قوماش 123
نووسینی: #ئوسامە جەمیل#

داکم گۆتی: وەی لۆت کۆرەبم ڕۆرە، وەت لێهات خەجەش پێت ڕازی نەبی! خەجە توڕەبوو، گۆتی: لۆ ئەتوو کوو لەمن گەیشتی، خۆ گێل نیمە مێرد بەو شێت و شوورەی بکەم! وەزعەکە بەتەواوی تێکچوو، بابی پشتەدەستەکی ڕاوەشاندو لە چڕوچاوی خەجەی گیر کرد، خەجە هاواری کرد: وەی بابە چاوم دەرپەڕی، بابم گۆتی: بابە ناوی خوای بینن و وازبینن، کێ باسی ژن هینانی کردیە ئەنگۆ لەو گۆڕەی کردیتتانە هەرا، داکی خەجەی مشەوەش بوو، گۆتیە مێردی: چەند جارم پێگۆتی: مادام هەر دەچین با ئەو کیژە شێت و شۆرەی لەگە خۆمان نەبەین، دەبینی کوو عەیای بردین! هەرکووی هەبوو داکم و بابم ئاگرەکەیان کوژاندەوە، ئەوانیش بڕەکیدی دانیشتن و دوایێ ڕۆیشتن، پاشی وان داکم و بابم پێکەوە دانیشتن و تێر تێر گریان و فرمێسکیان ڕێشت، ئەمیش وەکی چاوم بەوان کەت دەگریان، فرمێشک لە هەردوو چاوم دەباری، بێ ئەوەی بزانم مەسەلە چیە، هەر ئەوەندەم دەزانی ئەمن نازانم کێمەو چمەو چدەکەم لەو مارەی!
بابم زۆر جاران لەگەرەخۆی دەبردمە مزگەفتێ، یان چووبا ماری برادەرەک ناسیارەک خزمەکی لەگەر خۆی دەبردم و حەزی دەکرد تێکەری خەرکی بم، بازۆش ئەو ڕۆژانەی دەیبردمە خولی ڕاهێنانەکەی، پێش ئەوەی بچین ڕدێنی جوان دەتراشیم و کیهان جلکی جوانیش با دەیگۆ ئەوانە لەبەرکە، گەورەترین کێشەی مارێ لەگەرە من ئەوەبوو، یان دوو ڕۆژ لەسەریەک هیچ نانم نەدەخوارد یان هەندم دەخوارد مڕ دەبووم، نەمدەزانی هاوسەنگی لەو شتانە ڕابگرم!
هێوارەکی لەمارێ دانیشتبووین، لە دەرکەی درا، داکم چوو کردیەوە، وەختەکی بە مشەوەشی هاتە ژۆرێ، گۆتیە بابم: هەتا دەرێ وەرە، بابیشم لەگەر داکم چووە دەرێ، بڕەکیان پێچوو هاتنەوە ژۆرێ و مێوانەکیان لەگەربوو، ئەو مێوانە ژنەک بوو، بە هێمنی و لەسەر خۆیی هاتە ژۆرێ، گەیشتە کنە من، بەینەکی تەماشای کردم، دوایێ فرمێسک بە هەردوو چاوی داهاتە خوارێ، هەر تەماشای دەکردم و دەگریا، تەماشا داکمی کرد و گۆتی: بریا بمردبامەو ئەو ڕۆژە ڕەشەم نەدیتبا، بریا ئەمن ئەوهام لێهاتبا نەک ئەو، ئاخ تووشی چ ڕۆژەکی ڕەش بوویمەو کوو بە هەردوو چاوی خۆم وا دەبینم درم لەت و پەت دەبی و ئاگرم لە هەناوم بەردەبی، نازانم بەچ درەک و بەچ ڕووەکی هاتیمە بیبینم و قسەی لەگەر پرتەقاری بکەم!

