوعایەکی لەسەر بخینی ! گۆتی : ئەتوو بخینم ئەو دووعا ؟ گۆتم : بەرێ ! گۆتی : خخخخخخ، گۆتم : لۆ بابە، دیارە ئیعتیراف بەمن ناکەی، گۆتی : خەو ئەتوو زۆر باش، ئەوجە نۆڕە ئەو منداڕ..! گۆتم : لەگە توو فایدەی نیە، ئەوجە با بڕەکی پاردەمەوە، بەشکوو خەوم لێدەکەوی..!
خەوم لێکەتبوو، دیسان پیرەژنە پیس و پۆخلەکان هاتنەوە خەونم، هەر چار دەوریان گرتبووم و بە گۆپاران لێیان دەدام، دەموویست هەرێم نەمدەتانی، وامزانی هەردوو لاقم بەسترایتەوە، تەماشا لاقم کرد کرابۆوە، وەی بابە بەگۆپاران لێیان دام، هاوارم دەکرد دەنگم نەدەهاتە دەرێ، دەتگۆ مۆبایلم و لەسەر سامتی داندرایمە، ئەوجارە ئاگرەکی زۆر گەورەیان کردەوە، بۆڕیەکی گەورەیان هیناو تووند لەو بۆڕیەیان بەستام، برندیان کردم و هاویشتمیانە سەر ئاگرەکەی، لەدەورم پێدەکەنین و هەلهەلەیان لێدەدا، خێ و بیبەرو بە هاراتیان پێدادەکردم و بۆڕیەکەیان دەسووڕاندو هەرگێڕو وەرگێڕیان دەکردم، وەختەکی دیتم زەلامە پیس و ناشیرنەکەش بە خۆو بە تەورداسەوە پەیابوو، مڕەمڕی ڕۆژە ڕێیەک دەڕۆیی، دەستی دا مەنجەرەکی پڕ ئاوی تەماتەو هات بەسەری داکردم، لە تۆقی سەرم ڕا هەتا بنی پێم بووە ئاوی تەماتە، ژنەکانیش هەر دەپەڕین و گۆرانیان دەگۆ، بەین بەینیش دەفڕین و لە عاسمانێ لەسەر سەرم دەسووڕانەوە، قرچەقرچی گۆشتی ڕان و سینگم دەهات و دەبرژا، ئەمن یەک بەدەنگی هاوارم دەرکردو دەگریام، نە دەنگم دەهاتە دەرێ و نەکەسیش گێی بەمن دەدا، لەو وەزعە ناخۆشەی دابووم، وەختەکی عاسمان شەقی بردو تەیرەکی زۆر گەورەی لێ هاتە دەرێ، تیژ وەکی تەیارەی لۆلای من هات، تەماشام کرد ڤارینی سکرتێرەم لەسەر پشتی تەیرەکەی دانیشتیە، دەستی درێژ کردو هاواری کرد : دەستت بدەمن با قورتارت کەم، چونکە دەستم تووند بەسترابۆوە نەمتانی درێژی کەم، پیرەژنەکان و کابرای تەورداس لە دەست شەڕیان لەگەر تەیرەکەی ڤارینی دەکردو دەورەیان لێدابوو، بەهەمووان دەیان ویست ئەو تەیرەی بکوژن و ڤارینیش بگرن و بیهاوێنە ناو ئەو ئاگرەی ! خۆم لە بۆڕیەی هەرتەکاندو خۆم هیناو برد بەشکوو خۆم بکەمەوە، وەختەکی ڤارین فرسەتی وەرگرت و شیرەکی گەورەی سپی سپی پێبوو، ڕایووەشاندو لەوسەری بۆڕیەکەی دا، خوا ڕەحمی کرد بۆڕی بەربۆوەو شرپەم لێوەهات، لەگە شرپەی تەقەی سەرم هات و بەخەبەر هاتم، وەکی تەماشا دەکەم لەسەر قەرەوێرەی بەربوویمەوەو پشتی سەرم بە عاردی کەتیە..!

