ئەڤرۆ:
سەرۆکێ ھەرێما باسک یا ئیسپانیا ڕاگەھاند کو ئەو د شەرێ ل دژی داعشی دا ب دل و جان دگەل کوردا نە و دیار کر کو دڤێت جڤاتا نێڤدەولەتی زێدەتر ھاریکاریا کوردان بکەت و گۆت: “مافێ گەلێ کوردە چارەنڤیسێ خوە دیار بکەت چونکو کوردان د شەرێ ل دژی تیرۆرێ دا سەرێ جیھانا ئازادیخواز بلند کرینە و ڕومەتا مرۆڤاتیێ پاراستینە ئەڤ ژی دسەلمینیت کو دڤێت ھەرکەس ڕێزێ ل مافێ چارەنڤیسێ گەلێ کورد بگریت و پشتەڤانیێ ل ئاڤاکرنا دەولەتا کوردی بکەت”.
ئینیگۆ ئورکولو سەرۆکێ ھەرێما باسک یا سەر ب ئیسپانیا بۆ ڕۆژناما ئەڤرۆ ڕاگەھاند ژ ڕۆژا کو ھێرشێن تیرۆرستان بۆ سەر کوردستانێ دەستپێکریە ئەو ژ نێزیک ڤە ئاگەھداری ڕەوشا کوردان دکەت و گۆت: “ئەم ئێش و ئازارێن کو گەلێ کورد ل ھەمبەر زۆلم و زۆرداریا دەولەتێن داگیرکەرێن کوردستانێ دکشینیت دبینین و ئەڤ نە بەس بوو ڤێجا تیرۆرستێن ڕادیکال یێن درندە ژی بەرێ خوە دانە گەلێ کورد و دەست ب زۆلمێ کرینە و ھەکە ھەتا ئەڤرۆ ژی تیرۆرست دشێن ھێرشێ بکەنە سەر کوردان ئەڤ شەرما جیھانێیە و ژناڤچوونا دیمۆکراسیا ئورۆپایە، دڤێت بەری ھەر تشتەکی ئورۆپا و ئەمریکا ب ھەموو ڕەنگان ھاریکاریا کوردان بکەن بۆ ژناڤبرنا تیرۆرستان، ژ بەر کو گەلێ کورد نە ب تنێ ئاخ و ناموسا خوە بەلکو د ھەمان دەمێ دا ڕومەتا مرۆڤاتیێ ژی د پارێزن و ئەم ھەموو قەردارێ گەلێ کوردین”.
سەرۆکێ ھەرێما باسک ھەروەسا دیار ژی کر کو ئەو ژ ئێشێن گەلێن بندەست باش تێدگەھن، ژ بەر کو د دەمێ خوە دا ئەو ژی تووشی ھەمان چارەنڤیسێ ھاتینە و گۆت: “ئەڤرۆ دەمێ ھەڤگرتنا گەلێن بندەست و یێن بێ دەولەتن و دڤێت بەری ھەر ئالیەکی ئەم وەک نەتەوێن بێ دەولەت ھاریکاریا ھەڤدو بکەین و برینێن ئێکدو سارێژ بکەین، ل وەلاتێ مە ژی کەمپینێن ھاریکاریێ بۆ شنگالێ و کۆبانێ برێڤە دچن و ھەر ھاریکاریەک دێ زێدەتر مە بگەھینیتە ھەڤدو و ھێزا بەرخوەدانا ل ھەمبەر زۆلمێ بلندتر بکەت”.
ئینیگۆ ئورکولو سەرۆکێ ھەرێما باسکێ د پشکەکا دی یا ئاخڤتنا خوە دا ژی ڕاگەھاند کو ئەو وەک ھەرێما باسک خوە بۆ ئاڤاکرنا دەولەتا سەربخوە ئامادە دکەن و گۆت: “ژ بەر ڤێ یەکێ نھا ھەماھەنگیەکا گەلەک باش د ناڤبەرا مە و ھەرێما کەتالۆنیا دا دروست بوویە، ئەم ھەتا داوی پشتەڤانیێ ل ڕیفراندوما سەربخوە یا ھەرێما کەتالۆنیا دکەین و پشتی ڕیفراندوما وان ڤێجا ئەم دێ دەست ب کەمپینەکا وەسا بکەین، دیسان گەلەک نەتەوێن مەزن ھەنە کو ھەتا نھا بێی دەولەتن و د سەری دا ژی گەلێ کوردستانێ دھێت و ل دووڤ ھزرا من گەلێ کورد ژ ھەر خەلکەکێ دی زێدەتر ئاڤاکرنا دەولەتا سەربخوە حەق دکەت و دڤێت دەست ژ مافێن خوە یێ ئاڤاکرنا دەولەتەکا سەربخوە بەرنەدەن و بەرخوەدانا کوردان ل کوردستانا عیراق، سووریێ و تورکیا ل دژی داگیرکەران و کۆمێن تیرۆرست بۆ ھەموو جیھانێ سەلماندیە کو کورد ھێژایی ئاڤاکرنا دەولەتا سەربخوە و ژیانەکا ئازادن”.
د دووماھیا ئاخڤتنا خوە دا ژی سەرۆکێ ھەرێما باسک یا سەر ب ئیسپانیا ڕاگەھاند کو پرانیا ئەندامێن پەرلەمانێ ھەرێما وان پشتەڤانیێ ل دەستپێکرنا کەمپینا ئازادیا گەلێ باسکێ دکەن و گۆت: “مە ژ بۆ بەرپرسێن ئیسپانیا گۆت، د دیرۆکێ دا ھەوە ب زۆلم و زۆرداریێ ئاخا مە داگیر کریە و ھەوە وەلاتێ مە کریە پشکەک ژ ئاخا ئیسپانیا و ئێدی ئەم ناخوازین ب زۆرێ ل گەل ھەوە بژین، بۆ وێ چەندێ ژی دەرفەتێ بدەنە گەلێ مە بلا ب ئیرادا خوە چارەنڤیسێ خوە دیار بکەت، ھەکە گەلێ مە ژ ئەنجامێ ڕیفراندومەکا ئازاد دەولەتەکا سەربخوە نەخاست و بریارا پێکڤەژیانێ ل گەل ئیسپانیا دا وێ دەمێ ئەم دێ ب ڕێزگرتن ڤە نێزیکی ئەنجامێ ڕیفراندومێ ببین، لێ ھەکە گەلێ مە بریارا ئاڤاکرنا دەولەتا سەربخوە دا وێ دەمێ دڤێت ھوون ڕێزێ ل ئیرادا گەلێ مە بگرن”.[1]
Kurdîpêdiya ne berpirsê naverokê vê tomarê ye, xwediyê/a tomarê berpirs e. Me bi mebesta arşîvkirinê tomar kiriye.
Ev babet bi zimana (کرمانجی) hatiye nvîsandin, klîk li aykona
bike ji bu vekirina vî babetî bi vî zimana ku pî hatiye nvîsandin!
ئەڤ بابەت ب زمانا (کرمانجی) هاتیە نڤیساندن، کلیک ل ئایکۆنا
بکە ژ بو ڤەکرنا ڤی بابەتی ب ڤی زمانا کو پی هاتیە نڤیساندن!
Ev babet 633 car hatiye dîtin
Raya xwe li ser vî babetî binivîsin!