عەدێ و مەدێ 77
گۆتم: هەونکە خانیەکی بەکرێم لۆ پەیا دەکەی یان نا؟ گۆتی: بە کورتی و کوردی پێت برێم، ناوێرم لۆت پەیاکەم، وەڵلا دەترسێم ڕۆژەکی بێن ئەوها بە شەق و شوللاق بمبەن، هەنگی کێ بە هانام دێ، کاکە وازم لێ بینە، با لەسەر نیو کرێی خانی لە تڕی سەی نەچم! گۆتم: کورە ئەتوو لۆ ئەوها زەندەقت چووە هەی مارت خرانەبی، گۆتی: کورە برای شیرنم، لەو وراتەی نە قانوون هەیە، نە دەستوور، کێ چەک بە دەستبی ئەو حوکم دەکا، هەمووی خەریکی تیجارەت و پارە پەیدا کردنیە، جادەیان نەهێشت، عاردی ڕوکنیان نەهێشت، دائیرەی حوکمەتیان نەهێشت، ماخران تێکی دەدەن و دەیدەنە پیاوەکی و ئەویش بینایەکی لەسەر قیت دەکاتەوە، نە کارەبان کارەبایە، نە ئاون ئاوە، نە نەفتن نەفتە، نەژیانن ژیانە، وەکی قسەش بکەی دەرێن: ئەتوو خائینی و زدی ئەو ئەزموونەی، ئێران و توران بە کەیفی خۆیان تەڕاتێنیتیان و چیان بوێ دەیکەن، ئاخر چشتی وا لە چ مەملەکەتی هەیە، مریشکی سلێمانی نابی بێتە هەولێرێ و ئی هەولێرێش نابی بچتە سلێمانی، ماخران هەتا بە بەشەری ڕادەگا، مریشکیشیان فێرە دوو ئیدارەیی کرد! توخوا ئەگەر چیدی قسەم پێبکەی، لێم گەڕێ با هەر لە هەناوی خۆم دابی، ئەتوو وەرە بچی لە کەبابخانەکی دوو کەبابی سندان کەی، زەریبەی کەبابەکەت لێدەستینن، وەڵلا ئەوها بڕوا زەریبەی گوو کردنێشمان لێ دەستینن! ئەتوو چ دەرێی؟ گۆتم: ئەمن دەرێم سەلامو عەلێک! گۆتی: سەلامو عەلێک چیە؟ گۆتم: ئەوە برادەرەکم هەیە هەر بەحسی سیاسەتی لەکن بکەیی و هجوم کەیە سەر حوکمەتی، یەکسەر دەرێ: سەلامو عەلێک، لێم پرسی ئەوە چیە؟ گۆتی: وەڵلا نەکوو قسەکان تەسجیل کرابی و ببەنە ئاسایشی، وەبی ئەگەر ئاسایش بانگی کردم، دەرێم بەسەرینگۆ ئەمن گێم لەهیچ نەبووە، ئەمن بەسە داچووم و گۆتم سەلامو عەلێک، وەکی ئەمن سەلامم کرد ئەوان جوونەکانیان هەموو دابوو، لۆیێ ئەمن هیچ گوناحم نیە! برادەرە بایەع شاریەکەم بەینەکی تەماشای کردم، ئەوجە گۆتی: سەلامو عەلێک! گۆتم: تازە ناخوا، ئەتوو دۆ و دۆشاوت تێکەر کرد، ئەوجە گۆتت سەلامو عەلێک!
مایتی.[1]
Ev babet bi zimana (کوردیی ناوەڕاست) hatiye nvîsandin, klîk li aykona
bike ji bu vekirina vî babetî bi vî zimana ku pî hatiye nvîsandin!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Ev babet 505 car hatiye dîtin
Raya xwe li ser vî babetî binivîsin!