قوماش 54
نووسینی: #ئوسامە جەمیل#

لە سەر نانی سبەینێ بووین، بابم گۆتی: ئەمن دەچمە گەڕەکی ئازادی و بەدوو خەبەرەکی ماری قادرە فەندی دادەچم، ئەوڕۆ ئیللاو بیللا دەبی بیبینمەوە، سەبرم نەماو چیدی ئەو جەرگەم ڕێم نادا، ئەتوو ئەوها لە عاسمانێ بمینێیەوە، ئەمان کوڕم یەک ڕجام لەتوو هەیە، ئەگەر هەورین مێردی کردبوو، یان چشتەکی بەسەرهاتبوو، پیاو بەو سەبر و ئارامت هەبی، هەر چشتەک خوا بینی ئەوە باشە، ڕەنگە زۆر شت هەیە دێ و بە دری مە نیە و پێمان ناخۆشە، بەران کێ دەرێ خێری تێدانیە! بابم وەکی ئەو قسانەی کرد، لێدانی درم زیادی کرد، وام هەست کرد بابم شتەکی دەزانی و لەمنی دەشارتەوە! گۆتم: بابە، ئەگەرشتەکت زانیە، هەر ئێستا پێم برێ و پێویست ناکا ئەو ئەزیەتەی بخۆی و بچیە دوو خەبەری قادرە فەندی، بابم گۆتی: نا کوڕم نا، ئەمن دەبی بەخۆم بچم و بە تەواوی وەخەبەرەکی بکەوم و بێمەوە لە دوڕ دەستت بنێم! داکم گۆتی: یاڕەبی خوایە مرازی ئەو کوڕەم حاسر کەیی و لەو خەم و خەفەتەی قورتاری کەی! بابم هەستاوە و جلکی گۆڕی و گۆتی: ئەمن ڕۆیشتم، بە دوعا، هەتا دەرکەی لەگەر بابم چووین، هەر چووینە دەرێ و شێرۆ بەخۆو بە لادەوە گەیشتەمە، گۆتیە بابم: فەرموو با بتگەینم! بابم گۆتی: ئەتوو دەوامت هەیە و بڕۆ ئەمن عیلاجەکی لەخۆم دەکەم! شێرۆ گۆتی: دختۆر شێرۆ بەخۆی دەزانی دەوامی کووە و کوو دەوامەکەش تەرتیب دەکا، هەر بەخۆشی لە ئیشی خۆی دەزانی! داکم گۆتی: دیسان دەستت پێکردەوە؟ شێرۆ ئەعسابی نەماو گۆتی: دەی دەی دیسان برێ قون کەتی، وەڵلاهی وەبیللاهی کێشکەش بە پێش دەرکەتان دابێ، ئەتوو ناوەکی لێدەنێی! بابم گۆتی: بابڕۆین شێرۆ بابڕۆین! بابم سواری تڕومبێلی بوو، شێرۆ لاوکەکی کاوێس ئاغای هاویشتە سەرێ و گۆتی: ئەوەیە ڕوعی من، بەلاش نەیگۆتیە کورد خاینۆ، ئەی سەت هەزار ڕەعمەت لەگۆڕت کاوێس ئاغا، بابم و شێرۆ ڕۆیشتن و ئەمن و داکیشم چووینەوە ژۆرێ!
دانیشتبووم و فکرم لە چوونی بابم دەکردەوە لۆ ماری قادرە فەندی، وەختەکی قسەی قادر قرپەستوورم بە بیر هاتەوە کە گۆتی: قادرە فەندی جەڵتە لێیدایە و هات و چووی عیلاج تەبیعی دەکا، گۆتم: باشە عیلاج تەبیعی وا لەبن پاری ماری خۆمانە لەناو خەستەخانەی جمهوری، لۆ نەچم تاقیبەکی بکەم بزانم قادرە فەندی لەوێ نیە! یەکسەر جلکم گۆڕی، داکم گۆتی: بەتەمای کێندەری بە قوربانت بم؟ گۆتم: هەتا خەستەخانەی جمهوری دەچم و بڕەک ئیشم هەیە، داکم گۆتی: ناکرێ نەچی؟ گۆتم: هیچ نابی ئیشاڵلا، تەئکیدبە دێمەوە، هەرکووی هەبوو داکم ڕازی بوو، خوا حافیزیم لێکرد و چوومە دەرێ.
