قوماش 121
نووسینی: #ئوسامە جەمیل#

بازۆ هەردوو چاوی پڕی فرمێسک بوون، گۆتی: شەرتبی ئەوەی لە توانام دابی لۆی بکەم، قسە هەیە پاشی یەک دوو حەفتەی دی هەندە دختۆری سویدی بێنە ئێرە لۆ چارەسەریکردنی خەرکی، ئەگەر لەسەر خێران هاتن، بەخۆم دەیبەم و پیشانی ئەو دختۆرانەی دەدەم، بچمەوە سویدیش لەوێش خەمەکی لێ دەخۆم، بەشکوو بتانم بیبەمە دەرێ و لەوێ عیلاجی بکەین! بابم گۆتی: خوا خێرت بنووسی کوڕم، خێرەکی گەورە دەکەی، بەڕاستی لە خەمەکی گەورە داینە، داکم گۆتی: هەمووی لەبن سەری ئەو سەرۆک جاشە سەگبابەی بوو، وەی دەنا بەو دوو چاوانە مەیتم بدیتبا لە دوو تڕومبێلی ڕایبکێشن! بازۆ گۆتی: دەبی بەو دەستانەی خۆم تۆرەی ئەو وەزعەی بکەمەوە، سبەینێ دەچمە بەرەی، هەموو برادەرەکانم لەوێنە، کۆمەرە چەکدارەکی وەگە خۆم دەدەم و دەچین پارچە پارچەی دەکەین، داکم گۆتی: کوڕم، ئەگەر گرتتان بیهننە ئێرەو لە پێش چاویمە گوللە بارانی بکەن، با درم دابکەوی!
بازۆ دەوری دوو سعاتان دانیشت، زۆری قسە لەگەر من کردو زۆر شتی باس کرد، هیچم بەبیر نەهاتەوە، بە دوور و درێژی باسی هەورینی کرد، فایدەی نەبوو، دەیگۆ: وەبیرت نایێ ئەمنیش دەمگۆ هەناری دەینم و دەبمە ولداش زاوات، ئەتوو بەفرینی بینەو ئەمنیش هەنار، ئەتووش دەتگۆ کورە هەی بێ ئاقر هەورین هەورین، نەک بەفرین! ئەمن بەس سەرم بادەدا، داکم ئەلبومەکەی هیناو کۆمەرە ڕەسمەکی من و بازۆی پیشان دام، لە سەر قەراتێ و لە ئاکرێ و لە سەرێ ڕەش و لە بەغدایێ گرتبوومان، بازۆ دەیگۆ: ئەوە بەغدایە، ئێرە ئاکرێیە، ئەوە سەرێ ڕەشە، ئەمن تەقەی سەرم دەهات! ئەمە لەو وەزعەی دابووین، وەختەکی دختۆر شێرۆ بەژۆرێ کەت، ڕدێن و سمێری تێکەر ببوو، کەچە شەروارەکی لەبەربوو، هەر لەدەرکەی حەوشێ هاواری کرد: دختۆر شێرۆ هاتەوە؟ داکم گۆتی: هەی قوون کەتی ئەوە کوو درت هات بەخۆت و مارو مندارت بە لادەی دەرپەڕی و ئەمەش ئەوها بەجێبێلی! شێرۆ گۆتی: ماشەڵلاجێی خۆم زۆر دەبۆوە ئەوجە نۆبەتینگۆیە، دوو منداری خۆڕی خۆمم لە سندوقی نابوو، ئەوجە جێمان بۆوە، شێرۆ لەو قسانە دابوو، وەکی چاوی بە بازۆی کەت، گۆتی: ئۆی ئەوە چاو بەلەبۆق نەبی، ئەوە کەنگی هاتیەوە سەیە! هەردووک غاریاندا ئێکدی و باوەشیان پێککردو تێر تێر ئێکدیان ماچ کرد، شێرۆ هات دانیشت، بابم بەخێراتنەوەی کردو گۆتی: دختۆر شێرۆ هەتا کێندەرێ چووی؟ گۆتی: وەڵلا خۆم لە دیانەی مات کردبوو، وەکی خەبەریان دا جەو ساف بووە، گۆتمە منداران: سەگبابینە هەستن بڕۆینەوە! ئیدی هاتینەوە، بەس کەس لەگەڕەکێ مابوو، یان هەموو ڕۆیشتن؟ بابم گۆتی: بەس مارێ حاجی سمایل سۆفی و مام ئەنوەری مابوون، ئەمەش شەوەکی چووینە شاوێسی و لۆ سبەینێ هاتینەوە! دیتمان خێزانی شێرۆی هاتە ژۆرێ و زگی بە پێشە خۆی دابوو، بە خوارو خێچی دەڕۆیی، بازۆ گۆتی: ئەرێ شێرۆ بە خۆو بە ژنەوە لەمە بووینە کێروشکی تورکی، هەر شەش مانگ جارەک مندارەکتان دەبی، دە بەسە بڕەکی لێبگرنەوە! شێرۆ گۆتی: خۆت تێهەرمەقووتێنە چاو بەلەبۆق، دختۆر شێرۆ بەخۆی ئیشی خۆی باش دەزانی و بەخۆشی دەزانی چدەکاو چناکا، دوایێ با پێت برێم، بەخوای بەس ئەو ئیشە تەواوە، ما باقی هەمووی فشەیە!

