قوماش 140
نووسینی: #ئوسامە جەمیل#

حەفتەک بەسەر دەرچوونم لە گیرانێ تێپەڕی، خزم و کەس و دەرو دراوسێ دەستە دەستە سەردانیان دەکردم و درخۆشی خۆیان دەردەبڕی بە قورتاربوونم، لەگەر هەموو ئەوانە فکرو خەیارم هەر لای هەورینی بوو، نەمدەزانی چی بەسەرهاتیەو چدەکا، دوو سێ جار ویستم لە داک و بابم بپرسم، درم نەدەهات، دەترسام برێن هەرچی نەگبەتیە کە بەسەرمان هاتیە لەنیوچەوانی هەورینی قادرە فەندی بوو، ئەتووش هێشتا باسی دەکەیی و لێی دەپێچیەوە، لەو سەرو بەندەش بابم تەلەفۆنەکی کڕی و لە ماوەی حەفتەکی لۆیان بەستین، ئەو تەلەفۆنە لۆ ماریمە شتەکی زۆر باشبوو، چونکە پێشتر لێڕاهاتبووین و بابم لەساری هەشتا تەلەفۆنەکی ڕاکێشابوو، بەران لە ناوەڕاستی هەشتاکان نەمانما، هەر لەگەر بەستنی تەلەفۆنەکم لۆ ماری سەفینی کردو لەگەر داک و بابی قسەم کرد، پێمگۆتن: توخوا ئەگەر سەفین تەلەفۆنی کرد ئەو ڕەقەمەی منی بدەنێ، ڕەقەمی ویشم بدەنێ با هێوارەکی بچم لە نووسینگەکی تەلەفۆنەکی لۆ بکەم، چونکە بە تەلەفۆنی ماران نەدەکرا لەگەر خاریج قسەی بکەی!
کێشەو دۆخەو شەڕی بەینی ئەو دوو حیزبەی ڕۆژ لە پاش ڕۆژ خراپتر دەبوو، سەربانەکانیان لێکدی گرتبوو، دائیرەکانیان لە بەینی خۆیان دابەشکردبوو، سەر هەر بینایەکی کۆمەرە چەکدارەکی لێبوو، شەوی وا هەبوو هەتا سبەینێ دەنگی تەقەی دەهات و ئارپێچییان پێکدی وەدەنا، لەگەر ئەو وەزعەش دائیرەکان هەر هەبوون و خەرک دەوامی دەکرد، مووچەش دەدراو نەدەدرا، خەرک لە ڕاوو ڕووتی زۆر دەترسا زۆرکەس هەر چار تایەی تڕومبێلی خۆی لێکردبۆوەو بلۆکی لەبن دانابوو، چونکە ترسی ئەوەی هەبوو چەکدار بەژۆرێ کەون و تڕومبێلەکەی ببەن!
بەیانیەکی دەوری سعات نۆی بوو، دختۆر شێرۆ هاتە مارێمەو سەلامی کردو بە چاوی ئیشارەتەکی دامن و گۆتی: هەتا کن برادەرەکی دەچم و عەزم لێیە لەگەرم بێی، داکم گۆتی: شێرۆ واز لەو کوڕەی بینە، با تووشی چشتەکی نەبی، وەڵلاهی ئەوە بچیتە سەر زێی بادینان، دەبی مەسینە ئاوەکی لەگەر خۆی ببا! دختۆر شێرۆ گۆتی: دایە عاجی واز بینە، دختۆر شێرۆ بەخۆی ئیشی خۆی باش دەزانی و دەزانی چدەکاو چناکا، داکم گۆتی: تەڕ شێرۆ قون کەتی دەزانی چدەکاو چناکا، دەوەڵلاهی شێرۆ ئەتوو لە سرقیش نازانی، شێرۆ ئەعسابی نەما، گۆتیە داکم: باشە ئەتوو لۆ ڕۆژەکی ناچە دائیرەی نفوسی؟ داکم گۆتی: لۆ بچم؟ گۆتی: بڕۆ لە نفوسی من لە جێی ئەللەقەبی پێیان برێ بنووسن قوون کەتی، وەبی بە جارەکی درت دابکەوی! داکم پێکەنی و گۆتی: ئەمن تێناگەم ئەتوو لۆ ئەوها زوو کەر دەبی کەر! دختۆر شێرۆ بە هەر چار پەلان هەردەپەڕی! بابم لە ژۆرەکەی خۆی قورئانی دەخیند، هاتە دەرێ و پێدەکەنی، گۆتیە من: هەستە کوڕم هەستە، لەگەر دختۆر شێرۆی بڕۆ، هەتا داکت و دختۆر شێرۆ گەڕەکیان نەهیناینە دیارێ! ئەمنیش هەستام و جلکم گۆڕی و گۆتم: یاڵلا دختۆر بابڕۆین، دختۆر شێرۆ پێشکەت و لەکن دەرکەی گۆتیە داکم: هەتا دێینەوە پراو ساوارەکی خۆشمان لۆ لێنێ، داکم پێکەنی و گۆتی: بە چاوان، دختۆری خۆمان، هەها دختۆر گێبدەمن، بەو قورعانەی لە سینگی بابی ئەو نازدارەی دایە، فەرقت پێناکەم لەگەر ئەو کوڕەی، شێرۆ زۆر کەیفی بەو قسەی هات و گۆتیە داکم: وەڵلا ئەتوو زێڕی!
چووینە دەرێ و سواری تڕومبێلی بووین، شێرۆ پێی لێنا، گۆتم: کێوە دەچی؟ گۆتی: ئەگەر دەزانی کێوەت دەبم، وەڵلا بە گاگۆرەش بی دەچی! گۆتم: کێوەمدەبەی؟ پێکەنی و گۆتی: هەونکە دەزانی هەی پرتەقار!

کە شێرۆ ئەو قسەی کرد، ڕنگەم لە دری وەهات، زانیم ئەو چوونە دەرێیە پەیوەندی بە هەورینی وەیە، لۆیێ لێمپرسی: دەمبەیە کن هەورینی؟ دختۆر شێرۆ گۆتی: بەرێ، وا چاوەڕێت دەکا، گۆتی: بڕۆ هەر کووی هەیە پرتەقارم لۆ بینە، ئیشەکی زەرورم پێیتی! گۆتم: لە کێیە؟ گۆتی: هاتتە خەستەخانەی، گۆتم: لۆ نەخۆشە؟ گۆتی: نەخێر، بەران لۆیێ هاتیە ئەتوو ببینی، بەینی خۆمانبی مشەوەشیش دیارە، گۆتم: کەسی لەگەرە؟ گۆتی: نا، بەتەنێ هاتیە، بەران تەکئیدم مێردی موراقەبەی دەکا، لۆیێ کە بەتڕومبێلی چووینە ژۆرێ دەموچاوت نویکە، نەکوو جاشەک لەکن دەرکەی بی و چاو بگێڕی، گۆتم: دختۆر کووە هەر دەرێی جاش، جاش نەما، ئێستا هەمووی شۆڕشگێڕو خەباتگێڕە! گۆتی: لەکنەمن جاش هەر جاشە و هەر بەجاشیش دەمینێتەوە!