بابم گۆتی: دانیشە کیژم دانیشە، ئەوی خوا بینی ئەو باشە، کەسمان حەزمان نەدەکرد وەزعەکە ئەوهای لێبێ، بەران چبکەین، دەسەراتمان نیەو دەبی ڕازی بین بە قەدەری خوای! ژنەکە هەر ڕووی لەمن بوو و دەگریا، گۆتیە من: نامناسیەوە، نازانی ئەمن کێمە؟ بەینەکی باش تەماشا هەردوو چاوانیم کرد، ئەوجە سەرم نووی کردو گۆتم: نەخێر، نازانم کێی، خۆزگە دەمزانی ئەتوو کێی، چونکە ئەو فرمێسکانەی توو ئاگری لە هەناوی من بەردایە، نازانم لۆ ئاهی ئەو فرمێسکانەی توو وەکی ئی ئەو ژن و پیاوەیە کە دەرێن ئەمە داکت و بابتین! ژنەکە لەسەر کورسیەکەی هاتە خوارێ و بەرامبەرم دانیشت، بە پەنجەکانی فرمێسکەکانی منی سڕی و گۆتی: ئەمن هەورینم هەورین، ئەو هەورینەی بووە ئاگرەک و خەرمانی ژیانی تووی کردە مشکی(خۆڵەمێش)، دەفکر کەوەو مێشکت بجولێنە، دەتێر تەماشا چاوم کەو بمناسە، دەبەس بمکوژەو بمکوژە، ئەتوو ئەگەر ئەمن نەناسی، کێ دەناسی؟ ئەوجە وەرگەڕا سینگی خۆی بەمستان و خۆی نەهێشت، دەستی لەپرچی خۆینا هەمووی لەبنڕا دەربینی، داکم تووند خۆی تێکردو گرتی، هاواری دەکرد و دەگریاو دەیگۆتە داکم: بەرمدە با کوری درم دامرکێ و ئاگری هەناوم بکوژێتەوە، فرمێسک لە هەردوو چاوی دەباری و وەکی شۆڕەبی دەهەژا، هەژانەک هەمووی خەم و فرمێسک بوو، ئەمنیش چارم نەماو دەستم بە گریانێ کرد، سەرم برندکە عاسمانێ و لەبنی درم هاوارم کردە خوای مەزن هەتا فریام کەوی و لەو خەمە گەورەی قورتارم کا! لەو خەم و گریانەی دابووین، بازۆ هاتە مارێ، وەکی چاوی بە هەورینی کەت، ڕەنگی تێکچوو، بەزۆری خۆی گرت و دەنگی نەکرد، لە دووریمە دانیشت و ئەویش تێرتێر گریا، داکم تووند هەورینی گرتبوو، ئەویش سەری بە سینگی داکم کردبوو و هۆڕ هۆڕ دەگریا، هەرکووی هەبوو داکم هێوری کردەوە، گۆتی: کیژم بەسە خۆت کووشت، خوا قبور ناکا ئەوها لەخۆت دەکەی، ئاخر هەناوی مەشت هەموو دەرهینا، هەر ڕوحمەکی بەو بەستەزمانەی بکە، نازانی مەسەلە چیەو وا هۆڕ هۆڕ دەگریێ! بازۆ پەرداغە ئاوەکی هیناو دایە هەورینی، هەورین لێی وەرگرت و قوومەکی خواردەوە، ئەوجە تەماشا بازۆی کردو گۆتی: بتبینم و نەتناسم، وا ئەو گەوادە هاتیتەوە، فرسەتەو وەکی سەی بیتۆپێنە، با هەموومان نەجاتمان بی لەو وەزعەی! بازۆ هیچ دەنگی نەکردو لێیدا ڕۆیی! بابم کەزانی بازۆ ڕۆیی، مشەوەش بوو، زانی شتەک دەقەومێ، لۆیێ گۆتی: دەزانم بازۆ شتەکی دەکا، بەران زۆر دەترسێم وەکی جارێدی هیچی پێنەکرێ و کابرا دەربازبی، ئەوکاتیش باش دەزانم ئەمە دیسان تووشی کێشەو دۆخەی دەبینەوە!
پاشی ڕۆیشتنی بازۆی هەورینیش هەستا، گۆتی: دەبی بڕۆم سەرەکی لە خوشک و برایەکانم بدەم و لەوێش بچمەوە مارێ، ئەو پیاوە بزانی هاتیمە ئێرە، وەزعەکە تێکدەچی، بابم گۆتی: باشە ئەنگۆ کوو هاتنەوە کیژم؟ ئەویش گۆتی: وەرەقەی تایبەتیان لە بەرەی لۆ کردیە، نەک هەرئەوە لەجاران زیاتر دەوریان دایتێ و هەموو ڕۆژێ سەر لە مەسوولەکی گەورە دەدا، ئێستا باسی تەنزیمات و کوردایەتی و قوربانی دانی دەکا، هەرچی جاشی لەکنیشی بوو، کە پێشتر کوژرابوون لەشەڕی، ئێستا بە شەهید ناویان دەباو لە جێیان دەرێ: خاوەنی هەشت شەهیدیمەو هەموومان خۆمان فیدای خاکی کوردستان دەکەین!