بابم گۆتی: کاکە واز لە دختۆر شێرۆی بینن، بڕەکیدی تەنگاوی بکەن دۆو دۆشاوی تێکەر دەکا، دەوەرە کیژم وەرە، ئەوە دختۆر شێرۆش لێرەیە، خێزانەکەی شێرۆی هات و سەلامی کرد و چاک و چۆنی لەگەرەمە کردو لەکن داکم دانیشت، پستەپستەکی لەگەر داکم کردو داکیشم ئیشارەتەکی دایێ لۆ بەلوعەکەی نێزیک دەرکەی حەوشێ، ئەویش هەستا، هەندەی نەبرد هاتەوەو دوو پەقرەجی(سەتڵ) هیناو پڕی ئاوی کردو بردیەوە مارێ، بازۆ گۆتی: دختۆر شێرۆ دەرێی قەوماندیتت و ئاوتان نیە! شێرۆ گۆتی: ناوەڵلا، وەکی ڕۆیشتین قفلی سەربانیم گرتبۆوە، تانکیش قەترە ئاوەکی تێدا نەمایە، لۆیێ داکی منداران هات دوو پەقرەجە ئاوی برد هەتا ئاو دێتەوە! بابم گۆتی: کوڕم مار ماری خۆتە هەرچی ویستت وەرە بیبە! شێرۆ تەماشایەکی منی کردو گۆتیە بابم: باشە بە ئاقر ئەتوو ژنەکی لۆ سەرلووسی بینی دەبی چانەبی؟ بابم گۆتی: ئەتوو برێی باشبی؟ دختۆر شێرۆ گۆتی: ئەرێوەڵلا ئێکەو ئێکە، ژن دەرمانی سەت دەردیە، دەردە سووکەکەی سەرەتانە، بەگێی من بکەن، لێ بکشێنەوەو یەک ژنی لۆ بینن! بابم گۆتی: وەڵلاهی دەترسێم کەلکی ژن هینانێی نەبی و ژنەکەش ببتە بەرا بەسەری، ئاخر ئەو بەستەزمانە چی بەسەر چ مایە هەتا ژنی لۆ بینین! شێرۆ گۆتی: ئەدی ئەتوو تەمسیلی ڕەجەبیت نەدیتیە، ناسکە کوو ڕەجەبە گێلی دەگۆڕی و دەیکاتە پیاوەکی دی، ژنەکی هەیتەی لۆ بینە بە دارو بەردی دابدا، بە بیللا بە مانگەکی گێچ و بلانسی سەرلووسی دەکاو دەیهینتەوە سەر تایم! بازۆ گۆتی: بەگێی من دەکەن پەلەی لێناکەن، با پیشانی سێ چار دختۆری باشی بدەین، بەشکو چارەسەری بکرێ، ئەوجە خەمی ژنهینانی لێ دەخۆین! کاکە ژن هینان مەسوولیەتە دختۆر شێرۆ، خۆ هەر ئاو بەخۆ داکردن نیە، ئەو کوڕە نەخۆشەو پێویستی بە عیلاجیە، جارێ کا وەختی ژنێیە! شێرۆ گۆتیە بازۆی: ئاگام لێیە وەتی چاوبەلەبۆق چوویتە خاریج و ماریج، قسەی گەورە گەورە دەکا، بەگێی ئەو قەلاجەی مەکەن و ژنی لۆ بینن، وەڵلا وەکی تۆپی لێدێ، داکم گۆتی: وەڵلا خۆ ئەوەش قسەیە، کێ دەرێ بەو ژنهینانەی باش نابی، بابم گۆتی: بابە ئامەننا بیللا ژنی لۆ دەینین، بەران کێی لۆ بینین؟ داکم گۆتی: خەجەی کیژی پلکم مامزی لۆ دەینین، خەجە هێشتا مێردی نەکردیەو هەناویشی سووتایە لۆ ئەوکوڕەی من!
ڕۆژی پاشی وەختی عەسرێ، بازۆ هاتە ماریمە، سێ چار مەخزەنی لەخۆ بەستبوو، کلاشینکۆفەکیشی پێبوو، هەشت نۆ زەلامیشی لەگەر بوو، پیکابەکی جەیشی عێراقیان پێبوو، داکم هەر چاوی پێکەت، گۆتی: هەی لەبەرت مرم کوڕە کورد، ئیشاڵلا ئەو سەرۆک جاشەت تۆپاندیەو مێشکت بە جادەی وەنووساندیە! بازۆ گۆتی: ناوەڵلا دایە حاجی، کابرا لەمارێ نەمایەو هەراتیتە موسرێ، هەورین و مندارەکانیش بردیە، چووینە مارێی، دیتم مەسوولەک دەستی بەسەر خانیەکەی داگرتیەو لەناو دانیشتیەو عەلەمەکیشی لەسەر بانی چەقاندیە، گۆتم: کا ئەو سەرۆک جاشە خۆڕیە؟ گۆتی: هێواش بابە قسەی پێمەرێ، ئەوە خزمی منە، وا چوویتە موسرێ، خەبەرم لۆ ناردیە بێتەوە، کتابی عەفووم لە بەرەی لۆ وەرگرتیە! گۆتم: بابە عەفووی چ و حاری چ، ئەوە یەکەم دڕندە بووەو دەیان پێشمەرگەی کووشتیەو بەشداری ئەنفالەکانی کردیە، گۆتی: کاکە ئەوە تەنزیمی خۆمان بووەو بە ئەمری حیزب ئەو ئیشانەی کردیە، وەڵلا بێتەوەو ئەوەی لێی نێزیک کەویتەوە، ئەمە وەکو حیزب ئیجرائاتی لەگەر دەکەین!

