قوماش 133
نووسینی: #ئوسامە جەمیل#

سواری دوو سێ تڕومبێلان بووین و ناوی خوامان لێهیناو بەڕێکەتین لۆ هەولێرێ، لە ڕێیێ بابم دەستی بە قورئان خیندنێ کردو لە فاتیحەیڕا پێدەهات هەتا ئایەتەلکورسی و چەپکە ئایەت و سوڕەتەکیدی، درمان ڕۆن بوو خوای گەورە دەمانپارێزی و بە سەلامەتی دەگەینەوە مارێ، سوپاس لۆ خوای گەیشتینەوە مارێ، وەکی گەیشتینە پێش دەرکەی دیتم کۆمەرە ئامۆزایەکم هەموویان بەچەکەوە ڕاوەستاینە، قادر قرپەستوور و دختۆر شێرۆش لەوێبوون، مام قادر بڕنۆیەکی قەدیمی پێبوو، خەریتەکیشی بەستبوو، لەوسەری کۆرانێ دەچووە ئەوسەری، دەیگۆ وەڵلا کێشکەش بەسەر ماری مامەستای دابێ دەیکەمە بێژینگ، دختۆر شێرۆش کلاشیکۆفەکی بەدەستی بوو، قۆنداغەکەی بڕابۆوە، ئەننەما کردیتیە مززەلی، خۆی بادەداو دەهات و دەچوو، لەبەرەخۆش دەیگۆ: دختۆر شێرۆ ئەوڕۆ بتبینم و نەتناسم، کوو ئاگری لەکۆرانێ بەردەدەی! داکم تەماشایەکی کردو گۆتی: دەبی شێرۆکە تەقەی پێبکرێ، دەترسێم لەگە پل پێوەنانێ قووناوقوون بەربیتەوەو سێ تەقڵەی لێدا! شێرۆ ئەعسابی نەماو گۆتی: دەی دیسان دەستپێبکەوە، لەخوات دەوێ پەلارەکم لێدەی! بابم گۆتیە داکم: حورمێ واز لە دختۆر شێرۆی بینە، ئەو بەخۆی ئیشی خۆی دەزانی و بەخۆشی دەزانی چدەکاو چناکا، دختۆر شێرۆ گۆتی: دەستت ماچ دەکەم مامەستا، وەڵلا هەر جاشەکی سەر دەربینی، وەکی ئیبراهیم تارتی ساتی بە تەقڵە لۆی دەڕۆم و لەگە یەکەم فیشەکی دەیکەمە فڕوج!
چووینەوە ژۆرێ، دیتمان ئەو مارە سەراوبن کرایە، توومەز جاشەکان چووبوونە ژۆرێ و هەموویان کەلوکۆم کردبوو، ئەوەی بەبەدەستییان کەتبوو هوردوهەڕاشیان کردبوو، ناهەق نەبوو، ئەوان لە ئەنفالەکانڕا ڕاهاتبوون هەموو چشتی هوردکەن و بدزن! وەکی داکم لۆ بابمی باسکرد، بابم سەرەکی باداو گۆتی: هەرچەند تەماشا دەکەم، وا دەبینم ڕۆژانەکی زۆر سەختمان لە پێشەو خوای گەورە بمانپارێزی!
بابم گازی هەناری کردو گۆتی: کیژم، ئەگەر حەزدەکەن لێرەبن، ئەگەر دەچنەوە مارێش، با تڕومبێل هەتا پێش دەرکەو بباو زۆریش ئاگاتان لەخۆبی! هەنار گۆتی: دەچینەوە ماری خۆمان باشترەو ئیشاڵلا چنابی، بابم ڕەقەم تەلەفۆنی ماری عەبدوڵلای مام سەعیدی دایێ و گۆتی: هەر چشتەکبوو ئاگادارم بکەوە، ئەگەر کوڕی ئەو سەرۆک جاشەی هاتەوە داخوازیت، ئەتوو بەس خەبەرەکی بدە مامی خۆت، باشە کیژی گەورەم! هەنار دەستی داکم و بابمی ماچکردو لەگەر خوشک و برایەکانی چۆوە ماری خۆیان، ئەمەش لەگەر ئامۆزاو دەرو دراوسێیەکان ماری خۆمان هوردە هوردە ڕێکهێخستەوەو ئەو کەلوپەلانەی کەلکی نەمابوو فڕێمان دا پێش دەرکەی، هەتا دوایێ پیکابەکی بگرین و لە دووری شاری فڕێی دەین!