زیاتر لە مانگەکی پێچوو، بازۆ دەنگی نەما، ئەمن هەر لەگەر دختۆر شێرۆی دەچوومە کن مستەر جۆرجی و ڕاهێنانییان پێ دەکرد، هەستم دەکرد گۆڕانکاریەک بەسەرم دادێ، زۆر جار ژانەسەرەکی زۆر تووندم دەگرت و وەکی برێی بروسکەک لە مێشکی دەدام و بەرچاوم تاریک دەبوو، لەبۆ ماوەی چەند چرکەکی هەندە شتی پێشی بە مێشکم تێدەپەڕی، هەندە دیمەن کە سەردەمی منداری، یان گەنجی وەکی بروسکەکی بە مێشکمدا تێدەپەڕی و بزر دەبوو، ڕۆژەکی کە تەواو بووین، مستەر جۆرج بە دختۆر شێرۆی گۆ: ئەوجارە ئەگەر هاتی بابیشی لەگەر خۆت بینە!
شێرۆ دەستی گرتم بچینە دەرێ، لەپێش دەرکەی بازۆم دیت دەهاتە ژۆرێ، لەگەر سەر برندکردنی من لۆ بازۆی، بروسکەک بە مێشکم تێپەڕی و وام هەست کرد مندارم و شەڕە پێلەقەی لەگەر بازۆی دەکەم لە کۆرانێ، ئازەرەکە زۆر تووند بوو، یەکسەر دانیشتم و پارمدا دیواری، بازۆو شێرۆ مشەوەش بوون، غاریان دا ژۆرێ لۆکن مستەر جۆرجی، هەندەی نەبرد هەرسێک هاتن، مستەر جۆرج قیتی کردمەوەو شتەکی وەکی لایتی لە دەست بوو، بە هەردوو چاوی وەنام، ئەوجە بڕەک سەری جولاندم و لەگەر بازۆی هەندە قسەی بە سویدی کرد، بازۆ دری زۆر خۆشبوو، باوەشی پێکردم و چاوی پڕی ئاو بوو، بە شێرۆی گۆ: لە خوای بەزیادبی ئەمەل هەیە پرتەقار بەرەو باشی بڕوا! بازۆ لەگەر مستەر جۆرجی چووە ژۆرێ و ئەمن و شێرۆش گەڕاینەوە لای مارێ!
شێرۆ بە قەستی تڕومبێلی لە پێش ماری خۆیان ڕاگرت و گۆتیە من دابەزەو بڕۆوە مارێ، ئەمن ئیشم هەیەو دەبی بڕۆم، ئەمنیش دابەزیم و شێرۆ ئیشارەتی لۆ ماری خۆیان کرد، ئەمنیش ڕاست لۆ ماری وان چووم، شێرۆ دابەزی و قۆری گرتم و ئەمن و بردەوە ماری خۆمان و لەبەرخۆیی گۆتی: هێشتا مایتی، ئەمنی بردە ژۆرێ و قسەکەی مستەر جۆرجی لۆ داکم و بابم گێڕاوەو ئەوانیش دریان زۆر خۆشبوو، ڕوویان لە عاسمانێ کردو زۆر مەمنونی خوای گەورە بوون!
شەوەکی بووە تەق و تۆقەکی زۆرو کۆران هەمووی مشەوەش بوون، دەنگی تەقەکان لەدووری دەهات، بەران نەدەبڕاوەو کۆتایی نەدەهات، چونکە مارمان لەکن خەستەخانەی جمهوری بوو، گێمان لە دەنگی ئیسعافی بوو، ویقەویقەکی گەلە زۆربوو، داکم و بابم مشەوەش بوون، دەیانگۆ دەبی سەدام هجومی نەکردبی و بیەوێ بەتەواوی هەولێرێ بگری و پێشمەرگەی لەناو شاری دەرکا! دەروجیران هەموو خڕببوونەوەو نەیان دەزانی چبکەن، بابم ڕادیۆی پێکردبوو، بەران دەنگ و باسەکی وەها نەبوو، کە باسی هەولێرێ بکا، خەمەکە ئەوەبوو کارەباش کوژابۆوەو دنیا تاریکستان بوو، وەختەکی لەناو تاریکایی لای خەستەخانەی کابرایەک بە سواری پاسکلی لۆلای مە دەهات، گەیشتە قەرەبارغیەکەیی و سەلامی کرد، قادر قرپەستوور گۆتی: ئەرێ نازانی ئەو شەڕە تەقە چیە؟ کابرا گۆتی: وا لە خەستەخانەی دێمەوە، گۆتیان بەسەر ماری سەرۆک جاشەکیان دادایەو کووشتیتیان، ئەو هەرایە ئی هەندێیە، داکم لە خۆشیان خۆی پێ نەگیراو هەلهەلەکی لێداو گۆتی: قوربانی دەست و تفەنگت بم بازۆ!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!