عومەر سەیدی نووسەر، پێنجەمین بەرهەمی خۆی لە دوو توێی کتێبێکدا بەناوی (شەوانی فرانکشتاین) بڵاو کردەوە، کە ئاوڕدانەوەیەکە لە مێژووی سەد ساڵەی کورد لە چوارچێوەی دەوڵەتی عێراق.
لەوبارەیەوە، عومەر سەید، نووسەری کتێبەکە بە (باسنیوز)ی ڕاگەیاند: کتێبەکە لەلایەن چاپخانەی نوسیارە چاپ کراوە، کە 150 لاپەڕەیە و سێ نۆڤلێت لەخۆ دەگرێت، کە بریتین لە (شەوانی فرانکشتاین و هەڵوەدای بیابان و گوڵەکانی پیرەمەگرون)“.
لەبارەی ناوەڕۆکی کتێبەکە، نووسەر گوتی: بە گشتی یەکەی بابەت و شوێن و پڵۆت، هەر سێ نۆڤلێتەکە پێکەوە دەبەستێت. زۆربەی پاڵەوانەکان قوربانیین و وەک ڕۆح و تارمایی و خەیاڵ دەردەکەون. ئاوێتەکردنی واقیعی مێژوویی و خەیاڵ و فەنتازیایە لەو ڕووبەر و سەرزەمینەی پێی دەگوترێت کوردستان.
ڕوونیشی کردەوە: ناوەڕۆکی کتێبەکە بەرجەستەکردنی نیشتمانە لەناو زمان و ئازاردا، وێناکردنی ململانێی مرۆڤی کورد و ئەویتری کوردە، گەڕان و عەوداڵبوون بە شوێن خود و شوناسدا، پرسی سەرەکیی نێو دەقەکانن، ئاوڕدانەوەیە لە مێژووی سەد ساڵەی ئێمە و ئەویتر لە چوارچێوەی ئەو دەوڵەتەی پێی دەگوترێت عێراق، مێژووی پڕ جەنگ و ململانێ و شکست، هاواری ئەو قوربانییانەیە تا ئێستا.
عومەر سەید، ساڵی 1970 لە شاری کەرکووک لەدایک بووە، جگە لە کاری ڕۆژنامەنووسی و شانۆ، تا ئێستا چوار کتێبی چیرۆک و ڕۆمانی چاپ و بڵاو بوونەتەوە، لەوانە: (بازنە ڕاخراوەکانی بابل، سەرزەمینی زیکزیکە، ئەسپەرە، ئاشووبی سین و کۆڕی شین).[1]