هەستامەوە تەماشام کرد داکی ئەحمەدی لەسەر قەرەوێرەی نەمایە، تەماشا سعاتیم کرد، نۆی سبەینێ بوو، گۆتم : هەستم باشە، دەستنوێژەکی جوانم شووشت و مۆبایلم لەسەر شەحنی هینا خوارێ و چوومە خوارێ لۆ هۆری، دوو ڕکەعات نوێژی چێشتانم کردو زۆرم دوعا کرد خوا لەو بەرایەم لادا، دیتم داکی ئەحمەدی نانی بەیانی دانایەو چاوەڕێیە بێم دانیشم و بیخۆین، بەیانی باشم لێکردو دانیشتم، ئەستووکە بەکونجیەکی دامێ، دەتگۆ ڕوحە، گۆتم : ئەوە لە کێت هینایە ؟ گۆتی : وەڵلا کاک جەعفەر هینا لۆمان ئوو گۆت بدە کدۆ ئەو نان، گۆتم : خۆ هیچی دی نەهینایە ؟ گۆتی : نا بەس ئەو ئەستووک، لۆ دەینی هیس ؟ گۆتم : وەڵلا دەیگۆ بەرخەکت لۆ دەینم لە کن برام، گۆتم ئەگەر هینایتی لۆی بنێرمەوە، گۆتی : ناوەڵلا نەهاتم ئەو بەرخ..! گۆتم : دەوجە بەو دەستە ناسکانەی خۆت، چایەکی دەرەجە یێکم لۆ تێکە ! گۆتی : سەرساو، ئوو عافیەت ئەتوو ئەو چای، بەس ئەتوو وەزعت باش، ما ئەو جانە سەر ؟ گۆتم : ئەرێوەڵلا مایەو خەونی زۆر ناخۆشیش دەبینم، لەخەونێ کۆمەرە پیرەژنەکن دەیانەوێ بمکوژن ! گۆتی : ئەو کووشتن مووشکیلەم نیە، بەس نەینی زن دوو..! گۆتم : کورە برێ ژنی سێیەم، دووم هینایە ! گۆتی : دوو ئەو سێ ئەمن ڕەفز ڕەفز ئەو مەوزوع ! گۆتم : ماشەڵلا وەزعم هەند باشە ئەوجە نۆبەتی ژنی سێیەمە..! لەو قسانە دابووین جەعۆ تەلەفۆنی کرد، وەرامم نەداوە، گۆتم : نانەکەی دەخۆم، ئەوجە وەرامی دەدەمەوە، جەعۆ وازی نەهینا ممکینە هەشت جار نۆ جار تەلەفۆنی کردەوە، گۆتم : هەرنەگرم هەونکە دەگاتە مارێ، وەرامم داوەو گۆتم : فەرموو ! بێ سەلام و کەلام گۆتی : کورە گدۆ ئەوە ئەتوو چ شێخەکی و ئەمن نەمزانیە ! گۆتم : خێر ! گۆتی : ماخران دووعات ئێکاو ئێک بوو، ئەو مندارە سەر سەیانیە، نەگەیشتبووینەوە مارێ دەبۆرژا، هەر گەیشتینەوە ژۆرێ یەکسەر سەگتۆپ بوو، بڕوات هەبی تازە بە زۆریمان هەستاندیە، گۆتم : ئێ دەلێی گەڕابان با بڕەکیدی بنووستبا ! گۆتی وەڵلا لێی دەگەڕاین، بەران خەلەلەکی فەننی ڕوویدابوو، گۆتم : خەلەلی فەننی چ ؟ گۆتی : وەڵلاهی دوعایەکەی توو زیڕەی لێبڕیبوو و چاویشی قەپات کردبوو و خەوی لێکەتبوو، گۆتم : ئێ !؟ گۆتی : بەران خوارێی کردبۆوەو پڕی بنەخۆی گوو کردبوو..! بەو قسەی جەعۆی زۆر تەریق بوومەوە، گۆتم : کاکە چیدی مەیهینە کنە من و دوعای لۆناکەم ! گۆتی : ناوەڵلا ئەگەر ئەوجارە هینام دووعایەکی وای لۆبکە، سەرو بنی قەپات کەی..!