سێ چار ڕۆژ تێپەڕی و چشتەکی وەها ڕووینەدا، وەکی خەرک ئەمەی بەچەکەوە دەبینی، تیژ تێدەپەڕی و دەترساو دەیزانی وەزعی گەڕەکیمە تەواو نییە، ڕۆژەکی شێرۆ لە دەوامێ هاتەوەو یەکسەر هاتە ماریمە، سەلامی کردو گۆتی: ئەو سەرۆک جاشە وەزعی باشەو لە جەڵتەکەی قورتاری بووە، وا چوویتەوە مارێ و ڕەشمارەکی لە پێش دەرکەی هەردایەو تازیەی لۆ کوڕەکەی دانایە، هەرچی مەسوولە وا لە تازییەی ویەو خەمباری خۆیان لۆ دەربڕیە، تکایە زۆرو ئاگا لەخۆبی، نەکوو لە هیکڕا بەسەرتان دادەن، بابم گۆتی: ئەمە خۆمان لە کەمین نایەو ئەوجارە دەستییان لێناپارێزین، پشتیش بەس بەخوای گەورە دەبەستین! ئەمە لەو قسانە دابووین، داکی سەفینی بەدەرکەت و گۆتی: لەڕاهی خوای فریامان کەون، تەقەیان لە سەفینی کردیەو بریندارە!

ئەمە مشەوەش بووین، بابم گۆتی: چتان لێکرد؟ گۆتی: برایەکانی فڕاندیان لۆ تەواری، ئەمن و دوو سێ ئامۆزام گۆتمان: بابڕۆین لۆ تەواری، بابم گۆتی: ئەتوو لێرەبە کوڕم، نەکوو بۆسەیان لۆ توو دانابیتەوە، ئەمن و دختۆر شێرۆ و قادر دەچین، ئیدی بابموان سواری تڕومبێلی بوون و ڕۆیشتن لۆ تەواری، ئەمەش هەموو خۆن حازرکرد، نەکوو لە هیکڕا بەسەرمان دادەن، دەوری دوو سێ سعاتی پێچوو بابموان دەنگ و سەدایان نەبوو، لۆیێ خۆم پێنەگیراو گۆتم: هەر دەچم، داکم مشەوەش بوو، گۆتی: بکە لە ڕاهی خوای مەچوو، کوڕم با چشتەکت لێنەدەن، دەترسێم ئەو سەگبابانە لۆتوو دانیشتبن، گۆتم: دایە سەفین برادەری ڕوح بە ڕوحی منە، ناکرێ ئەمن نەچم و لێی نەپێچمەوە، دەچم یەعنی دەچم! ئەمن گەیشتمە دەرکەی حەوشێ و بابم و قادر قرپەستوور هاتنەوە، سەلامیان کردو هاتنە ژۆرێ، گۆتم: ها بابە، سەفین کووە؟ گۆتی: ئەلحەمدولیللا سەلامەتە، بەس گووللەکی بە قۆری کەتیە، لێیان هاتیتە دەست و بە تفەنگان ڕاوی ناینە، گۆتم: ئەو شەڕە لەکێ بووە؟ قادر گۆتی: لە پێش دەرکەی مارێ سەفینی، نەیزانیە لۆی دانیشتینە، بە عەستەم سەری هینایتە دەرێ تەماشایەکی دەرێ بکا تەقەیان لێکردیە، ئەویش تفەنگی پێبووەو دەستڕێژی لێکردینە، ئیدی تێیان تەقاندیەو هەراتینە، وا دختۆر شێرۆی لەکنە، لەوانەیە سعاتەکیدی ئیزنی بدەن و بچتەوە مارێ، گۆتم: یاڕەببی خوایە زۆر شوکر، ئەو هەموو هەراوهۆریاو کووشتن و بڕینە بەسەبەبی من بووە، ئەمن چبزانم وەزعەکە بەو ڕۆژەی دەگا، بابم گۆتی: کوڕم وەختی هەندێ نیە، تازە ئیشەکە هاتیەو نابی تەسلیم بین، دەبی ئەو کێشە هەر کۆتایی پێبێ، دەوجە دوعای بکەن خوای گەورە لۆمەی بەخێر تەواوبکا!
