گڵکۊی تازەی لەیل گڵکۊی تازەی لەیل
ئارۆ شیم وەسەر گڵکۊی تازەی لەیل
نە پایەی مەزار ئەو لەیلۍپڕ مەیل
نەدیدەم ڕېزا ئەسرینان چۊن سەیل
شیم وەسەرینش وەدڵەی پر جۊش
سەنگی مەزارش گێرتم نە ئاغۆش
واتم ئەی دڵسوز قەیس لۊنگ وەکۊڵ
مەبارەکت بۊ یانەی بیدی چۊڵ
سەرهۆردە نە خاک سەوڵ خەرامان
من مەجنوونی تۊم وەی تەورپێم ئامان
کۊچۍ بێ وادەت کارێ پێم کەردەن
بېزارم جەگیان، ڕازیم وەمەردەن
گڕەی نارێ عێشق دووری باڵای تۊ
کارێ پێم کەردەن نەو نەما مۍ نۊ
وەختەن وێنەی قەیس لېوەی لۊنگ وەکۊڵ
تەن بۊ وە خۊراک وەحشیان چۊڵ
سەوگەند بەو خاڵان فیرووزەی وەش ڕەنگ
بەو دەستەی زۊڵفان پەشێویای پای سەنگ
جەو ساوە گەردش چەرخ پەڕ ستەم
من و تۊ وەی تەور جیا کەرد جەهەم
تۊ بەردەن و خاک سیای تەنگ وتار
من مام پەی ئازار جەفای ڕۊژگار
نەبەڕۊ ئارام، نەشەو خاومەن
چۊن چەم گل کەران گلاراومەن
هەرڕۊ چۊن مەجنوون خاتر جەخەم کەیل
هەر لەیل لەیلمەن نەهەردەی دۊجەیل
خەمان، پەژاران، ڕەفێقی ڕامەن
چەنی جەفا و جەور دایېم سە ودامەن
سپای خەم بەو تەور هوجووم ئاورەردەن
قافڵەی فامم وەتاراج بەردەن
زامتان سەخت، ئەی دڵەی بەرئێش
چۊن جای ماران گاز زۊخاو مەیو لێش
شەو کەیلەن زۊخاو وەلای جێمەدا
کافر بەزەئیش مەیو پێمە دا
یانەم وێرانەن، دەردەم دېویان
چۊن ئاهووی تەنیا سەرڵیم شێویان
شەوان زاری و شین، ڕوان ڕوڕومەن
یەکجار وەسوەسەی تەیفایی تۊمەن
یەحاڵی منەن شای وەفاداران
هامرازی تۊ کێن سەباو ئێواران؟
چ تەوەر مەویاری، چوونەن قەرارت
کین، هام سۊحبەتۍ لەیل و نەهارت؟
نەوسەرای تاریک پەر خەوف و خەتەر
مۊدارات چوونەن سەوڵێ نازپەروەر؟
نەی سەردی هەوای سەردی سیاسەنگ
چ تەورەن خاڵان فیروزەی وەش ڕەنگ؟
جەیاگەی باهووی قەیسی خەمینت
کام سەنگێ سیان ها نە باڵینت؟
داخم ئەو داخەن لەیلی خاتر تەنگ
ئەو دەستەی زۊڵفان سەودایی سی وەنگ
و هەودای چل چەنگ تۊ تاتات مەکەرد
ئیسە پەشێویان چوون ڕېحانی هەرد
ئەو دیدەی مەخموور ئاهووبېز تۊ
ئەو قەوس قەتران شەڕئەنگێز تۊ
ئیسە لە گەردش چەرخ نیلی ڕەنگ
بێ ڕەونەق بیەن چۊن نەقش ڕوی سەنگ
سا پەی چێش سۊمای دیدە تار نەبۊ
زیندەگی جەلام ژارمار نەبۊ
تۊ خەریک قەبر، سیای سەردەنی
تەقام حەسرەتان وەگڵ بەردەنی
من تەنیا چۊن قەیس لېوەی خەم خەڵات
زیندە مەگیڵوو نە ڕووی سەر بەسات
وەلحاسڵ هەر چەند، شین و زاریم کەرد
نەپای قەبرلەیل، بێ قەراریم کەرد
جوابش نەدا زەڕڕێو دەنگ نەکەرد
یەکجار بڵێسەم جەگەردوون ویەرد
دیسان هەم جە نۊ واتم: ئەی دڵسۊز!
حەکیم دەردان دەرد مەجنوون دۊز
یەپەی چێش مەیلم جەلات کەم بیەن
مەر عەهد و پەیمان جەیادت شیەن
من وەی دڵەی خار بێ قەرارەوە
وەی جامەی سیای یەخەپارەوە
هام نە سەرینت، زار زار مناڵوو
خاک یانەی نۊت وچەم مماڵوو
تۊ هیچ نیت و تەنگ بێ قەراری من
جە ئەلوێدای سەخت شین وزاری من
نمەدی جواو، نۊختەی خاڵ بێگەرد
مەعلوومەن جەلات، مەیلم بیەن سەرد
دیم سەدایێ نەرم، نە تۊی خاکەوە
نەیانەی تازەی حەسرەت ناکەوە
ئاما نەگۊشم چۊن هەردەجاران
واتش: ئەی مەجنوون وڵی کۊساران !
سەوگەند بەو ئەحەد ، فەردێ بێ هەمتا
و بێ وادە کەرد، قەیس جە لەیل جیا
ڕای جواو نیەن، دڵ بێ قەرارەن
خەیلۍسەنگ و خاک وەجەستم بارەن
جە تەئسیر خاک، هەوای سەردسەنگ
ڕای جواو نیەن، چەنیت کەروو دەنگ
خان خاک وەی تەور، مەحبووسم کەردەن
نازاران وێم، جەیادم بەردەن
بەڵێ، تۊ هەرچەند زاری مەکەری
هەر چەند سەر وەسەنگ سیامەدەری
فایدەش نیەن، سوودمەدارۆ پێت
بشۆ زاری کەر، پەرێ بەخت وێت
پەی چێش؟ ئی دنیا خەیلۍبێ وەفان
جە تەنخوای وەفاش ،دایېم هەر جەفان
کەس جە قەید دام مەکرش نەڕەستەن
یەکەیەک وه زەنجیر عەیاری بەستەن
جە «يوم الاست» تاکو وەڕۊی مەحشەر
کەس جەدام مەوت بەر نەشین وەبەر
هەرکەس دڵ شاد بۊ، پەی دنیای بێ پۊ
ئاخر پەشیمان مەبۊ ڕەنجەڕۊ
هەر چەند پەرێ من شین و زاریتەن
نەپای قەبر لەیل بێ قەراریتەن
هەر چەند پەرێ من تۊ ئەلوداتەن
ئاخر، سەرئەنجام ئی جاگە، جاتەن
هێندە خاک و سەنگ و جەستم بارەن
نە جاگەی جواب، نەڕای گۆفتارەن
ئەحمەد پەرێ کۊچ، شای جەمین جامان
ڕەستاخیز کەرۆ تاکو مەرگ سامان
#ئەحمەد بەگی کۊماسی# [1]