سکرتێرە 59

وەرامی مۆبایلم داوەو وەزیری ناوخۆ گۆتی : کوی ؟ گۆتم : وەڵلا باشم ئەتوو کوی ؟ گۆتی : ئەوە جەعۆشمان بەردا، گۆتم : دەستتان خۆشبی مەمنونم، گۆتی : ئەوە لۆ لە تازیەی وەزیری ئاوەدانکردنەوەی دیارنی ؟ وەرە فاتیحەکی بخینە، هەر هیچ نەبی برادەرتە، گۆتم : بابزانم، ئیشاڵلا دانی هێوارێ دێم، گۆتی : زۆر باشە، ئەمنیش لەوێ دەبم، گۆتم : ئەوە کووە جەعۆتان بەردایە ؟ گۆتی : ئەدی نەمانگۆ مێوانەو هەندە پرسیاری لێدەکەین و دەینێرینەوە مارێ..! گۆتم : باشە مەمنونم، هەربژی، گۆتی : هێوارێ بێی لۆ تازیەکەی، حەزدەکەم بتبینم، گۆتم : باشە بە چاوان، خواحافیزی کردو مۆبایلم قەپات کرد، مام عەوڵا گۆتی : ئەوە چی دەویست ئوستاج ؟ گۆتم : دەرێ وەرە تازیەی وەزیری ئاوەدان کردنەوەی، دەتوو لەوەی گەڕێ، دەبا بزانین جەعۆ کوو بەربووە ! جەعۆ گۆتی : وەڵلاهی چتان پێبرێم، سێ جەمە تێیان هەردەدام، ئەو شەق و پێلەقەی بەمن کەتیە، بەکەس نەکەتیە، دەیانگۆ دەبی بێی شایەدی بدەی کەوا ئەو وەزیرە گەندەڵەو ئیشی قۆڕیش دەکا، مام عەوڵا گۆتی : ئیشی قۆڕی کوو ؟ تێناگەم، جەعۆ گۆتی : تێناگەی پیرەسە، ئەدی ئەو سەرکە گەورەت بە چ سپی کردیە..! گۆتم : جەعۆ قسەی خۆت تەواوکە ! گۆتی : وەڵلا دوایێ وەختی تەهقیقیان لەگەر من دەکردو تێیان هەردەدام، کابرایەکی کەرەگەتی چارشانە، هات و لەکنەمە دانیشت، بەینەکی گێی دامن، کە ئەمن تێکەری هیچ نیمەو پیاوەکی فەقیرم، گۆتی : بابە ئەو بەستەزمانەی بەردەن، ئەوە پێناچی هیچی لەگەر هیچ دابی، ئیدی لەسەر ئەو قسەی ئەمنیان بەرەڵلا کرد..! مام عەوڵا گۆتی : وەڵلاهی جەعۆ ئەو قسەم ناچتە ئاقری، کورە بابە ئەوەی بکەویتە بەردەستی وانە، وەڵلا وەبیللا بەهەوەنتە نایێتە دەرێ هەر ئەوەندە ئاسانە هەتا دەکەویە بەر دەستیان، ئیدی دوایێ دەبی فاتیحەی لەسە خۆت بخینی..! جەعۆ گۆتی : یەعنی ئەمن درۆی دەکەم ؟ مام عەوڵا گۆتی : ئاو نا..! گۆتمە جەعۆی : کاکە هەستە بڕۆوە مارێ، داکت ئاگری لە هەناوی بەرببوو، شێت ببوو شێت، گۆتی : گدۆ، پێشی بێمە ئێرە چوومەوە مارێ، داکم دیت و دەستم ماچ کرد، ئەوجە هاتیمە ئێرە، نەشمگۆ وا دەچمە کن گدۆی، بڕوات هەبی وەمگۆتبا، دەیگۆ کوڕم بکە لە ڕاهی خوای واز لەو کابرایەی بینە، با بە فەتارەت نەچی..! گۆتم : دە مادام وەیە بڕۆوە مارێ، ئاوەکی بەخۆت داکەو جلکت بگۆڕەو وەرەوە، دەبی بچینە بنکەی پۆلیسی لۆ تەحقیقی لەگەمن، دونێ پێیان گۆتم : دەبی بێی ئیفادەت بدەی چونکە شکایەتت لێکرایە..! جەعۆ گۆتی : نەبابە ! گۆتم : ئەرێوەڵلا، مام عەوڵا گۆتی : ئوستاج پێناچی بە سانایی وازت لێبینن ! گۆتم : وەڵلا با قسەکیدی بکەم، حەزدەکەی ئەنگۆ مێن و ئەمن بەتەنێ دەچم، با ئەنگۆ تووشی کێشە نەبن، گۆتیان : ئەوە قسەیە ئەتوو دەیکەی، ئەمە لۆ توو سەرمان پێوە نیە، جەعۆ گۆتی : باشە چشتەکیدی، برادەرەکم هەیە کەونە شورتەیەو چەند سار لە تەهقیقی بووە، چدەرێی ئەویش لەگە خۆمان ببەین، ڕەنگە ئیستیفادەکی ببی، گۆتم : ئەو برادەرەت ناوی چیە ؟ گۆتی : وەڵلا ناوی سەعە بەراز کوژە..!