نانم خواردو چایەکم لەسەر کردو چووم لە هۆری دانیشتم، ویستم تەلەفزیۆنی پێکەم و بزانم دەنگ و باس چیە، دیتم جەڕەسی مۆبایلەکەم لێیدا، تەماشا ژمارەکەم کرد دیتم ئی وەزیری ناوخۆیە، سەرم سوڕما، گۆتم : مەعقولە تەلەفۆن لۆمن بکا، هەرم نەگرت، گۆتم : لەوانەیە لە دەستی دەرچووبی، یان مندارەکانی گەمەیان لەگەر کردبی، بڕەک پێچوو دیسان کردیەوە، گۆتم : تەواو دیارە ئیشی بە منە، وەرامم داوەو گۆتم : ئەلۆ ! گۆتی : ماندی نەبی ! گۆتم : سوپاست دەکەم بژی، گۆتی : وەزعت کووە ؟ گۆتم : بەخۆت دەزانی کووە، پێویست دەکا بپرسی ! گۆتی : دەتوو ئیشەکەی ئەوها لێمەکە، ئەمن تەلەفۆنم کردیە هەتا دوو قسان بکەین، نەک بکەویەو گلەیی و گازاندان ! گۆتم : برێ ئەمرکە ! گۆتی : وا لە ڕێیێمەو دێم قاوەکت لەکن دەخۆمەوە، گۆتم : دێیە مارێ ؟ گۆتی : ئا ئا، ڕەحمەت لە بابت..! پێم عەنتیکە بوو گۆتی دێمە مارێ، لۆیێ بەینەکی دامام و فکرم کردەوە، گۆتی : چیە دەرێی پێشوازی لە مێوانان ناکەی، لۆیێ بێدەنگی ! گۆتم : ناوەڵلا، لە خزمەت داینە، بەران پێم عەنتیکەیە دێیە کنم، گۆتی : پێت عەنتیکە نەبی و بە نوێنەرایەتی سەرۆک وەزیرانیش دێم..!

هەندەی نەبرد لەکۆرانێ بووە ویقە ویقی تڕومبێلان، زانیم وەزیری ناوخۆ گەیشت، چوومە دەرێ لۆ پێشوازی، لە تڕومبێلی هاتە خوارێ بە زەردەخەنەوە لۆلای من هات، سەلامی کردو دەستی درێژ کرد لۆ دۆقەی، دۆقەم لەگەر کرد و باوەشی تێهەرینام و سێ چار ماچی لێکردم، دەستی لەسەر شانم داناو گۆتی : بەڕاستی غەریبیم کردبووی، بەران نابی گلەیی بکەی، لە قسەکەم تێدەگەی وەنیە ؟ گۆتم : ئا ئا، تێدەگەم، دەفەرموو بچینە ژۆرێ، ئیدی پێکەوە چووینە ژۆرێ و لە دیوەخانی دانیشتین، بەگەرمی بەخێراتنم کرد، دەستمان بە قسەی ئەولاو ئەولاو کردو قاوەکەمان خواردەوە، پاشان گۆتی : ئێ وەزعت کووە، بە چ خەریکی، چ دەکەی چ ناکەی ؟ گۆتم : وەڵلا بە هیچ خەریک نیمەو زیاتر لە مارێمە، کێوە بچم، ئەوەنیە ئەنگۆ موراقەبەتان لەسەرم دانایەو کووی بجوولێمەوە ڕاپۆرتتان لۆدێ، بەخۆت لەمن باشتر دەزانی ! گۆتی : ئەو هوردە شتانە هەردەبی دەبی، وەعدبی ئەوەش نێلین، گۆتم : وەڵلا هیچتان تێنەهێشتتەوە، ئەوەی بە منتان کرد بەکەس نەکرایە، لە هەمووش خۆشتر دونێ وەزیری تازەی ژنان دەیگۆ دەیدەینە دەستەی دەست پاکی و دادگای، بە تۆمەتی گەندەڵی..! گۆتی : کورە فشەیە فشە، ئەتوو دری خۆت تووند مەکە ڕەحمەت لەبابت، ئەمن هاتیمە لاپەڕەکی نوێ هەردەینەوە، گۆتم : وابزانم گەیشتینە بەرگی ئاخیری و هیچ لاپەڕە نەمایە هەردەینەوە، گۆتی : مایە ما، پاشان تەماشا حیمایەکانی خۆی کرد کەلە ژۆرێ بوون، گۆتی : بڕۆنە دەرێ و بە، جێمان بێلن، زووبن دەی..! وەڵلا حیمایەکان سەرو تەحیەیان کردو یەکسەر چوونە دەرێ..!