حەفتەکی پێچوو، ئەمە خۆمان باش تووند کردبوو، شتەکی وا ڕووینەدا، جێی ترسبی، ماری سەرۆک جاشەکەی بێدەنگبوون، تازیەیان تەواو کردبوو، قەرەبارغی لەلای ماریان نەمابوو، ئەمنیش شەوەکی فرسەتم وەرگرت و چووم سەرەکم لەسەفینی دا، قۆری چەپەی بەسترابۆوە، باوەشمان پێکدی کردو گۆتم: زۆر شەرمەزارم، نازانم چبرێم، گۆتی: هیچ مەرێ، ئەوەی ئەمن کردم بەرامبەر بەو سەرۆک جاشەی دەبایە پێشمەرگەو بەرە بیانکردبایە، دەبایە ئەو سەرەتانانە هەمووی ببڕن، نەک بیانکەنەوە عەنتەر لەسەر ئەو میللەتەی، ئەتوو دەزانی ئەو سەرۆک جاشەی لێماندا و بەبەر نەکەت، وەختی خۆی سەددام پێنج نەوتولشوجاعەی بە سینگی وەکردیە، گۆتم: وەڵلا ئەوەم نەزانییە، گۆتی: ئێستاش بوویتە یەکەم شۆڕشگێڕ، دونێ جەریدەک چاوپێکەوتنی لەگەر کردیە، گۆتیتی: هەموو دنیا زەختمان لێبکا واز لە کەرکووکی ناینین و ئەمن بە تەنێ چار شەهیدم لە کەرکووکێ هەیە! گۆتم: ئەوجە وەیە چار شەهیدی هەیە لە کەرکووکێ؟ گۆتی: وەختی خۆی چار ئامۆزای جاشی لە کەرکووکێ بە دەستی پێشمەرگەی کوژراینە، ئێستا بە شەهیدیان دادەنێ!
سەفینم بەجێهێشت و لەگەر ئامۆزایەکانم گەڕامەوە مارێ، وەکی چوومەوە ژۆرێ، دیتم هەنار و برایەکی لەماریمەنە، یەکسەر درم لێیداو هەستمکرد شتەک هەیە، پاش بەخێراتنیان، گۆتم: خێر؟ هەنار گۆتی: ئەو تڕڕووهاتە ئەوڕۆ خەبەری ناردیە، دەرێ شەوی پێنجشەم دێین مارەت دەکەین!

گۆتمە بابم: بابە ئەتوو چدەرێی؟ گۆتی: با هەنار لە ماریمەبی و نەچیتەوە ماری خۆیان، ئەگەر بیانەوێ لە ماریمە نێزیک ببنەوە، ئەوە بەخۆیان باش دەزانن چییان بەسەر دێ، هەنار گۆتی: ئێ باشە ڕۆژەک دوو ڕۆژ دە ڕۆژ، ئاخر ئەمە هەتا کەنگی لێرە بین! بابم گۆتی: کیژم ئەمن نایێلم ئەو کێشە زۆری ببا، تەئکید بە ناهێلم ئەتوو بە دەردی هەورینی بچی، گۆتی: باشە ئەگەر ئەزیەتی خوشک و برایەکانمی داو چووە سەرەوەان و بەوان گەفی لەمەکرد؟ گۆتم: ئەمن فکرەکی دیم هەیە! بابم گۆتی: برێ! گۆتم: پێمباشە هەنار ئەو کوڕەی ببینی و لەگەری دابنیشی و قەناعەتی پێبکا وازی لێبینی! هەنار گۆتی: پارچەپارچەشم بکەن لەگەر ئەو زەلامەی دانانیشم، لۆ ئەوە بەشەرە هەتا ئەمن لەگەری دانیشم! گۆتم: ئەتوو ئەگەر بەگێی من بکەی زەرەر ناکەی، گۆتی: وەڵلاهی ئەوەی ئەتوو دەیرێی بەس تەکبیر نییە! گۆتم: دەتوو مەجالەکم بدێ با لۆت باس بکەم، ئەگەر بەدرت بوو لەگەری دانیشە، بەدرت نەبوو تەکبیرەکی دی دەکەین! بەینەکی باش بێدەنگ بوو، فرمێسک بە هەردوو چاویدا هاتە خوارێ، گۆتی: شەو و ڕۆژ دوعامان دەکرد پێشمەرگە بێنە خوارێ و لەکۆر ئەو جاشانەمان بکەنەوە، نەمزانی وەزع خراپتر دەبی و جاش بە قووەتتر دەبن، ئەمن دەمگۆ ئەوانە دێنە خوارێ و هەورین قورتاری دەبی، نەمزانی ئەوجارە بەخۆم دەکەومە ناو قۆرتەکی زۆر لەئی هەورینی قۆرتر و تاریکتر! بابم گۆتی: کیژی خۆم، دەبا بزانین ئەو تەکبیرە چییەو گێی بدەینێ، کێ دەرێ لۆتوو باش نییە و قورتارا نابی! ئان ئاخیری هەنار هاتە ڕایێ و گۆتی: دەلۆم باسبکە، بزانم کوو لەگەر ئەو جاشە دانیشم! ئەمنیش بە هوردی لۆم باسکرد و ئەویش زۆر بەجوانی گێی دایێ، وەکی تەواو بووم، گۆتی: ئەوە لەبەر خاتری بابت و لەبەر خاتری تووش بەگێت دەکەم، بەشکوو بتانم ڕازی بکەم و لەو وەزعە ناخۆشەی قورتارم ببی! ئیدی هەنار و برایەکەی هەستان و گۆتی: ئەمە دەچینەوە مارێ و تەلەفۆنی لۆ دەکەم و پێی دەرێم زەرورە بتبینم و پێکەوە دابنیشین و دوو قسان بکەین، ئاخر ناکرێ ئەمن مێرد بەتوو بکەم و هەتا ئێستا دووجار لەگەرت دانەنیشتیمە، بەشکوو ئیشاڵلا قەناعەت بکاو بێ دابنیشین، بابم گۆتی: بەتەمای خوای کیژم، ئیشاڵلا خوا لۆت سەهل دەکا و بە دری توو دەبی!