گۆتم : وەڵلا هەر لە سەعە بەراز کووژمان کەم بوو..! مام عەوڵا گۆتی : عاری قوونمان زۆر جوانە، ئوجە نۆبەتی سەعە بەراز کوژیە، جەعۆ گۆتی : بڕوا بکەن پیاوەکی زۆر چاو قولابە، ماخران هەند ئارچاغە، سەی بەپیستەوە دەخوا، پێم باشە پێی برێن بێ، قابیلە چ زەرەر دەکەین، گۆتم : جەعۆ ئەتوو دەرێی وەتێدەگەی ئەمە دەچینە ڕاوە بەرازی، هەتا سەعەی لەگەر خۆمان ببەین، کاکە ئەمە دەچینە بنکەی پۆلیسی پۆلیس ! جەعۆ گۆتی : دەزانم گدۆ دەزانم، بەران سەعە مفوەز تەهقیقەکی زۆر قەدیمەو لێدەزانی، مام عەوڵا گۆتی : وەڵڵا مادام سەعە بەراز کوژ دێ، ئەمنیش بە شێرەی سەکوژ دەرێم بێ ! گۆتم : شێرەی سەکوژ کێیە ؟ گۆتی : ولداش زاوامە و قەولە خۆی هەربژێری لۆ پەرلەمانی ! گۆتم : ئەتوو بەڕاستیتە؟ گۆتی : ئەرێوەڵلا، سەتاسەتیش دەردەچی ! گۆتم : بە سەکووشتنێ دەردەچی ؟ گۆتی : ناوەڵلا، بەوەی عیزب لە پشتیتی، چونکە لە شەڕە سەی زۆر ئازایە..! گۆتم : وەختی هەندێ نیە، جەعۆ زوو بڕۆوە مارێ، ئاوەکی بەخۆت داکەو وەرەوە، گۆتی : بەچاوان، جارێ بە دوعا..!
جەعۆ ڕۆیی و مام عەوڵا گۆتی : ئوستاج، ئەتوو قەناعەت دەکەی جەعۆ ئەوها بەسووک و سانایی بەربدرێ ؟ گۆتم : وەڵڵاهی ئەمنیش ناچیتە مێشکم، بەران با سەبرەکی بگرین، بزانین وەزعەکە بەچ دەگا.. لەگەر مام عەوڵای سەرو چایەیدیمان خواردەوەو کەتینە بەحس و خواسی دنیایێ، سێ چارێگ سعاتەکی پێچوو جەعۆ هاتەوە، گۆتی : فەرموون با بڕۆین، هەستاین و سواری تڕومبێلی بووین و بەڕێکەتین، گەیشتینە بنکەی پۆلیسی و سەلاممان کرد، معاونەکی دوو نەجمە وەرامی داینەوەو بەخێراتنی کردین، ئەمنی ناسی و ئەلهەقی ڕێزەکی زۆری لێگرتم، دانیشتین و سێ چایەی لۆ گاز کردین، چایەکەمان خواردەوەو بەڕێزەوەوە گۆتی : جەنابی وەزیر ؛ بەخۆت دەزانی شکایەتت لێکرایە لۆیێ لە دوومان ناردی، گۆتم : بەرێ دەزانم، ئەمنیش لۆیێ هاتیمە، گۆتی : ئەوانەی شکایەتیان لەتوو کردیە، هاتینە ئیفادەی خۆیان دایە، ئێستاش دەبی ئیفادەی توو وەرگرین ! گۆتم : زۆر باشە، گۆتی : کا هەویەکی خۆتم بدێ ! ئەمنیش دەستم لە گیرفانم ڕاکردو هەویەم دایێ، معاونەکە فایلەکی نوێی کردەوەو ناوی سیانی و شوێنی دانیشتن و تەمەنی نووسیم، هەندە پرسیاری دیشی لێکردم، ئەوجە گۆتی : بابێینە سەر ئەسلی مەسەلەکەی، ئێستا ئەتوو شکایەتت لێکرایە لەسەر دوو چشتی : یەکەمیان گەندەڵی، دووەمیشیان مەسەلەی ئەخلاقی، ئەتوو چدەرێی..!؟ ویستم وەرام دەمەوە، زەلامەکی ڕەشتارەی سمێر گەورەی چار شانەی هورگەستوور هاتە ژۆرێ و هەتا هێزی تێدابوو لاقی ڕاستەی لە عاردی کووتاو تەحیەکی دەرەجە ئێکی لۆ معاونەکەی کرد و گۆتی : گەورەم کووی ؟ معاونەکە هەر سەری برند کرد کابرای ناسی، پێکەنی و گۆتی : یاخوا بەخێر بێی سەعە، ئەحوارت کووە، لەگەر بەراز کووشتنێ کووی ؟ باش بزر بووی هەی گەندەڵی مەندەڵ..! لەدری خۆم گۆتم : دە فەرموو دەی، ئەوجارە ڕدێنم کەتە دەستی کێ، ڕەببی جەعۆ خوا خێرت نەنووسی وەکی سەعە بەراز کوژت تووشی من کرد ! سەعە وەرامی معاونەکەی داوەو گۆتی : وەڵلاهی گەورەم غەریبیم دەکردی و لە مێژە نەمدیتی، ئەرێ وەتی ئەمن لێرە نەمایمە لەگەر تاولەی کوی تاولە ؟ هەونکەش هەر دەدۆڕێنی، سەعە یەک بە دەنگی پێکەنی و لەخۆشیان دوو سێ لەقەی لە عاردی دا..! معاونەکە زۆر بەسەخۆ داشکاوەو وەکی مەنجەری سفر قۆپاوە، لۆیێ گۆتیە سەعەی : جارێ بێدەنگ بە، با ئەو ئیشەی تەواو کەم، ئەوجە قسان دەکەین ! سەعە بەراز کوژ بێدەنگ بوو، هەر ئەوەندە نەبی، ڕووی لە جەعۆی کردو گۆتی : پەڕەسێلکە کوی ؟ جەعۆ گۆتی : لەوغەی مەکە و بە جەنابی معاونی برێ لۆ ئەو مەسەلەی هاتیمە ! سەعە گۆتیە معاونەکەی : گەورەم لۆ مەسەلەی جەنابی وەزیری هاتیمەو دەبی چاوەکت لێی بی، ئەوە خزمی خۆمە، معاون ویستی تۆرەی تاولەکەی لێبکاتەوە، لۆیێ گۆتی : دیسان پارەت وەرگرتیە گەندەڵ، ئەتوو هەر وازت نەهینایە ! سەعە گۆتی : بەخوای هیچم وەرنەگرتیەو لە ڕاهی خوای ئەو خێرەی دەکەم..! معاونەکە ڕووی لەمن کردو گۆتی : جەنابی وەزیر ئەتوو چدەرێی لۆ ئەو تۆمەتانەی درایتە پارت ؟ گۆتم : جەنابی معاون هەمووی ڕەت دەکەمەوەو ئەسل و ئەساسی نیە..!

سەعە بەراز کوژ هەریدایێ و گۆتیە معاونەکەی : گەورەم، ئەمن ئەو زەلامەی لە منداریەوە دەناسم و هەزار جار کەلایانێ و کراو پشت قوونانێمان پێکەوە کردیە، بڕوات هەبی، بڕوات هەبی، ئەمن گەندەڵ بم ئەوە گەندەڵ نیە..! معاون تەماشایەکی سەعە بەراز کوژی کردو گۆتی : بێ زەحمەت کەس پرسیاری لەتوو کردیە ؟ سەعە گۆتی : نەخێر..! معاون یەک دوو دایسی دی باداو گۆتی : کەس گووی بە کراوی توو پیوایە ؟ سەعە گۆتی : نەخێر..! معاون تووندتری کردو گۆتی : کەس بەتووی گۆتیە بەردەکی بەگووی دادە ؟ سەعە بەناچاری دیسان گۆتی : نەخێر..! معاون گۆتی : ئەدی لۆ لەخۆتەوە داری لە گووی وەردەدەی !؟ سەعە گۆتی : وەڵلاهی ویستم موداخەلەکی بکەم ! معاون گۆتی : لۆ ئەو ئیشەی ئەمن دەیکەم بەرنامەی ئیتیجاه موعاکیسە یان تەحقیقە ؟ سەعە گۆتی : بار بەو ملەی تەعقیقە ! معاون گۆتی : بەبێ دەنگی دانەنیشی دەرت دەکەمە دەرێ..! سەعە بەراز کوژ وەزعی تێکچوو، لۆیێ جغارەکی باریکی دەریناو قوونکەکەی دوو جار لە نینۆکی پەنجەی ئەسپێ کوژەی داو چەرخەکی دەریناو چرقەی لێوەهیناو بە جغارەکەی وەنا، یەک قوومی وەهای لێدا بڕواتان هەبی قووەتی قوونیشی دایێ، ئەوجە دووکەرەکەی بە عاسمانی ژۆرەکەی وەرکردو گۆتی : ئەرێ جەنابی معاون کفر بوو گووەکمان خوارد، ئەتوو چیە ئیشەکەی ئەوها گەورە دەکەی، دەها جغارەکی پێکە ڕەعمەت لە پلکە سووسنی داکت ! معاون ئەعسابی نەماو گۆتی : ئەو جغارەی بکوژێنەوە، ئەو ژۆرەت قانگ دا، زووبە دەی..! سەعەی فەقیر زوو جغارەکەی فڕێدا عاردی و پێی لەسەر داناو سێ چار جار پێی لۆلای ڕاست و چەپ بادا، معاون گۆتی : ئەو جغارەی هەگرەوەو باوێ ناو ئەو تەنەکەی، هەی پیس و پۆخر..! ئەمن بەچاوی تەماشایەکی جەعۆم کردو تێمگەیاند کەوا ئەو بەرایە چیە لۆمەت هینایە، جەعۆ بە دەستی ئیشارەتی دامێ و گۆتی : سەبر بگرە بزانە هەونکە کوو ئاگری لە وەزعەکەی بەردەدا، مێشکم جامی کردبوو، ئەمن لۆ چ هاتیمەو جەعۆ تووشی چ بەرایەکی کردیمە..!