بەینەکی بێدەنگ بوو، ئەوجە گۆتی : کاکە، سەرۆک وەزیران ئەمنی ناردیەو ڕێزو ئیحتیرامی لۆ جەنابت هەبوو، بەگەرمی ئەخباری تووی دەپرسی، بەخۆی تەلەفۆنی لۆ کردم و گۆتی : وەرە ئیشم پێتە، هەستام چووم، گۆتی : بەزووترین کات دەچیە کن وەزیری کاروباری ژنان و سەلامی منی لێدەکەیی و ئەو پەیامەی منی پێدەگەینی..! گۆتم : سوپاسی دەکەم، بەران پەیامەکە چیە !؟ گۆتی : وەڵلا تەکلیفت لێدەکا و دەرێ بابێتەوە دەیکەینەوە وەزیرو ئەوی ڕۆیی ڕۆیی، لاپەڕەکی نوێ هەردەدەینەوەو مەلەفی گەندەڵیەکەشی دادەخەین و چیدەوێ دەیدەینێ ! گۆتم : ئەوە کووە ڕەحمتان جولایەو لێم دەپێچنەوە، پاش ئەو هەموو لێدان و تێهەردانەی بە منتان کرد، چتان تێدا هێشتەوە هەتا بێمەوە، تازە ئاسان نیە، خێرتان دەگاتێ لێمگەڕێن ! جاری یەکەم بە قسەی سەرۆک وەزیرانی بوومە وەزیرو غەرەتەکم کرد، ئەوهام بەسەرهات کە بەخۆت دەزانی، تەئکیدم ئەوجار بێمەوە سەرم بە فەتارەت دەچی، گۆتی : نانا شتی وەها نابی، ئەوە سەرۆک وەزیرانیش ئەمری کردیە، معاشی ئەو چەند مانگەی وەرت نەگرتیە هەمووت لۆ سەرف کەن و سایەق و حیمایەکەشت لۆ بگێڕینەوەو سەت ناویشم بدێ لە خزم و کەس و عەشیرەتەکەت هەتا لۆت تەعین کەین، گۆتم : چیدیش ؟ گۆتی : جەنابی بڕیاری دا تڕومبێلەکەشت لۆ بگێڕینەوەو لەسەر ڕێی شەقراوەش مەزرەعەکی پێنج دۆنمی کاملی کردیتە هەدیە لۆ توو، گۆتیە من کلیلەکەی لۆ ببە، بەران دوایێ گۆتی : حەزدەکەم بەخۆم بیبینم و کلیلەکەی بدەمێ..! گۆتم : باشە ئەو هەموو چشتە لە پێناوی چ ؟ گۆتی : وەڵلا لە پێناوی داواکاریەکی زۆر بەسیت و گچکۆکە، گۆتم : چیە ئەو داواکاریە گچکۆکە، گۆتی : ئیمزایەکی لۆمە بکەی و ئیعلانیش بکەی کە لە حیزبەکەی خۆت وازت هینایەو هاتیە ناو حیزبە تێکۆشەرەکەی مە..!

