سکرتێرە 82
ڕایکێشام و بەچەپەرۆکان کەتە سەرم و هاواری دەکرد : هەی خائین، هەی دز، هەی بێنامووس، هەی بێگانە پەرست..! وەڵلاهی زێخە بەزمەکی پێکردم، ئەو بووە ڕاستگۆو درسۆزو پاک و خاوێن، ئەمنیش خائین و دزو گەندەڵ..! خوا ڕەحمی کرد پۆلیسەکان ئەمنیان لەبەر دەستی زێخەی دەرینا، دەنا تەواوی کردبووم، بەخۆم چار پێنج مانگە گیرایمەو تووشی هەزار دەردیان کردبووم، لەڕو لاواز بووم و بەگۆپاری دەڕۆیشتم، زێخەش دەتگۆ بەرازە، ملەستووری قوونەستوور، خوا ڕەحمی کرد کەللەکی لێنەدام دەنا تۆزی پێدەکردم..!
زێخەیان دوور هێخستەوەو ئەمنیان برد لۆ ئاودەستی، تەواو بووم و لەگەر پۆلیسەکان گەڕامەوە ژۆرێ و لەناو قەفەزی لەسەر کورسیەکیان دانیشاندم، دادوەر گۆتیە زێخەی : ئەوجارە ئەوها بکەی دەتهاوێمە ژۆرێ، دەبی ڕێز لەداگای بگری..! زێخە لە هۆڕژنی گریانێیداو گۆتی : گەورەم ئەتوو نازانی ئەو ئارچاغە چی لەمن کردیە، هەتا بەخۆی تێم بەربوو تێم بەربوو، دوایێش تەسلیمی عەوڵارۆکی کردم، بەهەردووکان لێک و پێکیان هەرزڕاندم..! لەناو هۆری دادگای بووە پێکەنین و هەرایەک نەبیتەوە، هەندەک لەوانەی لەوێبوون، چاویان لەمن دەقووچاندو برۆیان لێ هەردەتەکاندم، وەکی برێی دەیانگۆ خۆزگەمان بەخۆت ئەو دکرەت کردیە لەناو وەزارەت..! ئەمنیش سەرەکم باداو گۆتم : خوای بەگەورەیی خۆت بەهانام بێی..!
زێخەیان هێور کردەوەو دادوەر گۆتی : کیژم ئەو قسانە مەکەو لەسەخۆبە، ئەمە هەمووی بەیاسای چارە دەکەین ! زێخە گۆتی : گەورەم چارەی چ دەکەی ئەوە نامووسی هەموومانی بردیە، ڕاست و چەپ دایتیە بەرێ، بڕوا ناکەم لەو وەزارەتەی ژن لەبەر دەستی قورتار بووبی، بیکوژن، لەسێدارەی بدەن، باببیتە عیبرەت لۆ هەموو دزو خائین و گەندەڵەکی..! دادوەر گۆتی : ئێستا تێم بگەینە چی لەتوو کردیە ؟ گۆتی : ئەوجە چی لێنەکردیمە، ژنەکی وەکی من جوان و نازدار بکەوتە بەردەستی ئەو زەلامەی دەبی چیلێبکا، بەوەش ڕانەوەستا گەوادی بەمن دەکردو دەیگۆ بڕۆ کیژی جوانم لۆ بینە، گەورەم لە ژۆری خۆی سیدی پێدەکردو دەیگۆ وەرە ڕاقیسەم لۆبکە و قوونت بادەو سینگت بلەرزێنە..! دیسان بووە پێکەنین و هەرا..! قازی گۆتیە زێخەی : گێبدەمن ست زولێخا، ئەو نەوعە قسانە بکەی قسەکانی توو وەرناگرم و حسابی شایەدت لۆ ناکەم..! زێخە گۆتی : گەورەم ئەمن قسەی خۆم کردو تەواو بووم و دەڕۆم، ناتانم چیدی تەماشا ئەو پیسەی بکەم، ها گەورەم ئەوەش ژمارەی مۆبایلی من، ئەگەر ئیشەکت بەمن بوو تەلەفۆنم لۆ بکە..! چووە لای مێزی دادوەری و وەرەقەکەی لەپێشی داناو گۆتی : ئەمن بڕۆم..؟ دادوەر بڕەک ڕەنگی تێکچوو، ئحەئحەکی کردو وەرەقەکەی زێخەی هەرگرت و لە گیرفانی ناو گۆتی : ئەمن ژمارەی تووم لۆچیە خانم..! ئەگەر چشتەکت مایە برێ ؟ زێخە گۆتی : گەورەم داوا دەکەم عەوڵاش لە سێدارەی بدرێ، ئەو دەستە ڕاستی وەزیری بوو، ئەو ئەمنی هەرخەرەتاند، ئەو بیست و چار سعات ک....ی لەسە دەستی دانابوو، لەناو ئەو وەزارەتەی دەسوڕاوە ! دیسان بووە پێکەنین و هەرایەک نەبیتەوە..! دادوەر گۆتی : زوو ئەوەی ببەنە دەرێ و برێن با دایە جووجە بێ، بزانین ئەو چ بەزمەکمان پێدەکا..!
هەندەی نەبرد دایە جووجە هاتە ژۆرێ، سەلامی کردو گۆتیە دادوەری : ڕۆرە بەقوربانی سەرکت بم زوو بەڕێمکە شیوم لەسەر ئاگری دانایە، پیرەمێرد بێتەوە نان عازر نەبی هەموو کۆرانم دەینیتە دیاری..! دادوەر گۆتی : جارێ سوندەکەی بخۆ با وەکی زێخەی لێنێ، لە مشەوەشیان لەبیرمان کرد سوندیشی پێبخۆین..! دایە جووجە گۆتی : بەگۆڕی جوانە مەرگی ئەوی ڕاستی بی ئەوی دەرێم..! دادوەر گۆتی : ئەو سوندە ناخوا، دەبی بە قورئانی سوندی بخۆی، دایە جووجە گۆتی : ئەیڕۆ کوو ناخوا، لۆ لەجوانەمەرگی عەزیز ترهەیە، وەڵلا ئەمن هەر بەگۆڕی وی سوندی دەخۆم..! دادوەر مێشکی دووکەری لێهەردەستا، گۆتی : دایە جووجە گۆڕی جوانەمەرگی لەگەڕەکێ و لەکن پلکەزارێ و دەروێش بەگیسی سوندی پێبخۆ، ئەمما لێرە دەبی ئیللا بە قورئانی بی..! دایە جووجە گۆتی : ئەیڕۆ مامەستا ئەتووش زارێ و بەگیسی دەناسی ! ئەوجە با باسی بەگیسیت لۆبکەم، ئەوە ئەوێ ڕۆژێ.. دادوەر شین و مۆر هەرگەڕابوو، گۆتی : لاحەولەوەلا..! بابە واز لەبەگیسی بینەو سوندەکەی بخۆ ئەی هاوار..! ئەمن لەسەر حاری خۆم پێکەنینم بەو قەشمەڕ جاریەی دەهات، فەرموو کێ بوویتە شایەت لەسەرم.! لۆیێ توڕەبووم و هەستامەوە، گۆتم : جەنابی دادوەر تکایە ئەو قەشمەڕیاتەی ڕاگرە، بەقسەو ڕەفتاری ئەو شایەدانە لۆت بەدەر دەکەوی ئەو تۆمەتانەی لۆیان هەربەستایمە هەمووی درۆیە..! دادوەر ویستی شەیەکەی لەسەری من بشکێنی، لۆیێ خۆی لەمن توڕەکردو گۆتی : جارەکیدی لەخۆتەوە قسەی نەکەی، ئێرە دادگایەو پیرۆزی خۆی هەیە، کەنگی ڕوخسەتم دای ئەوجە قسەی بکە، تێگەیشتی ! پارێزەرەکەم قۆری گرتم و گۆتی : دانیشە..! دانیشتم و دادوەر گۆتی : ئەو بڕگەش زیادکەن لە فایلی تاوانباری و بنووسن ئیهانەی دادگای کردیە..!
