وێساڵم پەی تۊ، وێساڵم پەی تۊ
ئارەزووم بیەن وێساڵم پەی تۊ
جە هېجرت چۊن نەی مەناڵم پەی تۊ
قۆربان! کەس نەبۊ وەحاڵم پەی تۊ
سەرتاپا سفتەی زۊخاڵم پەی تۊ
هیچ کافر نەبۊ وەحاڵم پەی تۊ
دیدەم پەر ئەسرین بێ نوورەن پەی تۊ
بانەی ئەرواکەم خاپوورەن پەی تۊ
ستارەی مەحبووس دەیجوورەن پەی تۊ
بێ کەیفیم نەکەیف مەسروورەن پەی تۊ
نەحوجرەی خەمدا مەلاڵم پەی تۊ
هیچ کافر نەبۊ وەحاڵم پەی تۊ
ئەبداڵ کۊگەرد مەجنوونم پەی تۊ
دېوانەی دەیری مەحزوونم پەی تۊ
جە غایەت بەدەر زەبوونم پەی تۊ
وەنیم نێگایێ مەمنوونم پەی تۊ
شکەستەن هەم ساق، هەم باڵم پەی تۊ
هیچ کافر نەبۊ وەحاڵم پەی تۊ
ئازیز، لاڵ بیەن زبانم پەی تۊ
چوون قەقنەس دەروون بریانم پەی تۊ
قەد دالی داخی، کەمانم پەی تۊ
بەدەن بېزارەن جە گیانم پەی تۊ
نیەن جای مەلجا، مەجاڵم پەی تۊ
هیچ کافر نەبۊ وە حاڵم پەی تۊ
شیرین، من مەجرۆح ئەوگارم پەی تۊ
فەرهاد کۊکەن زامدارم پەی تۊ
بێ کەس، بێ هامدەنگ، ب ێ یارم پەی تۊ
من دڵسۊزی زار، غە مخوارم پەی تۊ
بۊڵەندەن ناڵەم زۊڵاڵم پەی تۊ
هیچ کافر نەبۊ وەحاڵم پەی تۊ
لەیلی من! دەروون پڕ مەیلم پەی تۊ
قەیس قەتران بەرگ دۊجەیلم پەی تۊ
وەکۊی نەجدەوە ئەبداڵم پەی تۊ
هیچ کافر نەبۊ وەحاڵم پەی تۊ
گەدای گۆر غەریب شارانم پەی تۊ
ئاوارەی وەتەن یارانم پەی تۊ
وەحش ئەفسۊردەی غارانم پەی تۊ
پا، پەڕ ئێش نێش خارانم پەی تۊ
دوو ساخ حەڵقەی زنجیرم پەی تۊ
پا نه پاڵەهەنگ ئەسیرم پەی تۊ
بەندیان ئاسا زویرم پەی تۊ
بەڼەن ڕای نەجات تەدبیرم پەی تۊ
غەریبم تەن کۊی زۊخاڵم پەی تۊ
هیچ کافر نەبۊ وەحاڵم پەی تۊ
#ئەحمەد بەگی کۊماسی# [1]