گەیشتینە دەرکەی خەستەخانەیی و سەرم نویکرد هەتا چووینە ژۆرێ، شێرۆ سوڕاوە پشتەوەو تڕومبێلەکەی لەبن دارەکی ڕاگرت، گۆتی: بابێینە خوارێ و بەو دەرکە گچکێهێ دەچینە ژۆرێ، کەس شک ناکاو پەناشە، لە تڕومبێلی هاتینە خوارێ و لەدوو دختۆر شێرۆی چوومە ژۆرێ، بە ۆرانەکی تەسک داچووین و شێرۆ گۆتیەمن: لێرە ڕاوەستە، شێرۆ ڕۆیی، بڕەک پێچوو هاتەوە، ئیشارەتی دامێ و گۆتی: وەرە! کەتمە دوو دختۆر شێرۆیی و گەیشتینە دەرکەی ژۆرەکی، گۆتی: بڕۆ ژۆرێ هەورین چاوەڕێت دەکا، یەکسەر چوومە ژۆرێ، دیتم هەورین لەسەر کورسیەکی دانیشتبوو، دوو سار زیاتر نەمدیتبوو، بە تەواوی کزو مەلول بوو، خەمەکی زۆر گەورە لە چاوانی دەخیندراوە، نە هێزی جارانی مابوو، نە گەشی جاران! چاوی بەمن کەت قیت بۆوە، تەماشای کردم و گۆتی: هاتی! گۆتم: کوی؟ گۆتی: دەبی کووبم، خەم پیری کردم و هەناوی خواردم، خۆزگە بەو مردییەی دەخوازیم کە لەبن خۆرێیە! گۆتم: ژیانی تووشم وێرانکرد، هەمووی خەتای منە، ئەگەر ئەتووم نەناسیبا تووشی ئەو دەردەی نەدەبووی، گۆتی: عەشق ناسین و نەناسینی نازانی، کە ئاگری عەشق هات دارو بەردی دەسووتێنی، ئەتوو پێمبرێ کوی؟ گۆتی: دوو سار زیاترە لە لێدانێ و تێهەردانێ بووم، دەبی کووبم، هیچ جێیەک لە لەشم نەمایە برینەکی پێوەنەبی، بەران هەر هەمووی ناکاتە نیوەی برینی توو، کە لەناو درمە! گۆتی: هاتیمە دوو قسەت پێبرێم، هەتا زووە خۆت قورتارکە، زانیتیان لە حەپسخانەی قورتار بووی، شەوێ گێم لێبوو لەگەر کوڕەکانی خووتتەیان دادەنا کوو بتکوژن، هەتا زووە خۆ بگەینە لایەکی، بەگێی من کە، وەکی سەفین و هەناری خۆت قورتارکە، گۆتم: کوو دەبی بێی توو بڕۆم! گۆتی: ئەتوو هەقت لەمن نەبی، ئەمن بەخۆم دەزانم چدەکەم، گۆتم: لەو ەڕو هەرایەی ئەو سەگبابە کوو بەبەر نەکەت، گۆتی: بەبەر ناکەوی و کێ بێتە سەر کورسیش لەگەر ویە، ئەو خۆی لەگەر هەموو وەزعەکی ڕێکدێخی! گۆتم: بابزانم کوو دەبی، ئیشاڵلا وەناکەم دەستی بگاتە من، گۆتی: ئەمن دەبی بڕۆم، ئێستا کۆمەرە چەکدارەکی دەنێری، بزانی چم بەسەرهات، لۆ هەر نەگەڕامەوە، دیسان پێت دەرێم خۆت قورتارکە، ئیدی هەورین خواحافیزی کردو ڕۆیی، دوو سێ شاقاوی هاویشت و هاتەوە، دەستی ڕاستی لەسەر درم داناو گۆتی: قوربانی ئەو درەت دەبم، توخوا وەمەکە مەرگت ببینم، لەگەر ئەو قسەی فرمێسک بە هەردوو چاوی داهاتە خوارێ و ڕۆیی!
لە ژۆرەکەی دانیشتمەوەو بە هەردوو چاوان فرمێسکم ڕێشت، فرمێسک لۆ ئەو دەرە باشەو ئەو دوو چاوە پڕ فرمێسکانەی هەورینی، ئەو هەورینەی لەو ڕۆژەی ئەمنی ناسیە خۆشی لەخۆی نەدیتیە!
وەختەکی دختۆر شێرۆ هاتەوە، گۆتی: هەستە بابڕۆین، چووینە دەرێ و بەناو داروبارەکانی ناو خەستەخانەی ڕۆیشتین، شێرۆ گۆتی: بەو ڕێیەی دابڕۆ، دەرکەک لەوسەری هەیە، بەوێدا بڕۆ دەرێ و لەبن دیواری ڕاوەستە، بەوێ دادێم و هەرتدەگرم، وەزعەکە ئیوەی نییە بە دەرکەی گەورەی خەستەخانەی بتبەمە دەرێ، ئەمن ڕۆیشتم و چووم لەبن دیواری ڕاوەستام، وەختەکی دختۆر شێرۆ بەتڕومبێلەوە هات، ڕایگرت و سواری تڕومبێلی بووم، گۆتی: ئەوجە با بچینە ماری بازۆی! گۆتم: خێر؟ گۆتی: با بچینەوێ دەزانی!