گۆتم : چیدیکەش ؟ گۆتی : ماوە ماوە کە شتەک دروست بوو، لێدوانەکمان لۆبدەو کوومان دەوێ ئەوها قسان بکە ! گۆتم : یەعنی ئەگەر گۆتتان ماست ڕەشە برێم ڕەشە ! گۆتی : ڕەحمەت لە بابت، ئیدی لۆخۆت دەکەویە ناوێ، خەمی هیچت نابی، هەر وراتەکیش حەزت لێبی سەفەری لۆبکەی، ئەمە ڤیزەو هەموو چشتت لۆ تەرتیب دەکەین، با چشتەکی دیشت پێ برێم، گۆتم : فەرموو ! گۆتی : ئەوجارە وەزارەتی ژنانت نادەینێ، وەزارەتەکت دەدەینێ زۆر مهیم بی و ڕاست و چەپ بکەویە ناوێ..! گۆتم : ئەگەر نەیکەم ؟ گۆتی : بەخۆت زەرەر دەکەی ! گۆتم : ئەوە هەڕەشەیە ؟ گۆتی : شەرت نیە، بەران تووشی هەر چشتەکی بی ئەمە بەرگریت لێناکەین و چت بەسەبێ بەخۆت مەسوولی..!
نەموویست دەم و دەست وەرامی وەزیری ناوخۆ بدەمەوە، گۆتم : یەک دوو ڕۆژ مەجالم بدەنێ، با فکرەکی لێبکەمەوە، گۆتی : وەلەو فکر کردنەوەی ناوێ، خەرکی دی هەیە سەت دەستی ماچ دەکا ئاوڕەکی لێبدەینەوە، بەران با نەک دوو ڕۆژ حەفتەک لۆ توو مەجال بی، ئەگەر وەرامەکەت بەدری مەبی، ئەوە داواکاری توو کراوەیەو هەرچیت بووێ، سەرۆک وەزیران لۆت جێبەجێ دەکا..! گۆتم : باشە بابزانین کوو دەبی ! وەزیری ناوخۆ هەستاوەو گۆتی : ئەوجە ئەمن دەڕۆم، چاوەڕێی وەرامی توومە، گۆتم : بەخێربێی سەرچاوان، هەتا دەرکەی لەگەری چووم، پێشی سواری تڕومبێلی بی، دەستی لەسەر شانی دانام و گۆتی : خۆ لۆ کێ خراپ دەکەی، بڕوا بکە کەس منەتی پێنیە، هەر چشتەکیشت بەسەر بێ، دەرێن خەتای خۆیبوو، خوا دەرکەکی لێکردەوەو بەسەری داباراند، بەران نەیزانی بخوا..! هیچم نەگۆ، بەس زەردەخەنەکم لۆکرد، ئەویش سواری تڕومبێلی بوو و ڕۆیی..! هەر پاش ڕۆیشتنی وی، دیتم تڕومبێلە شینەکەش ڕۆیشت و وازی لە چاودێریکردنی من هینا، دیارە ئەوەش بە مەبەست بووە..!