هەرکووی هەبوو دایە جووجەیان ڕازی کردو سوندی بەقورئانی خوارد و گۆتی : بەو قورعانەی وا لەمزگەفتی پیرەژنی داندرایە ڕاستی دەرێم..! دادوەر مێشکی شۆتی کردو گۆتی : بەو قورئانەی پێشت سوندی بخۆو واز لە مزگەفتی پیرەژنی بینە..! باشبوو دایە جووجە سوندەکەی خوارد بەو قورئانەی پێشی خوارد..! دادوەر لێی پرسی ؛ ئەو پیاوەی دەناسی ؟ گۆتی : ئەیڕۆ کوو نایناسم، ئەدی ئەوە وەزیرە چاو حیزۆکی خۆن نیە ! دادوەر گۆتی : چاوی حیز بوو ؟ دایە جووجە گۆتی : هەر مەپرسە ڕۆرە، وەڵلا وەبیللا لەسە سەی پازدی نەدەدا، ڕۆژەکی چوومە ژۆری، فایلەکم پێبوو دامنا، ڕاست پڕی دامێ، هەرچەند گۆتم : بەرمدە کورە، پیرەژنەکی وەکی من چی لەگەچ مایە، ئەو بەرینەدەدام و دەیگۆ : بسوڕێ، با لەپشتەوە باوەشت پێبکەم، چونکە قۆنەکەت گەلە خڕە..! توڕە بووم و هەستامەوەو گۆتم : جەنابی دادوەر ئەو پیرەژنە درۆی دەکا، ئاخر ئەوە ئی ئەو حارەی ئەمن باوەشی پێبکەم ؟ دادوەر چەکوچەکی لەمێزی داو گۆتی : وەڵلاهی ئەوجارە قسەی بکەی سێ مانگت داوێمە ژۆرێ و نایێلم لە دادگایی کردنەکەت لێرەبی، دانیشە دەی..! دایە جووجە گۆتی : زمانی چەند درێژە زمان، کوو خۆی کردیتە مەلایکەت، هەی لەبە سەرکم مری، بێ نامووسی سەرسەری..!
دادوەر گۆتیە دایە جووجەی چیدیت هەیە برێ و ئەتوو هەقت لە تاوانباری نەبی ! گۆتی : ئەوجە ئەمن جارێ چم گۆتیە، کوڕم دەیگۆتە من پاش دەوامان وەرەوە مارێ و دوو سێ کیژی جوانیش لەگە خۆت بینە، ئەوجە دەیکەینە گەعدەو گۆرانی گۆتن و ڕابواردنی، لەگە کیژەکان دەچووە ژۆرێ و ئەمنیشی بەو حەوشەو مارەی وەدەنا، لەقاتی سەرێڕا هەتا دەرکەی حەوشێی بەمن دەشووشت..! دادوەر گۆتی : باشە ژنەکەی کوو قبوری دەکرد ئەتوو کیژی لۆ ببەیەوە مارێ ؟ گۆتی : ژنەکەی لەمارێ نەبوو، وەکی ئەمن دەچووم ژن و منداری کەس لەوێ نەبوو، دادوەر گۆتی : ئەتوو ئەو ئیشەت لۆ دەکرد ؟ گۆتی : کوڕم لەترسی معاشی، دەیگۆ معاشت دەبڕم و نەقرت دەکەم لەو وەزارەتەت نایێلم..! دادوەر گۆتی : هیچت مایە ؟ گۆتی : هەرچی گۆتم لەکنەتوو هەیەو لێی پەشیمان نیمە..! دادوەر گۆتیە پارێزەرەکەی من هیچ پرسیارت هەیە لەو ژنەی ؟ پارێزەرەکەم گۆتی : نەخێر..! پێم سەیربوو پارێزەرەکەم هیچ قسان ناکا، لۆ ڤارین و زێخەش هیچ قسەی نەکرد..! گۆتم : لۆ قسەکی ناکەی ؟ گۆتی : جارێ وەختی نیە..!