گەیشتینە پێش دەرکەی ماری بازۆیی و دابەزین، لە دەرکەمان دا، گەلاوێژ خانی داکی بازۆی هات کردیەوە، وەکی چاوی بەمن کەت، دەستی بە گریانێ کردو دەستی لە ملی کردم دوو سێ ماچی لێکردم، گۆتی: وەی لۆت کۆرەبم ڕەبی، کوو ئەتوو خۆشیت لەخۆ نەدی لەو دنیایەی، خوایە زۆر مەمنون، کوڕی خۆم ئەوجارەش نەمردم و چاوم بە توو و بە بازۆی کەتەوە! گۆتم: چاوت بە بازۆی کەتەوە؟ گۆتی: ئا ئا، ئەوە لە ژۆرێ دانیشتیە، چاوت ڕۆن، دە فەرموو فەرموو! بە غاردان چوومە ژۆرێ، بازۆش لەوسەریڕا بە غاردان هات، باوەشمان پێککردو هەردووکمان لە هۆڕژنی گریانێماندا، قەت لەو باوەڕەی دا نەبووم جارەکیدی بازۆی ببینمەوە، دەمگۆ تازە ڕۆیی و نایێتەوە، بەران خوا ئەمن و ماری بازۆی خۆشویست و ئەوجارەش هینایەوە، چووینە ژۆرێ و دانیشتین، بازۆ زۆر بێتاقەت بوو لۆمن، گۆتی: کە گێم لێبوو لەسەر قسەی ئەو جاشەی ئەتوویان لە ژۆرێ کردیە، ئاگرم لە هەناوی بەربوو، گۆتم: گێمەدێ، ئەوە بەرهەمی ماندیبوونی تووبوو ئەمن دەیخۆم، ئەتوو چوویە ئەو چیاوو چۆلەیی و دەربەدەریت دیت، ئێستا سەرۆک جاشەک بەرهەمەکەی دەخوا، بازۆ ئاخەکی هەرکێشا، گۆتی: ئەگەر دەمزانی ئەوهای لێدێ، کوو ئەو هەموو چیاوچۆلەم دەکووتاوە، بەدەرکەت کوردایەتی درۆیەک بوو لەگەر ئەو میللەتەیان دەکرد، چانییە ئەمە زندینە، سووم لەو شەهیدانەیە کە بەلاش و حەلاش ڕۆیشتن، گۆتم: وەڵلا ئێستا مووچەی ئەو جاشانەی پێشمەرگەکانیان کووشتیە، لە شەهیدانەی پێشمەرگەکان زیاترە، گۆتی: دەزانم، دەزانم، ئەوانە نە کوردایەتییان هێشت و نە خۆشەویستی نیشتمان، گۆتم: دەتوو بەمن برێ کووە هاتیەوە؟ گۆتی: معامەلاتی خۆخی دەزگیرانم تەواو کردیە، هاتیمەوە لەگەرەخۆمی ببەمە ئەوڕوپای، گۆتم: ناترسێی بتگرن؟ گۆتی: نا، لەگەر ڕێکخراوەکەی هاتیمەوە فیل هەیە خۆم تێبگەینی، بەس با شتەکت پێبرێم، باشە ئەتوو لۆ نایێیە ئەوڕوپای، وەعدبی معامەلەت لۆ بکەم و دەعوەتنامەت لۆ بنێرم، کورە هەتا زووە خۆت قورتارکەو لەو وراتەی مەمینێ! گۆتم: ئەدی چ لە هەورینی بکەم، هەتا هەورین مابی ئەمن ئەو وراتەی بە جێنایێلم، ناکرێ بەخۆم لە خۆشی دابم و هەورینیش لەو عەزابەی دابی، گۆتی: ئێ دە بیڕفێنەو لەگەر خۆتی بینە، گۆتم: ئەوەش ناکرێ، ئەمن شتی وابکەم ، ئەو سەرۆک جاشە ئێکەکی زندی لەماریمە نایێلی، کێشەکەی من ئەوەیە، گۆتی: دوعای بکە ئەو سەگبابە لەو شەڕی ناوخۆیەی بکوژرێ و سەگتۆپ بکرێ، گۆتم: ئامین، گۆتی: شەوێ دێم سەرەکی لە داکت و بابت دەدەم، حەز دەکەم بیانبینم، گۆتم: چاوەڕێت دەکەم، وا بە دختۆر شێرۆش خەبەر لۆ خزمەکانم دەنێرم بێن ئاگایان لێمانبی، چونکە ئەو سەگبابە وازی نەهینایەو دەیەوێ بمکوژی، تەئکیدم ئەو هەراو هۆریاو فەوزایەی بە فرسەت دەزانی زەڕبەکم لێبدا، گۆتی: دەبی ڕۆژەکی ئەمن و ئەتوو بەتەنێ دانشین و چارەکی ئەو وەزعەی بکەین، گۆتم: زۆر باشە، ئیشاڵلا دەگەینە شتەکی!