بابم گۆتی: باشە ئەنگۆ چتان نەگۆ؟ بازۆ گۆتی: بەرێوەڵلا، لێمان بووە قڕەقڕو چەک لێک ڕاکێشان، ئیدی خەرکمان کەتە بەینێ و گۆتیان: بابە ئەنگۆ دوو ڕۆژە هاتینە خوارێ، کێڕان ملتان لەبەر ملی ئێکدی نا، ئیدی ئەمە ئەوێمان بەجێهێشت و هاتینەوە، بەران ئەوان زۆر سەهونە ئەگەر وابزانن ئەوها بە ئاسانی وازیان لێدەینین! بابم ئاخەکی هەرکێشاو گۆتی: وەڵلا ئەوجە ئەگەر ئەوانە بەتەما بن لەو دڕندانە خۆشبن و هەر حیزبەکیش کۆمەرە جاشەکی لە پەنا خۆیبنێ، مەعنای وەیە ئەو میللەتە هیچی بە هیچ نەکرد و ئاخیری ئەو میللەتەی خێربی! داکم زۆر بێتاقەت بوو، گۆتی: ئەمن خەمی چشتەکیدیمە، بابم گۆتی: خەمی چ؟ گۆتی: وەڵلا دەترسێم بەینەکیدی ئەو جاشە بێتەوەو وەکی جاران دەوری ببتەوەو مل لەبەر ملی ئەو کوڕەمان بنێتەوە، بازۆ گۆتی: حەدی چیە، وەڵلا دەبی پارچە پارچەی بکەم، لە خوام دەوێ بێتەوە، ئەوجە دەبینن، کوو تۆرەی ئەوەل و ئاخیری لێدەکەمەوە!
چار پێنج مانگ تێپەڕی و وەزعەکە بەتەواوی ئارام بوو، حوکمەت هێشتا لە هەولێرێ مابوو، پێشمەرگەش هاتنە خوارێ و بارەگایان داناوە، ڕاوە ئەمن دەستی پێکردبوو، بەران ڕاوەکە هەر لۆ عارەبان بوو، زۆربەی ڕەفیق حیزبی کورد و سەرۆک جاشەکان بەبەر لێبوردنی بەرەی کەتن، نەک هەر ئەوەندە هەموویان بوونە شۆڕشگێڕو بارەگایان داناو لە باتی ئاڵای عێراق ئاڵای کوردستانیان بە تڕومبێلی وەکردبوو، لەناو شاری دەسوڕانەوەو کوردایەتیان بە خەرکی دەفرۆشتەوە، دەیانگۆ ئەمە بیست سارە تەنزیمین و لەبنەوە پەیوەندیمان بە سەرێ هەبووەو هەزار و یەک ئیشمان لۆ کردینە، ئیدی خەرکە فەقیرەش بێتاقەتیان پێوە دیاربوو، بەران دەسەراتی هیچیان نەبوو!
بەیانیەکی بازۆ هاتە مارێ و گۆتیە بابم: جلکتان بگۆڕن، دوو سێ دختۆری سویدی هاتینەو لە عەنکاوەی دادەنیشن، مەوعیدم لێ وەرگرتینە، بابچین بیانبینین، بەشکو بتانن چارەکی لەو کوڕەی بکەن، بابم گۆتی: وەڵلا ئەمن دختۆری ئێرەم پێ کردیە و هیچیان پێنەکرایە، دەبا بچین بەشکوو ئیشاڵلا خوای گەورە لەسەر دەستی وان شفای لۆ دەنێری، خۆمان حازر کردو لەگەر بازۆی ڕۆیشتین، بازۆ بەڕازیلیەکی پێبوو، ڕەقەمەکی پێوەبوو، نووسرابوو: بەرەی کوردستانی، دوو ئاڵای گەورەشی پێوە کردبوو، دیاربوو بازۆ سەرە گوریسەکی بەدەست بوو، چونکە بە دائیمی دوو چەکداری لەگەربوو، گەیشتینە عەنکاوەیی و لە کۆرانەکی چووینە ژۆرێ، چەکدارەک هاتە پێش و گۆتی: فەرموون! بازۆ گۆتی: مەوعیدمان لەگەر مستەر جۆرجی هەیە!
مایتی.[1]

⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!