وەختەکی پارێزەرەکەم هاتە ژۆرێ و سەلامی کردو گۆتیە معاونەکەی : ئەمن پارێزەری جەنابی وەزیری پێشیمەو ئەوەش ناسنامەی پارێزەریم و ئەوەش بریکارنامەی جەنابی وەزیری، معاون ناسنامەکەو بریکارنامەکەی لێ وەرگرت و تەماشایەکی کردو گۆتی : زۆر باشە فەرموو دانیشە..! گۆتمە پارێزەرەکەم : ئەوە لۆ درەنگ کەتی چەند لەمێژە چاوەڕێت دەکەم، گۆتی : ببورە ئوستاز، ئیشەکم لە مەحکەمەی هەبوو، زەرور بوو لەوێ بم، لۆیێ..! پاشان پارێزەرەکەم گۆتیە معاونی : قوربان ئەمن وەکو پارێزەری ئوستازی هەموو ئەو تۆمەتانە ڕەت دەکەینەوەو ئامادەینە بچینە پێش حاکمی و بە بەڵگەوە بیسەلمێنین کەوا ئەو قسانە هەمووی درۆو بوختانە، نەک هەر ئەوە شکایەتیش لەهەموو ئەوانە دەکەین کەئەو تۆمەتەیان پێ هەربەستیە لەگەر شایەدەکانیش، معاونەکە گۆتی : زۆر باشە وا ئەمن کۆمەرە پرسیارەکی لە تۆمەتباری دەکەم با وەرامم بداتەوە هەتا بنووسم، ئیدی معاون کۆمەرە پرسیارەکی زۆری لێکردم و هەمووم وەرام داوەو پاشان گۆتی : بڕۆنە کن موحەقیق عەدلیش وا لەو دیووی دانیشتیە، با ئەویش ئیشی خۆی تەواو کا، ئەوجە ئەوراقەکەی ڕەوانەی دادگای دەکەین لای حاکمی و بڕۆنەوێ، گۆتمان زۆر باشە..
هەستاین چووینە ئەو دیووی و مام عەوڵاو جەعۆو سەعە بەراز کوژیش هاتن، لە هەیوانەکەی گۆتمە؟سەعە بەراز کوژی : چاوەکەمی لەو ژۆرەش قسەی مەکە، خێرت دەگاتێ، با ئیشەکە زیاتر شێلوو نەبی، جەعۆ گۆتی : گدۆ لە سەعەی گەڕێ با قسان بکا، دیتت چی لە معاونی کرد ؟ گۆتم : چی لێکرد ؟ گۆتی : وەڵلا وەبیللا ئارەقەی پێکرد، عامفەریم سەعە ئەوها سەگ بی..! مام عەوڵا گۆتی : ئەرێ جەعۆ دەرێی وەتی گیرای کەراتیەکەت زیاتر هەر کشایە، کورە هەی خێڕی، وەڵلا وەبیللا معاون نەک ئارەقە، دوو تڕی موستەعەقیشی بە سەعە مشک کوژی کرد..!

گۆتمە مام عەوڵای : ئەمن زۆر مەمنونی توومە کەوا شێرەی سەکوژت نەهینا، دەنا ئەویش بهاتبا، مەحکەمەی نەدەویست و هەر لێرە ئەمری ئیعدامم لۆ دەردەچوو، سەعە بەراز کوژ گۆتی : خەتای منە کەوا هاتیمەو مردم هەندی لەبەتوو لەو ژۆری بچمە ئەو ژۆری، خەرک مەمنونە ئەمن بچم ئیشی لۆ ئاسان بکەم، جەعۆ گۆتی : سەعە وەمەکە برێم گوو بە پیاوەتیت بی، خۆڕی لەوچەی بکەی کەرەبابەکەی ناخۆی..! مام عەوڵا گۆتی : ئیش کەتە کەرەبابی، ئەمن بڕۆم باشە ئوستاج ! گۆتم : مەڕۆ مەڕۆ، هەونکە تەواو دەبین..