لەماری بازۆی هاتینە دەرێ و شۆڕ بووینەوە لۆلای مارێ، شێرۆ گۆتی: وەڵلاهی بەگێی من دەکەی دەڕۆی، کاکە لێرە مەمینێ، وەزعەکە ئیوەی نییە، ئەتوو لۆ دەتەوێ جەرگی داک و بابت بسووتێنی! ئەو قسەی شێرۆی زۆر تەئسیری لێکردم، زۆر ڕاستە، ئەمن ئەگەر شتەکم لێبێ، داکم و بابم وەزگ دەدەن، لۆیێ دەبی چارەسەرەکی ئەو وەزعەی ببینمەوە! بە خەیارم داهات سەرەکی لە تەربیەی بدەم، بزانم ناوم دەرنەچووە لۆ مامەستایی، ئەمن لەمێژبوو ناوم نووسیبوو، گۆتمە دختۆر شێرۆی: بادەوە لۆ تەربیەی! گۆتی: خێر؟ گۆتم: بزانم ناوم دەرنەچووە، شێرۆ گۆتی: بەچاوان، گێڕی بەڕازیلی گۆڕی و پێیلێنا لۆ تەربیەی!
گەیشتینە تەربیەیی و هاتینە خوارێ، چووینە ژۆرێ و لە پرسگەمان پرسی، گۆتی: بڕۆنە ژۆری ژمارە یازدەی، ئەوان دەزانن، چووینەوێ، وەکی تەماشام کرد برادەرەکی قەدیمی بابم لەوێیە، چاک و چۆنیم لەگەر کردو گۆتم: لۆ شتەکی ئەوها هاتیمە، گۆتی: ماخران ئەوە ئەتوو لەکێی، سارو نیوەکە ناوت هاتتەوە، زۆر پێویستیان بە مامەستایە، ئەگەرنا لە مێژبوو ئەمرەکەت ئیلغا کرابۆوە!

گۆتم: ئەوی ڕاستیبی لەبەر کێشەکی نەمتانی لێبپێچمەوە، نەمگۆ گیرابووم، ترسام تووشی کێشەو دۆخەم بکەن و فەرمانی دامەزراندنەکەم ڕابگرن، ئەوەی باشبوو ئەو برادەرەی بابیشم نەیزانیبوو ئەمن گیرایمە و زۆر لە شتەکەشی نەپێچاوە، یەکسەر وەرەقەکی دەریناو ئەمری دامەزراندنەکەی نووسی و گۆتی: لێرەبە بەخۆم دەیبەمە کن بەڕێوەبەری گشتی و ئەتوو مێ، دەمەوێ زوو لۆت تەواوکەم، ئەمن و دختۆر شێرۆ لەوێ دانیشتین، هەندەی نەبرد هاتەوەو گۆتی: لەسەری ڕازیبوو، دەوجە زوو بڕۆ لە خەستەخانەی ئەو فەحسانەی دامەزراندنی بکەو بینەوە، بەشکوو زوو فەرمانەکەی دەرکەین و بتنێرینە گوندەکی! گۆتم: لۆ دامەزراندن فەحسیشی دەوێ؟ گۆتی: ئەدی کوو، ئەوە قانوونە و هەرکەس یەکەمجار دامەزرێ، دەبی کۆمەرە فەحسەکی بکا، گۆتم: دەشمنێرنە گوندەکی؟ گۆتی: بەرێ، ئەوە بە عارەبی قوڕەو ئەریافی پێدەرێن، دەبی سێ ساران لە دەرێبی، ئەوجە دەتهینینەوە شاری، بەس خەمت نەبی ئەمن وەدەکەم لە گوندەکی باشت دابنێن، دوایێ ئەتوو جاحێری، خەمی چت هەیە لە گوندی، لەوێ هەم دەبیە مدیری مەکتەبێ، ئەگەر ژنیشت هینایە، وەلەو ئارقەت لە پەنجەی نییە، ئەوە خانیەکیشت دەدەنێ، گۆتم: وەڵڵا جارێ ژنم نەهینایە، گۆتی: زۆر باشە، مادام زوگرتی مەلیکی! لە دری خۆم گۆتم: ئەوە نازانی ئەمن شەش حەفت سارە عەزابی دنیام خواردیە، هەتا لە زوگرتییاتی قورتاربم، ئەویش بەمن دەرێ: مادام زوگرتی مەلیکی!
