تۊبەکارانەن، تۊبەکارانەن
سۊزۍ لاڵەی گەرم تۊبە کارانەن
کزەی جگەر سۊز هەردە جارانەن
یا نە، سفتەکەی بەین یارانەن
گا مەردەی بێهۆش، گا زێندەم بە سەر
گا وێڵی هەردان سەرعی دەربەدەر
گا لەب و خەندە، دە مۍ زاریمەن
لادێ جە هېجران بێ قەراریمەن
نەگێجاو بەحر جەیحوونی تاسەم
شکەستەن کەشتی سەبای هەناسەم
سەوای ئامشۆی هەناسەم بەڼەن
مەمات بنچینەی حەیاتم کەندەن
وەرنە یەک نەفەس سەما و سەرزەمین
مەسۊزۊ بە نار دڵەی ماتەمین
فێدات بام قۆربان هەی بەر گۆزیدەم
دووریت کەم کەردەن بینایی دیدەم
وەلحاسڵ دەردان تەمامی یەکسەر
گشت وەنەم سەردان سەوڵ ناز پەروەر
مەجنوونی ئاسا حەیات و مەمات
ئەنیسی منەن گیانم بۊ فێدات
گا وەیانەی هوون نەسەر کڵاوان
وێڵ وێڵ مەگێڵوو پەرێت نەکاوان
گا مەست مەدهۆش، مات خەیاڵم
گانە فێکر وهۆش ڕاگەی وێساڵم
گا شاد و سەرخۊش گاهێ غەمناکم
گا چۊن نەقش سەنگ ئوفتادەی خاکم
گاهێ چۊڵ کۊ، فارغ نە ئەغیار
گا ئەنیس ڕاز هەم دەردێ تەییار
گاپەی دڵ وەشی دڵەی بێ قەرار
مەکەروو ڕازان شەکەرین گۆفتار
هەرچەند دڵ وەشی دڵە سا بسرەو
فزونتەر مەبۊ گڕەی نار ئەو
خۊ لاسەی کەلام لەیلی سۊسەن خاڵ
سەرتاپای بەدەن ها بی وەزۊخاڵ
مەگەر حەق، مۊراد من حاسڵ کەرۆ
دیدەی دڵ دیدەی تۊ واسڵ کەرۆ
وەرنە ها، وەختەن « ئەحمەد » چوون یاران
داخڵ بۊ نەجەمع جەرگەی مەزاران
#ئەحمەد بەگی کۊماسی# [1]