چووینە ژۆری موحەقیق عەدلیەکەیی و پاش چاک و چۆنی، ئەویش تەماشا فایلەکەی منی کردو، ئەوجە کۆمەرەک پرسیاری لێکردم، یان ئەمن وەرامم دەداوە یان پارێزەرەکەم، باشبوو زوو لەوێ تەواو بووین، گۆتیانەمە ئەنگۆ بڕۆنە مەحکەمەی، ئەمە وا بە پۆلیسەکی ئەوراقەکان دەنێرین، ئیدی ئەمە خواحافیزیمان کردو چووینە دەرێ، مام عەوڵاو جەماعەت چوونە ناو تڕومبێلەکەی جەعۆی و ئەمن و پۆلیسەکی مەرکەزی لەگەر پارێزەرەکەی سواربووین و بەڕێکەتین، چونکە جادە قەرەبارغ بوو، بەینەکمان پێچوو هەتا گەیشتینە مەحکەمەی، مەحکەمە جممەی دەهات، پێش ژۆری هەر حاکمەکی لەوانەیە حەفتا هەشتا کەسی لێ ڕاوەستابی، گۆتم : وەڵلاهی وەزعەکە شڕە، پەکوو ئەو هەموو کێشەو دۆخە هەیە و ئەمنیش ئاگام لێنیە، ماخران لەولای هۆرەکەی بوک و زاوای وا گچکەو مندارم دەدیت هاتبوون و داوای تەراقیان دەکرد، ئاگرت لەهەناوی بەردەبوو، ئەوجە نەئێک و نەدوو، زەلامیان دەهینا هەتا بەدەستی ڕادەگا زنجیریان لە پێشی کردبوو، هەر چاوت وێدەکەت زەندەقت دەچوو، چار شانی کەتەی ڕەش و بۆری سمێرگەورەی چاوزەقی دەم و چاو کوترای، دەتگۆ هەونکە خۆم تێدەکاو لە بن دەست و پێی خۆم دەنێ و دەمکوژی..!
ممکینە سعات و نیوەک ڕاوەستاین هەتا سڕەمان بەبەرکەت، ئەمن و پارێزەرەکەم چووینە ژۆرێ، پۆلیسەکەی دەرکەی گۆتیە من : لێرە ڕاوەستە باشە ! گۆتم : باشە بەسەر چاو، حاکم ناوو ناونیشانی پرسی و وەراممان داوە، پاشان کۆمەرەک پرسیاری کردو هەر هەمووم وەرام داوە، ئەوجە بەینەکی ئەوراقەکانی سەراو بن کرد و تێر تێر تەماشای کرد، لەو وەزعەی بوو تەلەفۆنەکی لۆهات، وەرامی داوە و هەر دەیگۆ : باشە، بەسەر چاو، بەسەرچاو، کووت پێباشە ئەوها دەکەم، نانا خەمت نەبی، ئائا، جار جاریش تەماشا منی دەکرد، وەکی برێی هەستم دەکرد ئەو تەلەفۆنە پەیوەندی بە دۆسیەکەی من هەبی، لەدری خۆم گۆتم : خوایە سەهلی بکەی، خوابکەم ئەو تەلەفۆنە ئیشەکەم لێ قورس نەکا..!
حاکم مۆبایلی قەپات کردو سەرەکی باداو بەینەکی داما، ئەوجە گۆتیە من : هیچ قسەی دیت مایە ؟ گۆتم : نەخێر هەر ئەوەندەی دەرێم ئەمن بێ تاوانم و ئەوەی نووسرایە هەمووی بووختانە، گۆتی : وەرە لێرە ئیمزاکە، چووم ئیمزام کردو گۆتی : دەبی بتگرم هەتا ڕۆژی مەحکەمەی، بەران دەکرێ بە کەفالەت بەرت بدەم، چونکە ئەتوو کەسەکی ناسرای، گۆتم : زۆر باشە، کووت پێباشە ئەوها دەکەین..ئیزنی داین و گۆتی بڕۆنەوە بنکەی پۆلیسی هەتا ئیشی کەفایەتەکەت لۆبکەن چونکە لەوێ دەکرێ و ئەوجە چاوەڕێی ڕۆژی مەحکەمەی بن، گۆتمان زۆرباشە، لەگەر جەماعەتی لە بینای مەحکەمەی هاتینە دەرێ، هەتا بچینەوە بنکەی پۆلیسی، وەکی دیقەتم دا، هەرچی کامیرەی کەناڵی تەلەفزیۆنی بوو هاتبوو، هەر چاویان بەمن کەت، تێکڕا بە غاردان لۆلای من هاتن..!