دایە جووجە چووە دەرێ و بەفرین خان هاتە ژۆرێ، ئەوە پۆستەکی گەورەی هەبوو لەناو وەزارەتی، ئەمن لەوێم نەهێشتبوو، پاش ئەوەی سوندی خوارد، دادوەر گۆتی : چت هەیە ؟ ئەو زۆر بە هێمنی قسەی کردو گۆتی : جەنابی دادوەر، مەسەلە ئەخلاقیەکان ئەوانەی پێشی من باسیان کردو ناچمە سەری، بەران باسی گەندەڵی ناو وەزارەتی دەکەم لەسەردەمی ئەو تاوانبارەی، بڕوا بکە سەتان ملیۆن دیناری بەهەدەر دایە، هەر هاتە وەزارەتی بەسەتان ملیۆن دیناری لە نوسینگەکەی خۆی سەرف کرد، بەناوی نۆژەنکردنەوەو گۆڕینی کەل و پەل و دیکۆری نوسینگەکەی خۆی، پێمگۆت جەنابی وەزیر ئەوە زیادە مەسرەفە و هەمووی دوو مانگ نابی ئەو نوسینگە نۆژەن کرایتەوە، گوناحە ئەو هەموو پارە جوانەی میللەتی ئەوها لێدەکەی ! گۆتی : ئەوە ئیشی منەو ئەتوو تێکەر مەبە، ئیدی وەستاو دیزاینەری هیناو هەمووی گۆڕی، کارمەندی وەزارەتی دەبردەوە مارێ و ئیشی مارێی پێدەکردن، دەیان خزم و کەسی خۆی دامەزراندیە بە شهادەی تەزویرو هیچیان نەدەزانی و لەجێی هەستیاری دادەنان، سەفەری لوبنان و چەندین جێی دی کردیە لەسەر حسابی وەزارەتی، مارە خەزورانی هەمووی دامەزراندیەو معاشی لۆ بڕینەوە بێ ئەوەی یەک ڕۆژ بێنە دەوامێ و سەرە مانگان معاشی لۆ دەناردنە مارێ، بەس ئەو ڕۆژەی بووە وەزیر سەت ملیۆن دیناری سەرف کردیە بەناوی کێک و شەربەت و کەباب و ئاهەنگ سازکردنی، کەهەر پێویستی نەدەکرد..! دادوەر گۆتی : بەڵگەت هەیە ؟ گۆتی : بەرێ جەنابی دادوەر، وەسڵی مەسروفات و گەندەڵیەکەی هەمووی لەناو فایلیەو لەبەر دەستی جەنابتە، چەند جار ئەمن بەرامبەری ڕاوەستام و پێمگۆت گوناحە وا لە مورک و ماری دەوڵەتی دەکەی ! لەسەر حاری خۆم و لەباتی چاکەی ئەمنی نەقر کردو لە وەزارەتی نەهێشتم، ئەوەتە لێرەیەو بابرێ نەقرم نەکردیە..!