لۆ ڕۆژی پاشی هەنار تەلەفۆنی لۆ کردم، لە ڕێی تەلەفۆنەکەی ماری عەوڵای مام سەعیدی، چووم قسەم لەگەر کرد، پاش چاک و چۆنی، گۆتی: وەڵڵا ڕازی بووە لەگەرم دابنیشی، قەولە عەسرێ بێتە غاباتی پێش خەستەخانەی جمهوری، قسەی لەگەر دەکەم و ئیشاڵلا ڕازی دەبی وازم لێبینی، گۆتم: زۆر باشە دەستەکانت خۆشبی و ئیشاڵلا خوای گەورە بەدری توو دەکا! گۆتی: مەمنوونم و وەکیلی سەلامان بە، ئیدی گەڕامەوە مارێ و لۆ بابم باسکرد، بابم زۆر دوعای کردو گۆتی: خوایە هەنارۆکەش بە دەردی هەورینی نەچی و فریای بکەوی!
پاش عیشایەکی درەنگ سەفین و دووسێ چەکداری دی هاتن، سواری تڕومبێلی بووین و چووینە شاوێسی، وەکی گەیشتینە وێ، ماری باپیرم پڕی زەلام بوو، هەموو چەکیان لەخۆ بەستبوو، هەندەک لە پێش دەرکەی بوون و کۆمەرەکی دیش لەسەر بانی و حەوشێ دابەش ببوون، سەلامم لێکردن و چاک و چۆنیمان کرد، گۆتم: کا ئەو خۆڕیە لە کێندەرێیە؟ مامم محەمەد گۆتی: وا لە ژۆری چێرانمان کردیە، گۆتم: زۆرتان لێدایە؟ گۆتی: ئەرێوەڵڵا لە خینێیان وەردایە، گۆتم: بابچم بیبینم بزانم وەزعی کووە! چوومە ژۆرەکەی و دیتم هەردوو دەستی بەسترایتەوەوە و هەندیان لێدایە دەموچاوی هەمووی بوویتە گلۆپ، چوومە پێش و لە پێشی دانیشتم، هەتا زللە گرتم لە بناگێمدا، گۆتم: هەی کەری کەرباب، وەتێدەگەی ئەوەی لۆ بابە جاش و خائینەکەت چووە سەری لۆ تووش دەچتە سەری، ئەوە خەونە هەنار بێتە باوەشی توو! گۆتی: هەر بەردەبم، وەڵلا دەبی دار و بەردتان بسووتێنم، کوو هەورینمان لەتوو ستاند ئەوها هەناریشتان لێدەستینین!گۆپارەکی گەورە لەوێبوو، دەستم دا گۆپاری کەتمە سەری و لێدە بە گۆپاران، زیڕەی دەگەیشتە پەڕەکەی عاسمانێ، ئەوجە زانیم ئەو عەنتەرە زاڵم و ستەمکارانەی خەرک زەندەقییان لێچووە، ئەگەر بگیرێن، چ ترسنۆکەکن، جەلیلی ئامۆزام دەستی گرتم و گۆتی: بەسە با نەمری، ماخران جێی ساغت لە لەشی نەهێشت، گۆتم: لێمگەڕێ با کوری دری خۆمی پێدامرکێنم، بە بابی نەوێرام، بەران خۆ بەو سەگبابەی دەوێرم!
ئێستا دەپرسن؛ ئەرێ ئەوە چ ڕوویدایە؟ با لۆتان باسبکەم، پلانەکەمان وابوو، هەرکووی هەیە، هەنار قەناعەت بەو کوڕی سەرۆک جاشەی بکا بێ لەجێیەکی چۆل لەگەری دابنیشی و دەبی بەتەنێش بێ، کوڕە یەکەمجار ڕازی نەببوو، بەران هەنار هەندەک قسەی خۆشی لۆ کردبوو و کەری کردبوو، ئەویش وەکوو پلانەکەمان دانابوو، عەسرێ هاتە ناو غاباتی پێش خەستەخانەی جمهوری، پێشی ئەوبێ ئەمن و هەشت نۆ زەلام چووین خۆمان لەوێ ماتکرد، هەرهات و دانیشت، بە چەکەوە چووینە سەر سەری و لوولماندا و بردمانە شاوێسی و لەماری باپیرم فڕێماندا!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!