ئەمنیش گۆتم با هەندە قسەیان لۆبکەم، دەورەیان لێدام و کەتنە پرسیاران، پەیامنێرەکان دوو بەش بوون : هەندەکیان پشتیان دەگرتم و هەندەکیشیان ڕکیان لەمن دەبۆوە، ئەوانەی ڕکیان لە من دەبۆوە ئەوانەبوون کە پێیان دەرێن میدیای سێبەر..! ئێکیان گۆتی : جەنابی وەزیر ڕاستە دەرێن پاش کەشف بوونی دۆسیەی ئەخلاقیت خێزانت توڕەبوەو داوای تەراقی کردیە ؟ گۆتم : وەڵلا ئەوە لەتوو بزانم..! ئێکیدی گۆتی : دەرێن بەتەمای ئەو کێشەی بە سەفقەکی حەل کەی ؟ گۆتم : سەفقەی کوو ؟ گۆتی : بە پارە دۆسیەکەت قەپات کەیی و بەتەمای پەنجا دەفتەری بدەیە ئەو ژنەی بەتەما بووی دەست درێژی بکەیە سەری ؟ گۆتم : وەڵلا ئەوە ئەمن نەبوویمە، ئەوانە بووینە کە ڤیدیۆیان هەیەو هەڕەشەی براو کردنەوەی ڤیدیۆیەکەیان لەسەرە ! پەیامنێرەکیدی گۆتی : ئەتوو پلانت چیە لۆ ڕۆژی مەحکەمەی ؟ گۆتم : لە کاتی خۆی ڕایدەگەینم ! ئێکیدی گۆتی : وای لۆ دەچی بتکەنەوە وەزیر ؟ گۆتم : بشمکەنێ نایکەم..! ئێکیدی گۆتی : دەرێن پێیان گۆتی : بڕۆ خاریج و دۆسیەکەت قەپات دەکەین ؟ گۆتم : چشتی وانیە ! ئێکەکی دی گۆتی : هەڵوێستی حزبەکەت چیە ؟ گۆتم : ئەمن وەکو ئەندامی حزبەکەم نەکرایمە وەزیر، لۆیێ ئاساییە هەڵوێستیان هەرچیبی..! ئێک گۆتی : دەرێن ئێک لە پاسەوانەکانت ژنەکی لەناو وەزارەتی هینایەو هەونکە بەجێی هێشتیە ؟ گۆتم : وەڵلا ژنەکە ئەوی بەجێهێشت..! جەعۆ ڕووی لە مام عەوڵای کردو گۆتی : پیرەسە، ئەوە بەعسی توو دەکەن..! مام عەوڵا گۆتی : فشەیە، با هەر بەعسم بکەن، مهیم ئەوەیە ئەمن گۆلی خۆم کرد..! ئێکیدی گۆتی : بەتەمای تەسلیم بی ؟ گۆتم : مووستەحیلە..! گۆتی : بەڵگەی بێ تاوانی خۆت هەیە ؟ گۆتم : بەڵگەی زۆر بەهێزم هەیە، ئەگەر وازم لێنەینن، ئەو بەڵگانەی من ڕەنگە حکومەتی هەروەشێنتەوە و حکومەتەکیدی دروست بکرێ، ئەوانەی دەیانەوێ ئەمن لەکەدار بکەن ئەگەر واز نەینن زەرەرەکی زۆر گەورە دەکەن..! پارێزەرەکەم هەنیشکەکی لێدام وەکی برێی گۆتی : نەدەبا ئەو قسەی بکەی ! بەران ئەمن گێم نەدایێ..!
وەلحاسری زیاتر لەسعات و نیوەکیان ڕاگرتم و پرسیار بارانیان کردم، ئان ئاخیری سەعە بەراز کوژ و جەعۆو مام عەوڵا خەرکەکەیان دوور هێخستەوەو سواری تڕومبێلی بووین بچینەوە بنکەی پۆلیسی لۆ تەواو کردنی کەفالەتەکەی..! گۆتمە پارێزەرەکەی بە جادەی سەتی دابڕۆ بەشکوو زوو دەگەینێ، گۆتی : بە سەرچاو..! لە جادەی سەتی دەڕۆیشتین و مەشغول بووین، وەختەکی پارێزەرەکەم تەلەفۆنەکی لۆهات، چونکە مۆبایلەکەی لەگەر تڕومبێلی ڕەبت کردبوو، گێم لە قسەکان بوو، ئێکەک بوو گۆتیە پارێزەرەکەی : ئەتوو پارێزەری وەزیری پێشی کارو باری ژنانی ؟ ئەویش گۆتی : بەرێ ! کابرا گۆتی : بێ پێچ و پەنا دوو قسەت لۆ دەکەم و گێ بگرە، بەزووترین کات واز لەو مەسەلەی بینەو بکشێوە، مەبە پارێزەری ئەو دۆسیەی، دەنا زەرەرەکی گەورە دەکەی ! پارێزەرەکم گۆتی : هەڕەشەم لێدەکەن، کابرا گۆتی : زۆر گووی مەخۆو پێت دەرێم وازبینە، ئەگەرنا نەک هەر خۆت مارو منداریشت دەتۆپێنین..! کابرا یەکسەر مۆبایلەکەی قەپات کرد، پارێزەرەکەم زۆر تێکچوو، ڕەنگی زەرد هەرگەڕاو نەیزانی چبرێ، تەماشایەکی منی کردو چاوەڕێ بوو قسەکی بکەم، گۆتم : کاکە واز لەمن بینە، لێرە ڕاگرەو ئەمن و ئەو پۆلیسە دێینە خوارێ و بەتەنێ دەڕۆین، با ئەتوو و مارو مندارت تووشی کێشەکی نەبن، پارێزەرەکە بڕەکی داماو گۆتی : وەڵلا وەبیللا بشمکوژن واز ناینم، ئەوجە هەر کەسەکی کەتە بن گەف و هەڕەشەیی و وازی هینا وڵات وێران دەبی، خەمت نەبی ئوستاز، هەتا ئاخیر فیشەک لەگەرتم..! زۆر مەمنونی بووم و دوعای خێرم لۆ کرد، بەشکو خوای گەورە خۆیی و مارو مندای دەپارێزی..
