د.یاسر حەسەن
ژبلی ڤێ ئێکێ، خۆبازدانەکا دوور ژ ئەتیکێتێن ئەکادیمی ب بەرچاڤ دکەڤیت، دەمێ بەحسی وان کارێن ل دۆر مەم و زینێ بەلاڤ بووین دکەت، و سێ کارێن هەرە بنگەهین یێن هەرسێ نڤیسەرێن رۆژهەلات، رۆژئاڤا، و باشۆرێ کوردستانێ ژ بیرا خۆ دبەت، ئه و ژی یێن پەرویزێ جیهانی (1988، 2007)، جان دۆست (1995، 2006)، و تەحسین ئیبراهیم دۆسکی (2005، 2008). ل ڤێرێ ژی ب تایبەت گرنگ بوو ئاماژە دابا هێژا تەحسین ئیبراهیم دۆسکی، کو وی ژبلی چاپا 2005ێ یا مەم و زینێ، چاپەکا دی یا جودا ل 2008ێ بەلاڤ کریە، کو هەتا نۆکە رەنگە ئه و چاپ ب باوەرترین چاپ بهێتە هژمارتن. ئەڤە ژی چونکی ل سەر بنیاتێ کەڤنترین و نێزیکترین دەستنڤیسە بۆ خانی، هەم ژ لایێ سەردەمی ڤە (46 سالان پشتی مرنا خانی)، هەم ژی ژ لایێ جهی ڤە (کو خودانێ دەستنڤیسێ هەر یێ باژێرێ خانییە). ناڤەکێ مەزنێ وەکی مامۆستا تەحسین دۆسکی، نەدبوو بهێتە پەردەپۆشکرن، کو هەکەر فەریادی زانی بیت و وە کربیت بیت کارەساتە، و هەکەر نەزانی بیت، کارەسات مەزنترە!
ژ رەخەکێ دیڤە، دەمێ بەحسی وەرگێرانێن ئینگلیزی یێن مەم و زینێ دکەت، یێن کو بەری وی هاتینە چاپ و بەلاڤکرن، ئه و وەسا ددانیت کو مامۆستا سەلاح سەعدوللای پشتی د. عەزیزی گەردی ب سێ سالان ژ نوو مەم و زین کریە ئینگلیزی، لێ یا راست سەلاح سەعدوللا یەکەمین کەس بوو مەم و زین ب تمامی کریە ئینگلیزی، و ل هەردو وەشانخانەیێن سپیرێز و ئاڤێستایێ ل سالا 2008 بەلاڤ بووینە. پشتی هینگێ، د. عەزیز گەردی (2009) وەرگێرانا خۆ یا ئینگلیزی بۆ مەم و زینێ بەلاڤ کریە . ئەڤجا چ ئەڤ خەلەتیە ب مەرەم بیت یان بێ مەرەم، د جیهانا ئەکادیمی دا ب شاشیەکا مەزن دهێتە هژمارتن، چونکی ژبلی مەسەلەیا ئەمانەتا زانستی، مەسەلەیا کورونولۆجی یا بەلاڤبوونا بەرهەمێن ئەدەبی گرنگی و دەلالەتا خۆ یا تایبەت هەیە، نەخاسمە د وارێ سوسیولۆجیا ئەدەبی دا.
گومانا خواندەڤانێ بیانی:
جهێ دەستخۆشی و سەربلندیەکا مەزنە مەم و زین ب زمانێ ئەلمانی و ئینگلیزی چاپ و چاپ ببیتەڤە، لێ پرسیارا گرنگ ل ڤێرێ ئەوە: ئەرێ وەرگێر شیایە یان شیاینە وەشانخانەیەکا ئەلمانی یان ئەوروپی (گەر ناڤەکێ بچوویک ژی هەبیت) قایل بکەن کو بۆ وان مەم و زینێ ب زمانێ وان بەلاڤ بکەن؟ یان ژی، هەما هەر فەریادی ب خۆ ل دەڤ خۆ بەلاڤ کریە؟ ئەز ڤێ پرسیارێ دکەم، چونکی گەلەک یا ب ساناهییە خودان ب خۆ بەرهەمێ خۆ بەلاڤ بکەت، کو ئینگلیز دبێژنێ self-publishing، لێ گەلەک و گەلەک ب زەحمەتە وەشانخانەیەکا بیانی قەناعەتێ بینیت وی بەرهەمی بەلاڤ بکەت. بەلکی هەکەر بزانن ئەڤی بەرهەمی خواندەڤانێ خۆ نابیت یان ناهێتە فرۆتن، خۆ ب حوکمێ پارەیان ژی بەلاڤ ناکەن. ب گۆتنەکا دی، من دڤێت بێژم، ئه و هەرایا مامۆستا فەریاد ل سمینار و دیدارێن خۆ یێن تەلەفزیۆنی