چوومەوە ژۆرێ، هێشتا نەگەیشتبوومەوەو لای دەرکەی مام عەوڵا هات، گۆتی : ئەرێ ئوستاج ئەو هەرایە چبوو، ماخران سێ جاران هاتم بێمە ژۆرێ، چەکدارەکان نەیانهێشت، گۆتم : بابە ئەمن عیمایەی ئوستاجیمە، گۆتیان ناخواو لێرە ڕانەوەستی، ئیدی چوومەوە ژۆرێ هەتا ڕۆیشتن..! گۆتم : دەوەرە بابچینە ژۆرێ و دوو قسان بکەین و چایەکی لەسەرکەین، چووینە ژۆرێ و هەر دانیشتین جەعۆ هات، پێنج شەش منداری سەرکەو بنکەی لەگەربوو، سەلامی کرد، گۆتم : جەعۆ ئەو مندارانە چیە ؟ گۆتی : وەڵلا ئی کۆرانێنە، داکیان وا لەگەریان هاتینەو لە پێش دەرکەینە، زانیتیان دونێ شەوێ دوعات لۆ برازایەکەی من کردیەو خوا شفای ناردیە، داوا دەکەن دوعای لۆ مندارەکانیان بکەین..! گۆتمە جەعۆی : ئەتوو شێتی، بێ عەقری، مێشکت نیە، دەتەوێ لەو گۆڕەی ئەمن تووشی کێشەو دۆخەی کەی، دوایێ ئەمن تاقەتم هەیە هەر مندارەکی دوعای لۆ بکەم پڕی بنە خۆی بکا، گۆتی : نانا وانابی، بە نەوعەکی دوعای بکە، بنی سەببە بکەی و درۆپەی نەکا، دوایێ لە بێ ئیشی باشترە، وەڵلا زۆر کەس بەو عارەی کەتە ناوێ و فوول بوو، دەتووش دەست بەو کاسبیەی بکە، وەڵلا پارووت دەکەوتە ڕوونی ! گۆتم : هەر ئێستا ئەو مندارانە دەنێریەوەو فەوری دێیەوە ئیشم پێتە، گۆتی : ئەدی چ بەو ژنانەی دەرێ برێم، گۆتم : برێ وازی لە دوعایان هینایەو نایکا..! یاڕەببی خوایە، ئەو بەرایە چیە تووشی من بووە..!

جەعۆ گۆتیە مندارەکان : پێشم کەون کورە، پیسی سەییانینە، دەرێی مەیمونن و سواری تانکی گووی بووینە، یاڵلا لۆ دەرێ یاڵلا، یاشێخ مەجالی نیە دوعاو لۆبکا..! جەعۆ چووە دەرێ و ئەمن و مام عەوڵا دانیشتینەوە، وەختەکی جەعۆ هاتەوە، گۆتی : وەڵلا هەموو ڕۆیشتن ئیللا پیرەژنەکی منجڕ نەبی، دەرێ بمکوژن و بمبڕن ناڕۆم، هەتا یاشێخ دەستەکم بەپشتی دانەینی و دوعایەکم لۆ نەکا، دەرێ وەختی خۆی چوویمە کن بابی، دوعایەکی لۆ کردم ئێکاوئێک بوو، پێش دەرکەی بەرنادەم هەتا دوعایەکم لۆ نەکا..! مام عەوڵا گۆتی : ئوستاج بڕۆ قوڵوەڵلایەکی لەسە بخینەو بەڕێیکە، بەخوای جەعۆی سەگ جسنات بە هەوەنتە وازت لێناینی..! گۆتم : بڕوات هەبی ناچم، هەر ئەو نزمە مابوو جەعۆ دەرینی، چ ئیش و کارم نیە خەریکی مندارو تارو پڕو پیرەژنی جەعۆی بم، مام عەوڵا بەخۆت بڕۆ بەڕێیکە، باشبوو مام عەوڵا بەگێی کردم و چوو پیرەژنەکەی بەڕێکا..!