بەرەو بنکەی پۆلیسی دەڕۆیشتین وەختەکی لۆریەک بە هەموو قووەتی خۆی لۆمان هات و نەگەڕاوە، وەکی تەیارەی دەهات و دەیوویست بەسەرمان کەوی، گۆتمە پارێزەرەکەی : کورە خۆت قورتارکە، ئەو لۆریە دەیەوێ بمانکوژی، پارێزەرەکە بەهەموو قووەتی سووکانی تڕومبێلی بادا خۆی دەربازکا، تڕومبێل لۆ لە دەستی وەرینەگرت و بەسە ڕەسیفی نەکەت، ئەمن و پۆلیسەکە کردمانە یا ئەڵلا، یا ئەڵلا یەک نەبیتەوە، تڕومبێل نەگەڕاوەو پەڕیەوە جادەی ئەوبەری، لایەکی لە چاملغی تەکسیەکی داو سوڕاین، لەگە سوڕانێ لۆ پارێزەر ئیستاپی نەگرت، ئیستاپی گرت و تڕومبێلەکەمان دایە بەر تەقلان، ئەوەندەی ئاگام لەخۆ بوو شەش تەقلەم ژمارد، ئیدی پاشی هەنگی نەمزانی چمان بەسەر هات..!

وەکی چاوم هەرینا دیتم مام عەوڵاو جەعۆ لەسەر سەرم ڕاوەستاینە، داکی ئەحمەدی و مندارەکانیش لە دەورەم بوون، دختۆرەک لەلای ڕاستم ڕاوەستابوو، بە هوردی تەماشای دەکردم، دوو جار دەستی بە پێش چاوم داهیناو گۆتی : دەبینی ؟ بە سەر لەقاندن پێم گۆت بەرێ..! چووە لای لاقم و گۆتی : کا پەنجەی پێت بجوولێنە ؟ پەنجەکانی هەردوو پێم جولاند، هاتەوە لای سەرم، قەرەمەکی بەدەست بوو، لۆ منی درێژ کردو گۆتی : ها ئەو قەرەمەی بگرە، دەستم درێژ کردو قەرەمەکەم وەرگرت، دختۆرەکە لەسەر قاقەزەکی نووسی ؛ پەنجا ڕۆژ، ئەوجە گۆتی : بخینەوە ! ئەمنیش گۆتم : پەنجا ڕۆژ ! دختۆرەکە گۆتی : دەوجە با پێت برێم، ئەتوو پەنجا ڕۆژە بێهۆشی، زۆربەی دختۆرەکان دەستیان لە توو شووشتبوو، ئەسلەن نەدەوێران نێزیکت ببنەوە، وەڵلا کاکە خوا ئەتووی داوە..! گۆتم : هەزار جار لە خوای بەزیادبی، بەران پێم برێن پارێزەرەکەو پۆلیسەکە سەلامەتن ؟ دختۆرەکە گۆتی : وەڵلا پۆلیسەکە قۆرەک و ڕانەکی شکابوو، چونکە لە پشتەوە قایشی نەبەستبوو، ڕاست لە جامی پێشەوە فڕیبوو، خوا ڕەحمی پێکرد بوو سەری بە ڕەسیفی نەکەتبوو، دەنا مێشکی بە جادەی وەدەنووسا..! گۆتم : پێم برێ پارێزەرەکەم کووە، گۆتی : وەڵلا ئەویش خوا دایەوە، چار پەراسووی شکابوو، لەگەر لاقی بە دوو جێیان، ئەوجە دختۆرەکە تەماشا داکی ئەحمەدی کردو بە دزی گۆتی : بەینی خۆمان بی پارێزەرەکە تاکە گونەکیشی فڕیە، بەران باشە ئێکەکی مایەو تەققەی پێدەکرێ، گۆتم : باشە ئەو تاکە گوونە لۆ فڕی ؟ گۆتی : بزانە لەچی تڕومبێلی گیربووە و بوویتە قوربانی ئەو کارەساتەی..! مام عەوڵا گۆتی : ئوستاج، هەزار جار شوکر لۆ خوای، وەڵلا ئەتوو لە قورپی گەڕایەوە، جەعۆ گۆتی : بریا عەوڵارۆک لەگەتوو سوار ببایە، بەران چبکەم، ئەو گەمبۆرە زۆر بە بەختە، مام عەوڵا گۆتی : دەبڕێنیەوە یان ئەو جیهاز زەختەت بە تەپلی سەری دادەم، سەی خۆڕی..!
