قوماش 78
نووسینی: #ئوسامە جەمیل#

گۆتم: ئەگەر ئەتوو لە سێدارە نەدرایی و بەربووی، دەنگ و باسی من بگەینە کۆترەکانی سەر تێلی کارەبای پێش ماری هەورینی، ئەگەر ئەمنیش قورتاربووم، دەچمە کن نەسرینی و بەدرێژی باسی تووی لەبۆ دەکەم! فرمێسک بە هەردوو چاوی داهاتە خوارێ و گۆتی: بابزانین کوو دەبی!
پاش مەغریبەکی درەنگ دەرکەیان کردەوە و میوەیان لۆ هیناین، تەماشام کرد سێو و پرتەقار و ئاروو(خەیار) بوو، وەکی چاوم بە پرتەقارەکەی کەت، ئاگرم دە هەناوی بەربوو، چونکە دەمگۆ: ئەوشۆ ڕەنگە ئاخیر شەوبی بتانم فکر لە هەورین و قسە خۆشەکانی بکەمەوە، فکر لە پێکەنین و قۆرتی ڕوومەت و خەتی چەناگەی بکەمەوە، فکر لە پیاسەی بەرباران و گریانی دووری بکەمەوە، کێ دەرێ پاش دەرچوونی فەرمانی لە سێدارەدانمان یەکسەر لە سێدارەمان نادەن و مەیتەکەمان لە بیابانی ئەبو غرێب لەبن خۆرێ نانێن! لەو داڵغە و خەیارە پڕ خەمانە دابووم، ئێکەک لەوانەی لەگەرمان گیرابوو، تێی هەرکرد لە چەپکە گۆرانیەکی پڕ خەم و خەفەت و ئاگری لە هەناوی هەموومان بەردا، ئێک لەو برادەرانەی لەگەرمان بوو، زۆر سوحبەتچی بوو، لەناو ئەو هەموو خەمەش زوو زوو نوکتەکی خۆشی لۆ دەگۆتین، ڕووی لە گۆرانیبێژەکەی کرد و گۆتی: کورە دە تێهەرکە لە سێ چار گۆرانی خۆش، با ئەوشۆ تێر تێر هەرپەڕین، چەند خۆشە بە شایی و سەرچۆپی گرتن بەرەو مردن بچی! کابراش تێیهەرکرد لە گۆرانی شایی و هەستاینەوە دەستی ئێکدیمان گرت و دامانبەستە شایی، شاییەک دەگەڕا ئەممان شایی، ئێک دووەک لە شایی دەهاتنە دەرێ و بە لەرزانە لەوسەری شایی دەچوونە ئەوسەری، درۆ نیە ئەگەر برێم فرمێسک و پێککەنین تێکەر ببوون، لەگەرمەی شایی و هەرپەڕکێی دابووین، دەرکەی هۆرەکەی کراوە و چار پێنجەکی بە چەک و کێبل هاتنە ژۆرێ، ئێکیان زابت بوو سێ ئەستێرەی لەسەر شانی بوو، ئەمە کە ئەوانەمان دیت، دەستمان لە شایی بەردا و ڕاوەستاین، کێبل بە دەستەکان هاتن لێمان بدەن، زابتەکە نەیهێشت، گۆتی: انتظروا(ڕاوەستن)! ئەوجە ڕووی لەمە کرد و گۆتی: لیش تدبکون(لۆ شایی دەکەن)؟ ئێکەکمان بە عارەبی گۆتی: ئەمە چارەنووسمان لە دەست سبەینێیە، کێ دەرێ بەس ئەوشۆ ناژین، ئەوجە با ئەوشۆ بە شایی و هەرپەڕکێی ببەینە سەری! زابتەکە کشاوە پاش و گۆتی: دەست پێبکەنەوە! ئەمەش یەکەمجار نەوێراین، گۆتمان ڕەنگە توڕەبی و بیەوێ ئازارمان بدا، کە دیتی دەست پێناکەینەوە، گۆتی: لا تخافوا، استمروا(مەترسێن و بەردەوام بن)، ئیدی دەستمان پێکردەوە، شاییەکی زۆر گەرم و گوڕمان کرد، زابت و جوندیەکان سەریان سوڕمابوو، هەتا ئارەقەمان کرد هەرپەڕین، وەکی دەستمان لێک بەردا و گۆتمان: تەواو! زابتەکە بەینەکی تەماشای هەموومانی کرد و گۆتی: الشعب الي بالدبکة يستقبل الموت، ابد ميموت(ئەو میللەتەی بە شایی بەرەو پیری لە سێدارەدان دەڕوا، قەت لەناوناچی)!