جەعۆو مام عەوڵا هاتنەوە، گۆتم : چتان کرد ؟ مام عەوڵا گۆتی : وەڵلا گۆتم هێوارێ وەرنەوە یاشێخ مەجالی نیە، گۆتم : بەس برێن یاشێخ با نەچم خۆم لەسەر ئەو بانەی فڕێ دەمە خوارێ، جەعۆ گۆتی : وەڵلا خۆش فڕێ دەی هیچت لێنایێ، تازە ئەتوو جدت بە قەوەتە، گۆتم : واز لەو قسە قۆڕانە بینن، تازە وەزیری ناوخۆ هاتبوو، ئەلێرە دانیشتبوو، جەعۆ گۆتی : بەڕاستتە ؟ وەڵلا ئەمن هەر ئاگام لەو هەرایەی نیە، مام عەوڵا گۆتی : ئەمن ئاگام لێبوو، بەران نەیانهێشت بێمە ژۆرێ، دەلۆمان باسکە بزانین لۆچ هاتبوو، گۆتم : وەڵلا هاتبوو، دەیگۆ وەرەوە هەتا وەکی جاران وەزارەتەکت بدەینێ، جەعۆ گۆتی : دەزانم چت گۆتیە ؟ گۆتم : چم گۆتیە ؟ گۆتی گۆتیت یەک شەرتم هەیە، ئەویش ئەوەیە، ئەگەر جەعۆو عەوڵام لەگەرم نێنەوە ئەمن نایێمەوە..! مام عەوڵا گۆتی : ماشەڵلا کەری جەعۆ، کورە هەی خوێڕی، هەونکە ئەمن برێی هەر مەجالەکی تێدا، بەران ژووشکەکی وەکی توو چیە، هەتا ئوستاج بتهاوێتە ناو شەرت و شورتی، هەتیم دەرێی جیقنەی، ئەوجە جیقنەی کۆتری ورفەش..! جەعۆ گۆتی : هەرچیبم لەتوو باشترم خۆت دیتیە، دەرێی سەیوانە ملەوەنەکانی ئەوجە سێ چار تێلت پسایە..! گۆتم : وەختی هەندی نیە ڕجائەن، کاکە ئەمن شەرتم لۆوی دانەنا، ئەو شەرتی لۆمن دانا، گۆتیان شەرتی چ ؟ گۆتم : وەڵلا گۆتی دەبی لۆمان ئیمزاکەی و وەگەرەمە کەوی، هەرچی داواشت لێدەکەین لۆمان بکەی، مقابیل بەوەش هەرچیت بوێ دەتدەینێ، خانی، مەزرەعە، پارەو پول، هەروا بێتەوە سەت کەسیشت لۆ دادەمەزرێنین ! جەعۆ گۆتی : قاتی ڕەفزت نەکردیە، گۆتم : وەڵلا گۆتم مەجالەکم بدەنێ فکرەکی لێبکەمەوە، جەعۆ گۆتی : ئەوجە فکر کردنەوەی لۆ چیە، بێ سێ و دوو بیکەو ئاوی لێمەخۆوە..! مام عەوڵا دامابوو، هیچ قسەی نەدەکرد، گۆتم : لۆ قسەکی ناکەی ؟ گۆتی : وەڵلاهی چبرێم، ئەتوو دارەکت بەدەستە هەردوو سەری بەگووە، دەیکەی هەروەی، نایکەی هەروەی، وەڵلاهی ئوستاج ئەتوو وەزیر بووی، دوایێ ئەتوویان گرت و چنەما پێت نەکەن، خوا ڕەحمی کرد نەیانکووشتی، پاش ئەو هەموو ئەزیەت و تێهەردانەی دەچی چدەکەیەوە، وەڵلا بچیەوە دەبی بەچاو شۆڕی بچیەوە، هەرچی داوات لێبکەن دەبی بیکەی، ئێ بڕوات هەبی نەیکەی، زۆر ئیحتیادیە دیسان بتهاوێنەوە ژۆرێ و لەجاری یەکەمت خراپتر لێبکەنەوە، ئەگەر ناشیکەی دەبی چاوەڕێی ئەوەی بکەی تووشی دەردەکیت بکەن و بە سانایی وازت لێنەینن، لەهەردوو لای تێچووی، ئەتوو دەبی ئەو لایەی هەربژێری کەبەسەر برندی بمری، با هەموو ماری دنیایێ ئیتوو بی، وەکی خەرک تف و نەعلەتت لێبکا، چ فایدەی هەیە، دەبینی ئەوانەی گێڕیان گۆڕی و خۆیان فرۆشت لۆ تڕومبێلەک و مەزرەعەکی خەرک چیان پێدەرێ !؟ ئوستاج پیاو یەکجار دەمری، ئەوجە بەسەر برندی بمری باشترە..!
مایتی[1]