بەفرین خان هەرچی گەندەڵی و زبرخانەی ئەو وەزارەتەی هەیە کە بەخۆیان کردبوویان و دەیانکردو دەیانویست ئەمنیش تێوەردەن، هەمووی فڕێدا سەر سەرو کۆکری من، خۆی بەیەکەم دەست پاک و درپاک و نیشتمان پەروەر پیشان داو ئەمنیش بەیەکەم دزو جەردەو گەندەڵ..! ئیدی بەفرین خان چووە دەرێ و مریەم خان هات، ئەویش سوندی خواردو قسووری پێنەکردم، ئەوەی ئەوانی پێشخۆی گۆتبوویان دوو بارەی کردەوەو ئەوەی نەشگۆترابوو بەسەری وەنا..! نەک هەر ئەوە تۆمەتی ئەوەی خستمە پاری کەوا داوام کردیە ژۆرەکی گچکە لەنوسینگەکەم بکرێتەوەو سیسەم و حەمامی تێدابی، هەتا ژنان ببەمە ئەو ژۆرەیی و لەگەریان ڕابوێرم، ئەو فرمێسکی دەستڕی و بە کلینسی کەپووە تەجمیل کرایەکەی دەستڕیەوەو دەیگۆ ئەو نمەک حەرامە دەیان کیژی لە وەزارەتەکەیمە کردتە ژن..!
دادوەر گۆتیە مریەم خانی : لۆ سەرەوەی وەزارەتتان ئاگادار نەکردەوە لەو شتانە ؟ گۆتی : گەورەم چەند جار ڕاپۆرتمان نووسیەو ئاگادارمان کردبوونەوە، بەران ئەوان دەیانگۆ ئەوە ئیشی مەیەو وازی لێبینن ! دادوەر گۆتی : قسەی ئەوان تەواوەو بێگومان سەرەوەی مە باشتر لەئیشەکەی دەزانن وردبینانەتر هەنگاو دەنێن..! مریەم خان گۆتی : ڕاست دەکەی جەنابی دادوەر قسەی جەنابتە، ئەمە لەژێر سێبەری حیکمەتی وان دەژین و بەئیرادەی بەرزی وان ماینەو خائین و خۆفرۆشان لەناو دەبەین..!
دادوەر گۆتی : هیچت مایە مریەم خان ؟ گۆتی : جەنابی دادوەر بریا ئەو دانیشتانە ڕاستەوخۆ بگوازراباوە لەهەموو تەلەفزیۆنەکان هەتاوەکو میللەت بەچاوی خۆی دادگایکردنی خیانەتکارانی بدیتبا، هەستامەوەو گۆتم : جەنابی دادوەر داوا دەکەم دادگایی کردنەکەم ڕاستەوخۆ بگوازرێتەوە، هەتا میللەت ببینی وەزعەکە کوە ! دادوەر گۆتیە من : ئەوە ئیشی توو نیەو ئەمە بەخۆمان دەزانین چدەکەین، دانیشە و قسان مەکە..! پارێزەرەکەم دەستی برند کردو گۆتی : هەندەک پرسیارم لە مریەم خانی هەیە..! دادوەر گۆتی : فەرموو، بەران بەکورتی..! پاێزەرەکەم گۆتیە مریەم خانی : دەکرێ پێم برێی ئیبراهیم کێیە ؟ مریەم خان گۆتی : ئیبراهیم کێیە، نازانم ئەتوو باسی کێ دەکەی ؟ پارێزەر گۆتی : ئەو ئیبراهیمەی ئەتوو تەلەفۆنت لۆ کردو گۆتت : وەرە دیزاینی ژۆری وەزیری بگۆڕەو ژۆرەکی لۆ لە پشتەوە بکەوە، حەمامیشی تێدابی..! مریەم خان دەوی تێک ئاراو گۆتی : شتی وا نەبوەو ئەمن ئیبراهیمی هەر ناناسم..! پارێزەرەکەم میمۆریەکی دەریناو لە پێش دادوەری دانا، گۆتی : جەنابی دادوەر بەخۆت گێبدێ بزانە مریەم خان چدەرێ..! دادوەر میمۆریەکەی وەرگرت و بڕەک تەماشای کرد و ڕەنگی تێکچوو، گۆتی : ئەوجە کێ دەرێ ئەو دەنگە ڕاستەو گەمەی لەگەر نەکرایە ؟ پارێزەر گۆتی : جەنابت دەتانی تەئکید بکەی..! دادوەر گۆتی : مریەم خان ئەگەر شتەکت نەمایە دەتانی بڕۆی..!
مایتی[1]