زابتەکە و ئەوانەی لەگەری بوون چوونە دەرێ، ئەمەش دانیشتینەوە، بڕەکی پێچوو ئێکەک هات، گۆتی: بنوون، کارەبای دەکوژێنینەوە، ئەمەش بە پەلە نوێژمان کرد و لێمان پارداوە، زۆر زۆر تەئکیدم هیچمان ئەو شەوەی خەومان لێنەکەتیە، مەگەر ئاگامان لەخۆ نەبووبی و خەومان لێکەتبی، نازانم ئەو شەوە کوو ڕۆیی، هەموو ژیانی خۆم هەر لە منداریەوە هەتا ئەو شەوەی لێم پاردایتەوە، بە خۆشی و ناخۆشی هەمووم هاتەوە بەرچاوی، گوندەکەم و مندارم و چوومە مەکتەب وهاتنە شاری وبرادەر و خیندن و ناسینی هەورینی و داک و بابم و دەر و دراوسێ و قادر قرپەستوور و زەکیەی خێزانی و دختۆر شێرۆ و بازۆ و گەلاوێژ خانی داکی و قادرە فەندی و فەوزیە خانی خێزانی و خراپی و باشی هەموو ئەوانەی ناسیمن! وا هەست دەکەم ژیان زۆر بەخێرایی دێ و بە یەک چرکەی دەڕوا، ژیان ئەو ساتەیە کە هەناسەی تێدا دەدەی!
وەختەکی گلۆپیان پێکردەوە و گۆتیان: هەستن خۆتان خڕکەنەوە، نانی بەیانی بخۆن، با بتانبەین لۆ مەحکەمەی، ئیدی قیت بووینەوە و خۆمان پێچاوە و نانیان هینا، هەر ئێکەو یەک دوو پارووە نانمان خوارد و چاوەڕێ بووین بمانبەن، هەموومان بێتاقەت بووین، هەستمان دەکرد، ئەوڕۆ و لەو دەمەی ڕوحمان لە دەستی سەرۆکی مەحکەمەیە، چ بڕیار بدا ئەوەیە، یان مردن، یان ژیان!
دەرکەیان کردەوە و کۆمەرەک هاتنە ژۆرێ، وەکی جاران کەلەپچەیان لە دەستی کردین و چاویان بەستاین و ڕێزیان کردین، ئێک لەوان دەستی نەفەرەکەی پێشەوەی گرت و ئەمەش لە دوو وی ڕۆیشتین، دیاربوو چووینە دەرێ، سواری پاسیان کردین، پێدەچوو چەند چەکدارەک لەناو پاسەکەی مە دانیشتبن، پاس بە ڕێکەت، ماوەکی پێچوو گێمان لە دەنگی تڕومبێلان دەبوو، زانیمان چووینە ناو قەرەبارغی، دەوری سعاتەکی پێچوو، پاسەکە بڕەکی ڕاوەستا، دوایێ بەڕێکەت، بەگێرەی بەڕێکەتن و ڕاوەستانی پێدەچوو لە دەرکەکی گەورە چووبیتە ژۆرێ! بەینەکی ڕۆیی، دوایێ ڕاوەستا، دەستیان گرتین و یەک یەک ئەمەیان هینا خوارێ، بەینەکی لە دوویان ڕۆیشتین، دوایێ چاویان کردینەوە و بە عەرەبی گۆتیان: لەسەر ئەو کورسیانە بە بێدەنگی دانیشن، ئێستا تۆزەکیدی دی یەک یەک ناوتان دەخیندرێتەوە و ئێکەک دەتانباتە ژۆرێ، ئەو ژۆرە ژۆری سەرۆکی مەحکەمەیە، لە خۆتانەوە قسان نەکەن، چی لێپرسین ئەوەی وەرام دەنەوە، هەرئێکتان محامیتان هەیە، ئەو محامیە لە باتینگۆ قسەی دەکا، گۆتمان: وەڵلا ئەمە محامیمان نەگرتیە، گۆتی: دەزانین، حکومەت بەخۆی محامی لۆ گرتینە، جارێ بێدەنگ دانیشن هەتا گازتان دەکەین.
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!