بە هەزار دەردی سەری ئیزنیان دام بچمە ژۆرێ، چوومە لای عیلاج تەبیعی، لە پێش دەرکەی ڕاوەستام هەر نەخۆش دەچووە ژۆرێ و دەهاتە دەرێ، قادرە فەندی نە چووە ژۆرێ و نەهاتە دەرێ، گۆتم: باشە لۆ نەچمە ژۆرێ بزانم بە خەبەرەکی ناکەوم، چوومە ژۆرێ دیتم دوو سێ کەس لەو ناوەی بوون، ئێکەک لە پشت مێزی دانیشتبوو، لۆ لای وی چووم، ئێکەک لەوسەری هاواری کرد، ئۆی یاخوا بەخێربێی، ئەوە کووە ڕێت غەرەت کردیە، ئاوڕم داوە کارزانی برادەرم بوو، کارزان لە ئامادەیی پێکەوە بووین، ئەو چووبووە پەیمانگای پزیشکی و بەشی عیلاج تەبیعی خیندبوو، چاک و چۆنیم لەگەر کردو ئێکدیمان ماچ کرد، دەستی گرتم و گۆتی: بابچینە ژۆرەکەی من، لەگەری چووم و لەسەر کورسیەکی دانیشتم، پاش بەخێراتنی گۆتی: خۆ نەخۆش نی؟ گۆتم: ناوەڵلا، گۆتی: ئەدی کووە هاتی؟ گۆتم: ئەوی ڕاستی بی ناسیارەکم دێتە ئێرە لۆ عیلاجی گۆتم بزانم نایبینم، گۆتی: ناوی چیە؟ گۆتم: ناوی قادرە و جەڵتە لێی دایە و نیوەی لەشی هیشک کردیە! گۆتی: قادرە فەندی نەرێی؟ گۆتم: بەرێوەڵلا، دیارە دەیناسی؟ گۆتی: وەڵلا یەک دوو جارم لە دائیرەی ئاوێ دیتبوو، ئێستاش دێتە کنەمە لۆ عیلاجی، گۆتم: چ ڕۆژ دێ؟ گۆتی: دووشەمان و پێنجشەمان، ئەوڕۆ شەمووە، سبەی نا دووسبەی وەرە دەیبینی، درم زۆر خۆشبوو کە سەرە داوەکم بە دەست کەت، گۆتم: خوا عومر بدا، دووسبەی دێم و دەیبینم!
بەینەکی باش دانیشتم و پاشان کارزانم بە جێهێشت و شۆڕ بوومەوە لۆ لای مارێ، لەسەر جادەی شێستی نەسوڕابوومەوە، جێبەکی جام ڕەش بە تووندی لە تەنیشتم ڕایگرت و دوو زەلام لۆلای من هاتن، تووند قۆریان گرتم و گۆتیان: یالله اصعد یا خائن(یاڵلا سواری تڕومبێلی بە هەی خائن).

سواری تڕومبێلی بووین و سایەقەکە پێی لێنا، لە بەینی دووانیان دانابووم، وەکی نێزیک بووینە لە دائیرەی ئەمن، هەردوو چاویان بە پەڕۆکەکی بەستم، جێبەکە هۆڕنەکی لێدا، جیڕەی دەرکەی هات و چووینە ژۆرێ، وەختەکی تڕومبێلەکە ڕاوەستا، دەرکەیان کردەوە و قۆریان گرتم و ئەمنیان هینا خوارێ و لەگەرە خۆیان بردم، بەینەکی باش ڕۆیشتین و پاشان گێم لە تەپەی پێی دوو زەلامەکەی بوو کە قۆری منیان گرتبوو، ئێکیان گۆتی: سیدي جبناه(گەورەم هینامان)، ئەویش گۆتی: عفیە علیکم(ئافەرین لۆنگۆ)، چاویان کردمەوە، دیتم پیاوەکی قەرەوی تەنگەستوور لە پشت مێزی دانیشتیە! گۆتیە من: ها کاکە چۆنی باش؟ گۆتم: باشم زۆر مەمنون! کابرا دەستی لۆ کورسیەکی درێژ کرد و گۆتی: دانیشە! ئەمنیش دانیشتم و هەستاوە و جغارەکی لۆ ڕاگرتم، گۆتم: مەمنون جغارەی ناخۆم، لە هەمووی عەنتیکەتر کابرا بە کوردیەکی تێکشکای قسەی دەکرد، گۆتم: ئەتوو کوردی؟ گۆتی: نا، ئەمن خەڵک گوێڕ، ئوو دەزانم کوڕدی! جغارەکی پێکرد و جەڕەسەکی لێدا، ئێک هاتە ژۆرێ تەحیەی کرد، ئەویش گۆتی: جیب چای لکاکە(چایەی لۆ کاکەی بینە) وەکی باسی چایەی کرد، ئەمن ترسام، گۆتم: ئەکید دەیانەوێ زەهیر خواردیم بکەن! وەختەکی چایەکە هات و لە پێشیان دانام، کابرا چۆوە سەر مێزەکەی خۆیی و فایلەکی لە پێش بوو، هەرگێڕو وەرگێڕی دەکرد، وەختەکی تەماشای کردم چایەکەی ناخۆمەوە، گۆتی: بخۆ ئەو چا، دەبی ساڕد! گۆتم: ببورە حەزم لێ نیە، یەکسەر زانی لۆ ناخۆمەوە، لۆیێ هات چایەکەی تێکدا و قیچەکی لە بن پیارەکەی کرد و خواردیەوە، ئەوجە گۆتی: ئەوجە بخۆ ئەو چای! ئەمنیش تەئمین بووم چایەکە هیچی تێنەکرایە، لۆیێ دەستم دا پیارەکەیی و یەک دوو فڕم لێدا، کابرا هات لە بەرامبەرم دانیشت و گۆتی: بازۆ چۆنە ئەو باش؟ گۆتم: نازانم و هیچ ئاگام لێی نیە! گۆتی: ئەو زەڵام هات لای ماڵتان ئوو گۆتی: بازۆ سەلام هەیە! گۆتم: ئەمن پێم گۆت بازۆی ناناسم و جارەکی دی نێیەوە، گۆتی: ئەدی لۆ خەبەر نەدا ئێمە ئەو پیاو هات! گۆتم: وەڵلا نەوێرام، ترسام بمگرنەوە و دیسان کەل و کۆمم کەن! گۆتی: ئەو پیاو هات، ئەو موعتەمید ئێمە، ئوو ویستمان بکەین ئیمتیحان ئەتوو! گۆتم: ئەمن گیرابووم وەکی بازۆ چووە دەرێ، ئیدی ئاگام لێی نیە و نازانم لۆ ڕۆییە، ئەوەندە برادەریش بووین قەت باسی نەکردیە، ئەو تەنزیم داخیلی بی، یان بیەوێ بچیتە دەرێ، پێم سەیر بوو ڕۆیی، گۆتی: ئەتوو گیڕا، ئەو تڕسا، چوو لای موخەڕیبین! ئەوجە ئەمن دەوێ ئەتوو ئیشەک! گۆتم: فەرموو، گۆتی: بڕۆ لای بازۆ، بینە ئەو تەسلیم دائرەی ئەمن! گۆتم: وەڵلا هەر نازانم بازۆ لە کێشە، هەتا بچم بیهینمەوە، خوا بزانی ئێستا لە کێ یە! گۆتی: ئەمە دەزانین ئەو لەکێ، ئەو لە بالیسان لەگەر موخەڕیبین، ئوو هەیتی سیلاح کڵاشینکۆف، بڕۆ بینە بازۆ، برێ عەفوو دای سەیدولڕەئیس، ئوو ئەگەر ئەوهات ئەمە دەدەین موکافەئە ئەتوو، ئوو پارچە عارد باش! گۆتم: وەڵلاهی بازۆ پیاوەکی زۆر عینادە و بە قسەی من نایێتەوە، ڕەنگە لۆی ڕێک بکەوی بچتە خاریج، ئەو حەزی لە خاریج بوو، گۆتی: ئەتوو بکە ئەو محاوەلە، ئەگەر نا بازۆ بکە جاسووس ئێمە، ئەخبار بینی، ئوو ئەمە دەدەین ئەو پارە، ئوو ئەو دەبی مواتن شەریف لۆ حزب و سەیدولڕەئیس!
لە دری خۆم گۆتم: خوایە ئەو بەرایە چیە تووشم بووە، ئەو سەگبابە دەیەوێ ئەمن بکاتە ئەمن و جاسووس و بچم بازۆی بینمەوە و ئیعدامی بکەن، باشە ئەمن چبکەم، ئەگەر نایکەم تووشی کێشەکم دەکەن، ئەگەر دەیکەم خیانەت و جاشاتی و خۆ فرۆشیە، یاڕەبی خوایە بە هانام بێ و لەو وەزعەی قورتارم کەی!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!