نازکەک من سەحەرێ دی ب جەمالا خوە نە وەک
حوور و ولدان و پەری بوو، نە بەشەر بوو، نە مەلەک
وەر تەماشایێ شەهیدێن خوە کە جارەک تو بنێ
«أحسَن اللهُ تَبارَک» ژ دو چەهڤێن د بەلەک
سونبولێن تەڕ ل گولان پال ب مەستی ددەرن
سووسنێن تازە ل نەسرین وەرەقان بوونە هەلەک
نازکا من کو ب مەستی د چەمەن هاتە خەرام
ژ حەسەد چوونە خوسووفێ مەه و مهرێ د فەلەک
ئێ ژ غەفلەت تە ببینت کو دمینت؟ هەیهات!
تە ب چەهڤێن د بەلەک کوشتنە مەزلووم گەلەک
زەررەیەک عشق گها کێ و ژ عەقلێ خوە نەبر
«کُلُّ مِنْ صادَفَهُ داهِيَةُ الْعِشقِ هَلَکْ»
خوسرەوێ عشقێ کو ڕوونشت ل سەر تەختێ وجوود
«فَتَحَ الْقَلبَ عَلَی الْفَورِ وَ لِلْرَوحِ مَلَکْ»
وەه چ عشق و چ سەلامەت هەردو دوورن ژ یەکێ
«کُلُّ مَنْ يَسْلُکُ حُبّاً سُبُلَ النار سَلَکْ»
ئاه بێگاڤ ژ دل تێن مە ژ پێتا د جەگەر
بەس تو بێ فەیدە نەسیحەت کە مە دل بوویە پەلەک
ما ژ عومرێ مە چ مابت وەرە ئێدی ڤ مە ڕا
دا د ئەقتارێ وجوودێ بکرین سەیرێ مەلەک
د ئستوائێ کو ژ حوسنا تە ڤەدا لامعەکێ
«نَظَرَ الشَمْسِ مِنَ الشَرقِ إلی الْغَربِ دَلَکْ»
ئافتابێ کو نە تەسویر ژ حوسنا تە بتن
«نورُها فی نَظَری ظُلْمَةُ داج وَ حَلَکْ»
ژ هەوا بەند تە کرم شوبهەتی بایێ د سڤک
چ ژ بسکا تە ببێم؟ ئاه ژ بسکا تە چەلەک!
ئەز ژ بسکا تە ڤەڕستم مە تەلەب کر لەبێ لەعل
لێ د چاها زەقەنێ بێ سەر و پا چوومە هەلەک
ب ئومێدا تە هومایێ نە مەلێ تۆڕ ڤەدا
وەر تەماشایێ جەهان بوویە هەمی تۆڕ و شەبەک
#مەلای جزیری# [1]