مېژوو بەرزنجەی
دوۍ برێ ئیماندارۍ، خوڎاتەرسۍ، خاوەن زانستە شەرعیەکا دمای تەمامنای مەراسیموو تەوافکەردەی یانەو خوڎای(حەج)ی مەگېڵاوە. ئاڎۍ جە شاروو هەمەدانیۆ بە نیەت و حەجی ڕای دەشت و ساراشا گېرتەبۍ وەر، بەڵام جە گېڵایۆشانە بە وەڵاتو کودەواریرە، نیمەو ڕێشانە یاوا مەنزڵێ کە پەی مەنەیۆو ئیسراحەتیشا گونجیان، پەوکەی لاشادان و چەنەش مەنېنێ. دووە برا ئیماندارەکە(شېخ عیسا و شېخ مووسا) جە سەیېڎەکا هەمەدانی بېنۍ.
شېخ عیساو شېخ موسا زاروڵۍ بابا عەلی کوڕو یوسف هەمەدانی کوڕو سوڵتان مەنسوری کوڕو سوڵتان عبدالعزیزی کوڕو سوڵتان ئیسماعیلی کوڕو ئیمام موسای کازمینۍ .
جە هەمەدانۆ ڕاو حجازی گېرانەوەر و دمای تەمامنای مەراسیمو حەجی مەگېڵاوە، ڕاو گېڵایۆشانە بە سەرزەمینو کوردەواریرە گوزەر کەران و یاوا مەنزڵێ نیمچە ئاوەڎانە، ئانەیچە ڕېککەوتو ( 1287ز )کۊچی بیەن، شېخ موسا کە برا گۆرە بیەن شەوۍ وەرمەنە یاوۊ بە خزمەتو پېخامئاوەرو ئیسلامی(ص) و فەرمانش پەنە کەرۊن کە چا یاگېنە مەناوەو نەگېڵاوە پەی هەمەدانی، هەر وەرمەکەنە یاگە مزگیێش پەی دیاری کەرۊن و هانەو ئاوێ کۊرۆبیەیۆش چەنەبۊ، پای مبارەکش ۋزۊنەو مەژیۊوەو ئاویش مێنە، یۊ جە هۊنیارەکا بە نامۍ (شېخ مارف ڕیشەڵانی) بە هۊنیێوە ئا مېژووەیە باس کەرۊن پەیمان:
شەو کەردەن غرووب خۊرشیدو قەمەر
یاوان وە حزوور زاتی پېخامبەر
وە لەفزی شیرین ئەمرش فەرماوا
بکەردۍ ئینە وە زېدو ماوا
بکەردۍ بینای مزگی و جەماعەت
پاسەش ئەمر کەرد ساحېب شەفاعەت
خەت کېشا یاگە مزگی وە عەسا
سەیید بۊسە کەرد پېشانی عیسا
چوون هەردوێ برێ حەزرەت ( شیخین)
کەرد بەی تەورە ئەمر شاه حەرەمەین
تەشریفش ئاوەرد قەدەم کەرد ڕەنجە
کەردشان پەی دین چن یانە (زنجە )
یەک ڕوێ نەبی ئەو هەردوۍ حاڵزان
گېران ڕاحەتێ تا مەغریب بە ئان
دیارا ( خۊرشید و قەمەر )مەخسەڎش شېخ عیساو شېخ موسانۍ.
هەر چا یاگېنە چن یانێ گۊلانېشا بە نەیجە (زەل )یام حەسیر وەش کەردېنۍ پەنەشا واتېنۍ (زنج) کە دماتەر مزگیەکە وەردەمو زنجەکانە وەشکریانو نامۍ (بەر+زنجە) ی هەر چانەیۆ ئامێنە. شېخ موسا یا سەید موسا هەر چاگە ژەنیش ئاردېنەو خەریکو خوڎا پەرسای بیەن، جە نزیکو دەگاکېنە یاگێوەش بیېنە پەی تاعەتیش کە دماتەر پیاکۍ مسەفا نەسیری زەفەرش پەنە بەراو هەرچاگە کۊشاش.
سەید عیسای براش کە تەنیا بیەن دمای ماوێ (فاتمە خانۍ) براژەنېش مارە کەرۊوەو چن زاروڵێش چەنە بانە، کە نامدارتەرینشان (سەید ئیسحاق) کە مەشهورا بە سوڵتان سەهاک کە دماتەر دەگاو(شېخانی) جە وەرزیاو دەگاو(نەوسۊڎېۍ) کەرۊ مەنزڵگاو خەریکو دینداری بۊنەو هەرچاگە فەوت کەرۊ و بە خاکیش مەسپارا.
شېخ عیسا چن هۊنیێش هەنۍ کە بە زوانی هۆرامی واتېنېش پەی نمونەی:
واچن سەرو ماڵ بدەین بەرانە
چوون دەسماڵ تەحقیق یەگانە
پېمە شۊکرانە پېمە شۊکرانە
ویساڵگا لوایم جە ویساڵ یانە
یان ماچۊ :
حاجم چەرانە حاجم چەرانە
حاجیان حاجم حاجم چەرانە
حاجمی کەردەن پایەی خۊدانە
هەرکەس وېش مەجمۊ گا وېش خەتانە
بەرزنجە ناوچەو مەحاڵێن جە پانیشت و کوردستانی کە ڕوبەرێ کەم، بەڵام نامێ زلەو کاریگەریێ فرەش سەرو کۊمەڵ و کۊردەوارییۆ بیەن و هەن، کاریگەریێ دینداری، زانستی، کۊمەڵایەتی، وەرو ئانەی بەرزنجە جە ئەوەڵۆ مەنزڵگێوە دینداری و خوا ئەشناسی و مەدرەسەو فېرکەردەی بیېەن.
(یەک) واچێوە هۆرامیەنە
یەک ... یەکتا ... یەکانە
من قەسەم وە زات ئەو کەس یەکانەن
داییم نامی تۊم ویردی زووانەن
میرزا وەلی دېوانە.[1]