وەرەقەی خەستەخانەم وەرگرت و خواحافیزیم لێکرد، لەگەر دختۆر شێرۆی بەڕێکەتین لۆ خەستەخانەی سێتاقان، فەحسەکە لەوێ دەکرا، دختۆر شێرۆ گۆتی: خەمت نەبی جەماعەت هەمووی برادەری خۆمن و وەدەکەم زوو ئیشەکەمان تەواوبی، چووینە ژۆری و سەلاممان کرد، وەرەقەکەمان دانێ، ئەمەیان بردە کن دختۆرەکی، گۆتی: هیچ نەخۆشیەکت هەیە؟ گۆتم: نەخێر ناوەڵلا، گۆتی: ئەدی لۆ ئەوها زەعیفی، ماخران بە چەقووش کیلۆ گۆشتەکت لێنابتەوە، نەکرا برێم سەرۆک جاشەک لەوەتی ئەمن هەمە عەزابم دەداو سجنی سەدام و کوردەبۆرەی لەسەمن تاقیکردتەوە، لۆیی گۆتم: ئەمە هەر بە بەرەباب زەعیف و چورچەینە، دختۆرەکە پێکەنی و گۆتی: دەی خێری تێدایە، لەسەری نووسی و ئیمزای کردو گۆتی بڕۆ ئەشیعەکی سینگیشت بگرە، چووینە ژۆری ئەشیعەیی و سەلاممانکرد، کابرا گۆتی: وەڵلا مەوادی ئەشیعەمان نەمایە، دەبی سبەینێ بێیەوە، بەس با پێت برێم ڕەسمەکیش لەگەخۆت بینە، بێ ڕەسم نابی، گۆتم: وەی بەسەر چاو، خواحافیزیمان کردو هاتینە دەرێ، سواری تڕومبێلی بووین و دختۆر شێرۆ گۆتی: وابزانم نیوڕانێ میوانیشتان هەیە! گۆتم: کوو دەزانی؟ گۆتی: داکت سبەینێ زوو هاتبوو، ئاوونی لەمارێمە بردبوو، گۆتبوویە ئەو سەیەی ئەوڕۆ مێوانمان دێ، گۆتم: کیهان سە؟ گۆتی: داکی منداران! گۆتم: ئەوە کوو درت دێ پێبرێی سە؟ گۆتی: ئەمە سوعبەتمان هەیە لەگەر ئێکدی، دوایێ با چشتەکیدیت پێبرێم؛ وەڵلاهی ئەمن وەکی تووم پێناکرێ، وەها لێبدرێم، ماخران ئەوە کوو بە دختۆر شێرۆی دەکرێ وەکی منداران لۆ کیژەکی بگریێ، شێت بوویمە، ئاقرم لەدەست دایە، گێلم! گۆتم: یەعنی ئەمن گێلم؟ گۆتی: عەلاکووللین، کووی لێکدەدەیەوە لێکیدەوە! گۆتم: باشە مێوانەکەی ماریمە کێیە؟ گۆتی: بەگێرەی قسەی داکتبی، خەجەو داک و بابینە!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!