ئیرۆ ژ دەست حوسنا حەبیب؛ سەرگەشتە و حەیرانم ئەز
من عشق و محبەت بوون نەسیب؛ سەودائێ سەرگەردانم ئەز
عشقێ گەلەک سەودا کرن؛ بێ مال و بێ مەودا کرن
نوورا چرا وندا کرن؛ مووسایێ عەمرانم ئەز
مووسا ژ دەست حوسنا ب نوور؛ شیرینییا خالێن د هوور
سەجدە برە بەر کۆهێ توور؛ نێزیکی ڕەمزێ وانم ئەز
رەمزێ کو دێ دلبەر بکن؛ جارەک ب چەشمان سەیر بکن
دێ کۆهێ قاف کەر کەر بکن؛ مەجرووحێ پڕ کوهڤانم ئەز
ئاه ژ دەست کۆهڤان و قەهران؛ من سەبر نائێت ل سەحران
شوبهەتێ مەوجێن د بەحران؛ قولزەمێ عومانم ئەز
قولزەم و بەحرێن د هەفتێ؛ ئاگرێ عشقێ کو کەفتێ
دێ سوژت شوبهەتێ نەفتێ؛ ئاتەشێ سۆزانم ئەز
ئاگرێ عشقێ یێ گەرمە؛ سەد هزار مەهدەر ت بەرمە
سوهتین و برهین ژ نەرمە؛ من دییە و پێزانم ئەز
من دییە موحبەت چ ڕەنگە؛ سوهتە دژوارە پەرەنگە
من مودام دل ژێ ب هەنگە؛ بنالین و ئەفغانم ئەز
نالینا تەیر و تیووران؛ کالینا چەنگ و بلووران
غولغولین د قەسر و قسووران؛ بلبلێ خوەشخوانم ئەز
بلبم دائم دخوینم؛ ئەز یەقین ئەر تە نەبینم
دین دبم سەودا د مینم؛ سەرخوەش و سەکرانم ئەز
سەرخوەش و ئەبتەر کرم تە؛ ژ عللەتان ڕەنگ زەر کرم تە
سوتم و کەرکەر کرم تە؛ ئاگر و بریانم ئەز
سوهتم و دەردێ ئەڤینێ؛ کوشتیمە ناکەت یەقینێ
کەس باوەر ناکەت ڤێ ژینێ؛ لەو بێ حال و مالم ئەز
ئاگر و پێتا د دلدا؛ مەعنییا داغان کو هلدا
ئەو کتاب نا چت تو جلدا؛ حافزێ مەدحانم ئەز
حافزێ مەدح و پەسندان؛ ڕۆهنییا مەحبوب و ڕندان
بێ حساب وەربوون د فندان؛ سوتیێ بێ جانم ئەز
سۆتمە قەت پێت و نار نە؛ کوشتمە زەرب لێ دیار نە
من دەمەک سەبر و قرار نە؛ نەخوەشێ پوڕ ژانم ئەز
نەخوەشێ ڕەنگ لێ نەمایی؛ دەست ل سەر فالێ نهایی
وان دگۆت ژ چاڤان گهایی؛ کوشتیێ عەینانم ئەز
کوشتمە هەردو عیونان؛ یەنگیێت نسبەن ژ نونان
رادکن ئەو قەتل و خوونان؛ گرتیێ زیندانم ئەز
گرتمە ئنساف د میر نە؛ قازیی و موفتی، ڤەبیر نە
قەید کرم کەس پێ خەبیر نە؛ بەندەئێ هجرانم ئەز
ما د بەندا فرقەتا تە؛ جان فدائێ خدمەتا تە
دا ببینم ڕەحمەتا تە؛ نوبەدارێ خانم ئەز
نوبەدارێ قوللەهێ خوە؛ دەرگەڤانێ دەرگەهێ خوە
بینە بیر و ئاگەهێ خوە؛ توولەیێ ئاستانم ئەز
توولەیێ دەرگاهێ یارم؛ شەڤ و ڕۆژان نوبەدارم
وەستایێ دەر ئنتزارم؛ چاڤریێ سولتانم ئەز
چاڤریێ سررا ل پێشم؛ مەقسەدا ئەز لێ ڤیێشم
هجرەتا یوسف د کێشم؛ یەعقوبێ کەنعانم ئەز
کۆرە بوو یەعقوب ژ دینێ؛ ژ پەردەیا داغا ئەڤینێ
گەر دبین ڤەکە برینێ؛ حەوجەیێ لوقمانم ئەز
وان دگۆت لوقمان تەبیبە؛ گۆتە من خەف عندەلیبە
شافیێ دەردان حەبیبە؛ بێ باوەر و ئیمانم ئەز
سوند دخوم بشاهد و دۆستان؛ کەڤڤر و سەیلێن ل بەستان
من بخوە لجەرحان ب بەستان؛ بێ ڕاحەت و ئاسانم ئەز
عاشقان ڕاحەت یا کێمە؛ ئاگر و پێتا دلێ مە
چەند هزار مەدحان دبێمە؛ موحیتێ ئەسمانم ئەز
خوزی من سەد سەر هەبانا؛ سەد هزار دەڤ پێڤەبانا
ئەو هەموو ل مەدحێ تەبانا؛ هێژ بوان نوقسانم ئەز
ئەز کز و زەر بووم ژ قەحرێ؛ دێ دەڤەک چ بکت ژ بەحرێ
یان دو چاڤ چ بکن ل سەحرێ؛ لدیتنا عەینانم ئەز
سەد هزار چاڤ من د ڤینا؛ بایەکێ پەردە هلینا
خەت و خال من تێر بدینا؛ عشق و قووتێ جانم ئەز
هەر کەسێ عشق تێ ئەسەر کت؛ سەد هزار پەردان د بەر کت
هەموان دێ کەر بکەر کت؛ تازیێ عوریانم ئەز
پەردە چوو ئەز مامە تازی؛ دلسەرا مەحبوب دخوازی
من عبادەت عشق و بازی؛ بێ مەی و مەیخانم ئەز
خانەیا بادەی و مەی تێ؛ موغنی و هەم چەنگ و نەی تێ
من ژ عشقان هەیا هەی تێ؛ سەرخوەش و سوکرانم ئەز
سەرخوەشێ ئاڤا حەیاتێ؛ مەجلسا ڕەقس و سەما تێ
دێ چکم ب سەوم و سەلاتێ؛ ب کۆزە و فنجانم ئەز
ئەو مەیێ گەردەن درێژان؛ شیشە و وان بادەڕێژان
من نەما هش ل نڤێژان؛ لدەفتەرا دینانم ئەز
«میم و حێ» عاقل ڤەدەردا؛ سجلەیا عشقێ و دەردا
لەو قەلەم ئانی بسەردا؛ مەعفویێ غوفرانم ئەز
#فەقێ تەیران# [1]