داکی ئەحمەدی و مندارەکان هاتن و بەچاوی پڕ فرمێسک باوەشیان پێکردم و ماچیان کردم، زۆر بە تووندی دەیانکووشیم و دەگریان، ناهەق نەبوون، ئاخر هەرچی دختۆرە دەستت لێ بشواو هەموو هیویت لێ دانێن و ئەوڕۆ بەخۆ بێیەوە، خوا دانەوەیە، گۆتم : ئەو پەنجەرەی بکەنەوە با دەرێ ببینم، جەعۆ چوو پەنجەرەکەی کردەوە، تەماشام کرد شەوە، گۆتم : سعات چەندە؟ گۆتیان : دەوو نیووە، دختۆر گۆتی : با جارێ ئاوی موغەزیت لە سەربی و هوردە هوردە شۆربای بدەنێ با بخوا، جەعۆ گۆتی : وەڵلا دامنایە بەو شەوەی بچم لە تەعجیلی سەرو پێچکی لۆ بینم، وەبی بڕەک بێتەوە سەرەخۆ..! دختۆر گۆتی : دەی دەی، لۆری نەیکووشت، بزانە ئەتوو نایکووژی، هەتا چار پێنج ڕۆژیدی لە شۆربای زیاتر هیچی دی نەخۆی، دەنا وەزعت تێکدەچی، گۆتم : بەسەرچاو..! دختۆرەکە گۆتی : وا هەندە حەبت لۆ دەنووسم بالۆت بینن و بیانخۆ، ئیشاڵلا سبەینێ ئەو ئاوی موغەزیەی لادەبەین و هوردە هوردە دەست بە خواردنی بکەوە، داکی ئەحمەدی گۆتی : دکتۆر، بیلا زەحمە، ئەو زۆڕ دەبی ئلێڕە ؟ دختۆر تەماشایەکی کردێ و ئەوجە تەماشای منی کرد، گۆتی : دەرێی خێزانەکەت عارەبە ؟ گۆتم : بەرێ، گۆتی : غەدداری گەورە، ئەتووش زەڕبەی خۆت وەشاند ؟ هیچم نەگۆ بەس زەردەخەنەکم لۆ کرد، گۆتی : وەڵلا خوشکە سێ چار ڕۆژیدی لێرە دەبی و ئەگەر تەندروستی بەرەو باشی بڕوا ئیزنی دەدەین..! گۆتم : ئەرێ پارێزەرو پۆلیسەکە هەر لەخەستەخانەینە یان دەرچووینە، مام عەوڵا گۆتی : هەردووک دەرچووینە و ئەمن و جەعۆ زوو زوو سەریان لێدەدەین، گۆتم : تەلەفۆنیان لۆ بکەو سەلامی منیان پێ بگەینەو برێ زۆر سەلامتان لێدەکاو زۆر خەمبارە کە لەسەمن ئەوهایان لێهات، مام عەوڵا گۆتی : خەمت نەبی و بەمن گەیی..!
دختۆرەکە هەندە دەرمانی لە قاقەزەکی نووسی و دایە جەعۆی، گۆتی : بڕۆ لە سەیدەلیەی لۆی بینە، جەعۆ قاقەزەکەی وەرگرت و ڕۆیی، دختۆرەکە گۆتی : لە سبەینێوە ئێکەک دێ عیلاج تەبیعیت پێدەکا، بەشکوو هوردە هوردە بجولێی و بەسە پێ بکەویەوە، گۆتم : زۆر باشە، ئەمن مەمنونی توومە، دختۆرەکە پێشی بڕوا سەری لەبن گێی نام و گۆتی : ئەرێ دەرێن ژنی عارەب لۆ مێردیان زۆر باشن، وەیە یان ؟ گۆتم : لۆ دەپرسی ؟ گۆتی : وەڵلاهی لۆ ژنەکی عارەب لێدرایمەو بەتەمامە بیهینم..!
مایتی[1]