دبێژیت، کو وی ب ڤی کارێ وەرگێرانێ مەم زین گەهاندیە یان دێ گەهینیتە خانەیا ئەدەبێ جیهانی وەهمەکا مەزنە. ئەڤە ژی نەکو ئەم حەز ناکەین، لێ تاکو ئەدەبەکێ بلندێ مینا مەم و زینێ ببیتە “ئەدەبەکێ جیهانی”، ژبلی شەرتێ وەرگێرانێ بۆ ئینگلیزیێ، دڤێت ئەڤ بەرهەمە گەلەک بەربەلاڤ – circulate ببیت. ئانکو هەکەر وەشانخانەیەکا جیهانی خۆ لێ نەکەتە خودان، مەم و زین ژبەر دەرازینکا خودانێ خۆ گەلەک وێڤەتر ناچیت. دیارە ژی، هەڤکارێ فەریادێ فازل یێ وەرگێرانا ئینگلیزی، مستر میچ کۆهن Mitch Cohen، باش د ڤێ سحبەتێ دگەهیت، لەوا ل پلاتفۆرمەکا ئەلکترونی گازیەک بەلاڤ کربوو و داخازا هاریکاریێ دکر بۆ ڤەدیتنا وەشانخانەیەکێ بۆ بەلاڤکرنا مەم و زینێ ب زمانێ ئینگلیزی. لێ مخابن، دیارە کەس ل هەوارا وان نەچوویە و ئه و ژی نەشیاینە قەناعەتێ بۆ چ وەشانخانەیان چێکەن، لەوا ل دوماهیێ مامۆستا فەریادی هەر دوهنێ خۆ د سەرێ خۆ دایە و ل پەیمانگەها خۆ ب خۆ چاپ کریە. بۆ ڤێ ئێکێ ژی، مخابن بەربەلاڤبوونا ڤێ پەرتووکا هێژا و گەلەک زەحمەت پێڤە هاتیە دیتن دێ یا سنۆردار بیت و ل ناڤ خواندەڤانێ بیانی بەلاڤ نابیت وەکی دهێتە گۆتن!
گومانا وەرگێرانا ئینگلیزی:
دەما مرۆڤ پێشەکیا کتێبا فەریادێ فازل دخوینیت و دهێتە سەر هوورکاریێن پرۆسەیا وەرگێرانا مەم و زینێ بۆ زمانێ ئینگلیزی، ئه و گەلەک ب بستەیی دبێژیت کو وەرگێرانا وان یا ئینگلیزی کارەکێ سەربەخۆیە و نە ل بەر وەرگێرانا ئەلمانی هاتیەکرن، بەلکی ب تەمامی کارەکێ نوویە و مامەلەیەکا نوو ژی ل گەل تێکستی هاتیەکرن. ئەڤە ب خۆ گۆتنەکا جوانە و چ تێبینی ل سەر نینن، لێ دەمێ مرۆڤ ل ئەنترنێتێ دووڤچۆنەکێ بۆ گۆتنێن هەڤکارێ وی یێ وەرگێرانێ مستر میچ کۆهنی دکەت، میچ ل وێبسایتێن جوداجودا دبێژیت “من” مەم و زینا ئینگلیزی ژ “مەم و زینا ئەلمانی” وەرگێرایە، ئانکو وەرگێرانا وەرگێرانێیە! ل ڤێرێ جارەکا دی، گومانەک ل دەف مرۆڤی پەیدا دبیت، ئەرێ ئەم باوەر ژ کیژ وان بکەین: مامۆستا فەریادی یان مستر میچی؟ و بۆچی میچ کۆهن ئاماژە نادەتە ناڤێ فەریادی و دبێژیت “من” و بۆچی دبێژیت “ژ ئەلمانی”؟ ئەڤە هەمی ب راستی کۆمەکا گومانان د سەرێ مرۆڤی دا چێدکەن، کو مرۆڤ ل دوماهیێ بێ دودلی بێژیت: موویەکێ د ڤی ماستی دا هەی![1]
Kurdîpêdiya ne berpirsê naverokê vê tomarê ye, xwediyê/a tomarê berpirs e. Me bi mebesta arşîvkirinê tomar kiriye.
Ev babet bi zimana (کرمانجی) hatiye nvîsandin, klîk li aykona
bike ji bu vekirina vî babetî bi vî zimana ku pî hatiye nvîsandin!
ئەڤ بابەت ب زمانا (کرمانجی) هاتیە نڤیساندن، کلیک ل ئایکۆنا
بکە ژ بو ڤەکرنا ڤی بابەتی ب ڤی زمانا کو پی هاتیە نڤیساندن!
Ev babet 1,727 car hatiye dîtin
Raya xwe li ser vî babetî binivîsin!